နိရဉ္စရာ၊ မေ ၁၇/၂၀၂၅

စစ်ကောင်စီက ရခိုင်ကို ဗုံးကြဲ၍ အရပ်သား ဒါဇင်နှင့်ချီပြီး သေဆုံးနေချိန်တွင် အာရက္ခတပ်တော်( AA) က သဘောထားကြီးစွာဖြင့် စစ်သုံ့ပန်းနဲ့ မိသားစုဝင် ၂၂၅ ဦးကို  ပြန်လွတ်ပေးလိုက်ကြောင်း သတင်းရရှိသည်။

၎င်းတို့ ၂၂၅ ဦးမှာ မင်းပြားမြို့သိမ်း တိုက်ပွဲအတွင်း ဖမ်းဆီးထိန်းသိမ်းခံထားရသောစစ်သုံ့ပန်းမိသားစုဝင်များအထဲက ဖြစ်ပြီး  မေလ၁၆ ရက်နေ့က ပြန်လည်လွှတ်ပေးလိုက်ခြင်းဖြစ်သည်။

ရခိုင်လူ့အခွင့်အရေးကာကွယ်မြှင့်တင်သူများအဖွဲ့ ဒါရိုက်တာ ဦးမြတ်ထွန်းက “ ဒီလူ ၂၀၀ ကျော်ကို မနေ့က ပြန်ဂျီနီဗာကွန်ဗန်ရှင်းနဲ့ အညီ လွှတ်ပေးလိုက်တယ်လို့ သိရပါတယ်။ အကြမ်းဖက်စစ်ကောင်စီက ဗုံးကြဲလို့ ရခိုင်မှာ ၃ ရက်အတွင်း အရပ်သား ၂၀ ကျော်သေဆုံးခဲ့ရတယ်။ ဒီအချိန်မှာ အေအေက စစ်သုံ့ပန်းတွေကို ပြန်လွှတ်ပေးတာက အလွန်သဘောထားကြီးတဲ့လုပ်ရပ်ဖြစ်ပါတယ်။ ကြိုဆိုပါတယ်”ဟု ပြောကြားသည်။

              စစ်သုံ့ပန်းများအား ပြန်လွှတ်ပေးသည့် အခမ်းအနား

၎င်းတို့ကို အခမ်းအနားပြုလုပ်ကာ ယမန်နေ့ နေ့လယ်ပိုင်း ပြန်လွှတ်ပေးလိုက်ခြင်းဖြစ်ပြီး အာရက္ခတပ်တော်တာဝန်ရှိသူများက သူတို့အား အားပေးစကားများ ပြောကြားခဲ့ကာ ပြန်လွှတ်သွားသည့် စစ်သုံ့ပန်း မိသားစုများကို ကားများဖြင့် ၎င်းတို့သွားလိုသည့် နေရာများကို လိုက်ပါပို့ဆောင်ခဲ့သည်ဟု ​ (ULA/AA)နှင့်နီးစပ်သူအမျိုးသားတစ်ဦးကပြောသည်။

" မနေ့က နေ့လယ်ပိုင်းလောက်ကပြန်လွတ်ပေးလိုက်တယ်။ မိသားစုဝင်တွေ၊စစ်သုံ့ပန်းတွေပေါ့။လွတ်မြောက်တစ်နေရာကနေ သူတို့ရဲ့နေရပ်တွေကို သွားလို့ရအောင် ကားတွေနဲ့ ပို့ပေးလိုက်ပါတယ်" ဟု ပြောသည်။

ပြီးခဲ့သည့်ဧပြီ ၁၃ ရက်နေ့ သင်္ကြန်အကြိုနေ့ကလည်း မင်းပြားမြို့သိမ်းတိုက်ပွဲမှဖမ်းဆီးရမိသည့် စစ်သုံ့ပန်းနှင့်  မိသားစု ၁၇၀ ဦးကို AA ကပြန်လွှတ်ပေးခဲ့သည်။

အာရက္ခတပ်တော်(AA)သည်  တိုက်ပွဲအတွင်းမှ ဖမ်းဆီးရမိခဲ့သည့်  စစ်ကောင်စီတပ်ဖွဲ့ဝင်နှင့်မိသားစုဝင်များကို ကောင်းမွန်စွာ စောင့်ရှောက်ပေးထားပြီး လုံခြုံရေးအရ ပြန်နိုင်သူများကို တစ်သုတ်ပြီးတစ်သုတ်ပြန်လွတ်ပေးနေကြောင်း သိရသည်။