နိရဉ္စရာ၊ ဇွန် ၃ /၂၀၂၅

 
စစ်ကောင်စီက ယာယီပစ်ခတ်တိုက်ခိုက်မှုရပ်စဲကြောင်း ကျေညာပြီး ၂ ရက်ခန့် အကြာတွင် တပ်မ(၉၉)မှ  စစ်ကြောင်းတစ်ခုက အမ်း-ပဒါန်းလမ်းပေါ်  ရိုးမပေါ်ရှိ အာရက္ခတပ်တော်(AA) ထိန်းချုပ်ထားသည့် နယ်မြေသို့ စစ်ကြောင်းထိုးလာဖြင့် တိုက်ပွဲပြင်းထန်ဖြစ်ပွားနေသည်ဟု သတင်းရရှိသည်။

 တိုက်ပွဲမှာယနေ့ ဇွန်လ (၃)ရက်နေ့ နံနက်ပိုင်းမှစ၍ ပြင်းထန်ဖြစ်ပွားနေသည်ဟု အမ်းဒေသခံစစ်ရေးသတင်းရင်းမြစ်တစ်ဦးကနိရဉ္စရာ ကို ပြောသည်။

" မနေ့ကမနက်ကတည်းကပြင်းနေတာ။တပ်မ(၉၉)ဦးဆောင်တဲ့စစ်ကြောင်း တစ်ကြောင်းက  AA ထိန်းချုပ်ထားတဲ့ နယ်‌မြေထဲကို ဝင်လာတာ။(AA)က ပြန်ခုခံတိုက်ခိုက်တဲ့အတွက် တိုက်ပွဲ ပြင်းနေတာ" ဟု ပြောသည်။

  တိုက်ပွဲဖြစ်ပွားရာအနီးဝန်းကျင်သို့ နတ်ရေကန်တောင်ထိပ်နှင့် တောကြော  တစ်လျှောက်ရှိစစ်ကောင်စီစခန်းများမှလက်နက်ကြီးများပစ်ကူနေပြီးပဒါန်းမြို့ရှိဆုံကုန်းအမြောက်ကြီးတပ်မှ လည်းလက်နက်ကြီးများဖြင့်ပစ်ကူပေးနေသည်ဟု ၎င်းကပြောသည်။

" တိုက်ပွဲဖြစ်နေတဲ့နေရာတွေကို စစ်ကောင်စီဖက်က လက်နက်ကြီးနဲ့ပစ်ကူတယ်။တိုက်ပွဲမှာစစ်ကောင်စီဖက်က အထိနာနေပေမယ့်လေယာဉ်တော့မလာသေးဘူး " ဟု ပြောသည်။

ယင်းအပြင် မေလ နောက်ဆုံးအပတ်က အာရက္ခတပ်တော်(AA)နှင့်စစ်ကောင်စီတို့တိုက်ပွဲ ဖြစ်ပွားခဲ့သည့်  MPTတာဝါတိုင်းကုန်း ပတ်ဝန်းကျင်မှတပ်ပြိုကာထွက်‌ပြေးပုန်းရှောင်နေသည့် တပ်ကြပ်အဆင့်အပါအဝင်စစ်ကောင်စီတပ်ဖွဲ့ဝင်တချို့ကို AA မှဖမ်းမိထားကြောင်းဒေသအတွင်းသတင်းများထွက်ပေါ်နေသည်ဟုသိရသည်။

အမ်းမြို့နယ်အပိုင် နတ်ရေကန်တောကြောရှိ MPT တာဝါတိုင်ကုန်းဘေးပတ်ဝန်းကျင်ရှိ ကာကင်စခန်းအားလုံးကို မေလ ၂၉ရက်နေ့က အာရက္ခတပ်တော်(AA)မှ သိမ်းပိုက်နိုင်ခဲ့သည်။

စစ်ကောင်စီနှင့်ညီနောင် မဟာမိတ်သုံးဖွဲ့(AA+TNLA/PSLF)+MNDAA)တို့အပစ်ရပ်ထားသည့် ပြီးခဲ့သည့် ၂ လ ကာလ အတွင်းတွင် စစ်ကောင်စီမှ AAသိမ်းပိုက်‌သည့် နေရာများကို စစ်ကြောင်းထိုးကာလက်နက်ကြီးကျည်များ၊ဒရုန်းဗုံးဖြင့် နေ့စဉ်ရက်ဆက်ပစ်ခတ်တိုက်ခိုက်နေသဖြင့် တိုက်ပွဲများမှာ ရံဖန်ရံခါဖြစ်လျက်ရှိကြောင်း ဒေသခံများက ပြောသည်။