မောင်စာဂ၊ နိရဉ္စရာ၊ မေ ၁၃ /၂ဝ၂၅

ရခိုင်ပြည်၊ ရသေ့တောင်မြို့နယ်၊ ထွန်းရဝေရွာဟောင်းကို စစ်ကောင်စီလေတပ်က ယနေ့နံနက်ပိုင်းတွင် ဗုံးလာကြဲခဲ့သည့်အတွက် အရပ်သားတစ်ဦးသေဆုံးပြီး ကလေးငယ်တစ်ဦးအပါအဝင် လေးဦးထက်မနည်း ဒဏ်ရာရသွားခဲ့သည်ဟု သိရသည်။

အဆိုပါကျေးရွာကို ယနေ့ မေလ ၁၃ ရက်၊ နံနက် ၁ဝ နာရီခန့်တွင် စစ်ကောင်စီက ဂျက်တိုက်လေယာဉ်တစ်စီးဖြင့် ဗုံးနှစ်လုံးလာရောက်ကြဲချတိုက်ခိုက်ခဲ့ခြင်းဖြစ်သည်။

ယင်းသို့ဗုံးကြဲတိုက်ခိုက်မှုကြောင့် ကနဦးသတင်းများအရ အပြစ်မဲ့အရပ်သားတစ်ဦးသေဆုံးပြီး ကလေးငယ်တစ်ဦးအပါအဝင် လေးဦးထက်မနည်း ထိခိုက်ဒဏ်ရာရသွားခဲ့သည်ဟု ဒေသခံများက ပြောသည်။

ဒေသခံတစ်ဦးက “အဲဒီရွာက ဘာစစ်ရေးလှုပရှားမှုမှမရှိဘူး။ ရသေ့တောင်က စစ်ဘေးရှောင်တွေပဲ အနေများကြတာ”ဟု ပြောသည်။

ဗုံးကြဲတိုက်ခိုက်မှုကြောင့် လူနေအိမ် ၁ဝ လုံးခန့်လည်း ပျက်စီးသွားခဲ့သည်ဟု သိရသည်။

အဆိုပါကျေးရွာသည် ရသေ့တောင်မြို့၏ အရှေ့ဘက် ၃ မိုင်ခွဲအကွာတွင်ရှိပြီး အိမ်ခြေ ၂ဝဝ ကျော်ရှိသည်ဟု သိရသည်။

စစ်ကောင်စီသည် မေလ ၆ ရက်မှ ၃၁ ရက်အထိ အပစ်အခတ်ရပ်စဲထားသည်ဟုထုတ်ပြန်ထားသော်လည်း သူတို့ကတိကို သူတို့ကိုယ်တိုင်ချိုးဖော်ကာ အပြစ်မဲ့အရပ်သားများနေထိုင်ရာ ကျေးရွာများအပါအဝင် စာသင်ကျောင်းများ၊ ဘာသာရေးအဆောက်ဦများကို လေကြောင်းမှ ဗုံးကြဲတိုက်ခိုက်နေဆဲဖြစ်သည်ဟု ဒေသခံများက ပြောသည်။

ဓာတ်ပုံ - ရသေ့တောင်မြို့နယ်၊ ထွန်းရဝေရွာဟောင်းအား စစ်ကောင်စီက လေကြောင်းမှဗုံးကြဲအပြီး တွေ့ရစဉ်။ (Photo - GEM)

---

ကျနော်တို့မီဒီယာဆက်လက်ရှင်သန်ရပ်တည်နိုင်ရေးအတွက် လူကြီးမင်းတို့ရဲ့ အားပေးမှုနဲ့ အကူအညီတွေကို အထူးလိုအပ်နေပါတယ်။ ဒီလင့် https://donorbox.org/narinjara-news ကနေတဆင့် ကူညီနိုင်ပါတယ်။ လူကြီးမင်းတို့ရဲ့ ကူညီထောက်ပံ့မှုအတွက် ကျေးဇူးအထူးတင်ပါတယ်။