ကြိုင်ဟိန်းလင်း၊ နိရဉ္စရာ၊ ဇွန် ၂၆/ ၂၀၂၅

ရခိုင်မှ မြို့နယ်တချို့တွင် စီးပွားဖြစ် လောင်းကစားများပြုလုပ်လာသည်ကို တွေ့ရှိလာရသည့်အတွက် အာရက္ခပြည်သူ့တော်လှန်ရေးအစိုးရက တားမြစ်ပိတ်ပင်လိုက်ကြောင်း သိရှိရသည်။

ရခိုင်တွင် စီးပွားဖြစ် ဖဲကစားခြင်း၊ ဒိုးဆပ်ကစားခြင်းအပါအဝင် အခြားသော လောင်းကစားပြုလုပ်ခြင်းများကို မပြုလုပ်ကြရန် မြို့နယ်အချို့တွင် အာရက္ခပြည်သူ့တော်လှန်ရေးအစိုးရ၏ ဒေသဆိုင်ရာ အုပ်ချုပ်ရေးဌာနများက ယခုရက်ပိုင်းမှစတင်ကာ ဆော်ဩလျက်ရှိနေပြီဖြစ်ကြောင်း သိရသည်။

ဒေသဆိုင်ရာအုပ်ချုပ်ရေးဌာနများ၏ ယခုရက်ပိုင်းထုတ်ပြန်ချက်အချို့တွင် "လုံခြုံရေးအရ စိုးရိမ်နေကြချိန်၊ မိဘပြည်သူတို့၏ စားဝတ်နေရေး အလွန်ခက်ခဲနေချိန်အချို့ ဝိသမလောဘသားများ၏ ဆင်ခြင်တုံတရားမထားဘဲ စီးပွားဖြစ်လောင်းကြေးထပ်ကာ ဖဲကစားခြင်း၊ ဒိုးဆပ်ကစားခြင်းအပါအဝင် အခြားနည်းလမ်းများနှင့် လောင်းကစားပြုလုပ်နေကြခြင်းကို လေ့လာတွေ့ရှိရသည်"ဟု ရေးသားထားသည်။

အဆိုပါ လောင်းကစားပြုလုပ်ခြင်းကို မြို့နယ်အချို့တွင် တာဝန်ရှိသူများက ဆော်ဩခြင်း၊ သတိပေးခြင်းများကို ပြုလုပ်ထားပြီး လိုက်နာမှုမရှိသူများကို တည်ဆဲဥပဒေအရ ထိရောက်စွာ အရေးယူသွားမည်ဟုလည်း ဖော်ပြထားသည်။

စီးပွားဖြစ် လောင်းကစားပြုလုပ်ခြင်းမှာ မိသားစုတို့၏ စီးပွားကို ပျက်စီးစေနိုင်သည့်အတွက် ယခုကဲ့သို့ ကန့်သတ်လိုက်သည်မှာ ကောင်းသည်ဟု ရခိုင့်လူမှုအဖွဲ့အစည်းတစ်ခု၏ ခေါင်းဆောင် ကိုဇော်ဇော်ထွန်းက ပြောသည်။

"လောင်းကြေး အများကြီးနဲ့ စီးပွားဖြစ်၊ စီးပွားပျက်အောင် ကစားတာကတော့ မကောင်းဘူး။ မိသားစုစီးပွားရေးကိုလည်း ထိခိုက်တယ်။ တိုင်းပြည်စီးပွားရေးကိုလည်း ထိခိုက်တယ်။ ဒါကို ကန့်သတ်လိုက်တာကတော့ ကောင်းတယ်လို့ မြင်ပါတယ်။ ဒီဥပဒေအောက်မှာ ကျောသား၊ ရင်သားမခွဲခြားဘဲနဲ့ တပြေးညီသက်ရောက်ဖို့တော့လိုမယ်"ဟု ပြောသည်။

သို့သော်လည်း သာရေး၊ နာရေးပွဲများနှင့် ပျော်ပွဲရွှင်ပွဲ ပွဲများတွင် သက်ဆိုင်ရာ၏ခွင့်ပြုချက်ဖြင့် ကစားခွင့်ရှိသည်ကိုလည်း တွေ့ရှိရသည်။

ထိုသို့ သက်ဆိုင်ရာမှ ခွင့်ပြုချက်အပေါ် အခွင့်ကောင်းယူပြီး လောင်းကစားမလုပ်ကြရန်အတွက်လည်း ထိန်းသိမ်းသင့်သည်ဟု သူက ထောက်ပြသည်။

"သာရေး၊ နာရေး ပျော်ပွဲ၊ ရွှင်ပွဲတွေမှာ ခွင့်ပြုပေးမယ်ဆိုရင် ဘယ်လောက်အတိုင်းအတာ ခွင့်ပြုပေးမှာလဲ။ အဲဒါတွေကိုလည်း ရှင်းရှင်းလင်းလင်းဖြစ်စေချင်ပါတယ်။ ဘာဖြစ်လို့လဲဆိုတော့ သာရေး၊ နာရေးတွေမှာလည်း လောင်းကြေးအများကြီးနဲ့ ကစားနေရင် စီးပွားရေးထိခိုက်မှာပဲ" ဟု ပြောသည်။

တစ်ဘက်တွင်လည်း မိသားစုချင်း အပျော်သဘော ကစားမှုများကို ကြီးလေးသော ဥပဒေများဖြင့် အ‌ပြစ်မပေးရန် လိုအပ်သည်ဟုလည်း သူက ထောက်ပြသည်။

"မိသားစုထဲမှာ အပျော်သဘောကစားနေတာတွေကို ဥပဒေကို အကြောင်းပြပြီး ဖမ်းဆီးမှုရှိတယ်ဆိုတာကို ရပ်ကျေးအဆင့်မှာ ကြားနေရပါတယ်။ ပိုက်ဆံတောင်းတာတွေကိုလည်း ကြားနေရပါတယ်။ အဲလိုမျိုးကျရင်လည်း မကောင်းဘူး။ လောင်းကစားဆိုတာက နိုင်ငံတိုင်းမှာ ပိတ်နိုင်တာမဟုတ်ဘူး။ ဒါကြောင့် အပျော်သဘော ကစားတာတွေကို ကြီးလေးတဲ့ ဥပဒေတွေနဲ့ မလုပ်ဖို့ လိုတယ်" ဟု ပြောသည်။

ရခိုင်တွင် စစ်ကောင်စီလက်ထက်က နှစ်လုံး၊ သုံးလုံးဟုခေါ်သည့် ချဲထီလောင်းကစားများကို အကြီးအကျယ် လုပ်ကိုင်ခဲ့ကြသော်လည်း ယခုလက်ရှိတွင် ကစားခွင့်မပြုတော့ဘဲ အာရက္ခပြည်သူ့တော်လှန်ရေးအစိုးရက ပိတ်ပင်ထားသည်ဟုလည်း သိရသည်။

ရခိုင်ပြည်အတွင်း အထူးသဖြင့် ကျေးလက်တောရွာများတွင် အဆိုပါလောင်းကစားမှုများကြောင့် လူမှုစီးပွားဘဝများ ပျက်စီးလျက်ရှိနေသည်ဟုလည်း ဒေသခံများက ပြောသည်။

ဓာတ်ပုံ - အာရက္ခပြည်သူ့တော်လှန်ရေးအစိုးရ၏ အာရက္ခပြည်သူ့လုံခြုံရေးနှင့် တရားဥပဒေစိုးမိုးရေးဌာနမှ ရဲဝန်ထမ်းများအား တွေ့ရစဉ်။ (Photo – APM)
---
ကျနော်တို့မီဒီယာဆက်လက်ရှင်သန်ရပ်တည်နိုင်ရေးအတွက် လူကြီးမင်းတို့ရဲ့ အားပေးမှုနဲ့ အကူအညီတွေကို အထူးလိုအပ်နေပါတယ်။ ဒီလင့် https://donorbox.org/narinjara-news ကနေတဆင့် ကူညီနိုင်ပါတယ်။ လူကြီးမင်းတို့ရဲ့ ကူညီထောက်ပံ့မှုအတွက် ကျေးဇူးအထူးတင်ပါတယ်။