သဉ္ဇာနွယ်၊ နိရဉ္စရာ၊ ဇူလိုင် ၁၁/ ၂၀၂၅

အာရက္ခတပ်တော်(AA)၏ အာရက္ခပြည်သူ့ကျန်းမာရေးဌာနမှ ပြည်သူ့ကျန်းမာရေးကြီးကြပ် (၂)သင်တန်းကို သင်တန်းသား ၁ဝဝ ခန့်ဖြင့် စတင်ဖွင့်လှစ်နေပြီဟု သတင်းရရှိသည်။

အဆိုပါသင်တန်းကို ဇူလိုင် (၃)ရက်နေ့က ပထမအသုတ်အဖြစ် စတင်ဖွင့်လှစ်ခဲ့သည်ဟု အာရက္ခပြည်သူ့ကျန်းမာရေးဌာနက ယနေ့ ဇူလိုင်လ ၁၁ ရက်၊ ညနေပိုင်းတွင် ထုတ်ပြန်သည်။

ULA/AA နှင့်နီးစပ်သူအမျိုးသားတစ်ဦးက "အခုကတော့ ပထမအသုတ်ပေါ့။ စိတ်ပါဝင်စားမှုနဲ့ ပညာအရည်အချင်းနဲ့ကိုက်ညီတဲ့သူတွေကို ခေါ်ပါတယ်" ဟု နိရဉ္စရာကို ပြောသည်။

သင်တန်းကာလမှာ ၂၀၂၅ ခုနှစ်၊ ဇူလိုင်လ ၁ ရက်မှ ၂၀၂၆ ခုနှစ်၊ ဖေဖော်ဝါရီလ ၂၈ ရက်အထိ (၈)လကြာမြင့်မည်ဟု သိရသည်။

အဆိုပါသင်တန်းတွင် အခြေခံခန္ဓာဗေဒ၊ ဇီဝကမ္မဗေဒနှင့် ဆေးဝါးဗေဒ၊ ပတ်ဝန်းကျင်ကျန်းမာရေး၊ အခြေခံရောဂါဖြစ်ပွားပြန့်နှံ့မှုကို လေ့လာသည့်ဘာသာရပ်၊ ပြည်သူ့ကျန်းမာရေး၊ အခြေခံကျန်းမာရေးစောင့်ရှောက်မှုနှင့် အခြေခံသားဖွားပညာစသည့် ဘာသာရပ်(၆)ခုကို သင်တန်းဆရာ/မ ၁၇ ဦးက တာဝန်ယူသင်ကြားပေးလျက်ရှိသည်ဟု ဆိုထားသည်။

သင်တန်းပြီးမြောက်ပါက သင်တန်းဆင်းလက်မှတ်နှင့်အတူ ပြည်သူ့ကျန်းမာရေးကြီးကြပ်(၂) အလုပ်ခန့်အပ်ခြင်းကို ကျေးလက်ကျန်းမာရေးဌာနများ၏ ဝန်ထမ်းလိုအပ်ချက်အပေါ်မူတည်ကာ ခန့်အပ်သွားမည်ဟု ထုတ်ပြန်ထားသည်။

တပြိုင်နက်တည်းတွင် အာရက္ခပြည်သူ့ကျန်းမာရုံးဌာန၏ ပြည်သူ့ကျန်းမာရေးဆိုင်ရာသင်တန်းများအစီအစဉ်က ပြည်သူ့ကျန်းမာရေးကြီးကြပ်(၂)အပြင် ပြည်သူ့ကျန်းမာရေးကြီးကြပ် (၁) စသည့် သင်တန်းများကိုပါ ထပ်မံဖွင့်လှစ်မည်ဟု ဆိုသည်။

အာရက္ခပြည်သူ့ကျန်းမာရေးဌာနတွင် လူ့အရင်းအမြစ်လိုအပ်ချက် များစွာရှိ‌သော်လည်း အာရက္ခပြည်အတွင်း တိုင်းချစ်ပြည်ချစ် ဆေးဖက်ဆိုင်ရာ ဝန်ထမ်းများအပြင် ပြည်မဖက်မှ ရောက်လာသော ပြည်သူ့စေတနာ့ဆီးဖက် ဆိုင်ရာဝန်ထမ်းများနှင့် အတူတကွပူးပေါင်း၍ တဖြည်းဖြည်းအကောင်အထည်ဖော် တည်ဆောက် လျက်ရှိသည်ဟု ထုတ်ပြန်ချက်တွင် ပါရှိသည်။

ဝန်ထမ်းများ ဆက်လက်လိုအပ်နေသည့်အတွက် အာရက္ခပြည်သူများအပေါ် စေတနာရှိသော ဆေးဖက်ဆိုင်ရာဝန်ထမ်း မည်သည့်လူမျိုးကိုမဆို အာရက္ခဒေသ၏ ပြည်သူ့ကျန်းမာရေးဌာနဆိုင်ရာ၌ တာဝန်ထမ်းရွက်လာကြရန် AA က ဖိတ်ခေါ်ထားသည်။

အာရက္ခပြည်အတွင်း ကျန်းမာရေးဝန်ထမ်းများ မလုံ‌လောက်သဖြင့် ကျန်းမာရေးဝန်ထမ်းကြီးကြပ်(၂)သင်တန်းသားများကို ဗီတာ(၁)စစ်ဒေသတွင် ဧပြီ ၂၅ ရက် ရက်စွဲဖြင့် တရားဝင် စာထုတ်ကာ လျှောက်လွှာခေါ်ယူခဲ့ခြင်းဖြစ်သည်။

ရခိုင်တွင် မြို့နယ်ပေါင်း ၁၄ မြို့နယ်ကို ထိန်းချုပ်ထားနိုင်သည့် အာရက္ခပြည်သူ့တော်လှန်ရေးအစိုးရသည် လက်ရှိတွင် အာရက္ခပြည်၏ လွတ်မြောက်နယ်မြေများအတွင်း ကျန်းမာရေးအပြင် အုပ်ချုပ်ရေး၊ တရားစီရင်ရေးနှင့် ဒေသဖွံ့ဖြိုးရေးတို့ကိုလည်း တစိုက်မတ်မတ် လုပ်ဆောင်လျက်ရှိနေပြီဖြစ်သည်။

ဓာတ်ပုံ - အာရက္ခပြည်သူ့ကျန်းမာရေးဌာန
---
ကျနော်တို့မီဒီယာဆက်လက်ရှင်သန်ရပ်တည်နိုင်ရေးအတွက် လူကြီးမင်းတို့ရဲ့ အားပေးမှုနဲ့ အကူအညီတွေကို အထူးလိုအပ်နေပါတယ်။ ဒီလင့် https://donorbox.org/narinjara-news ကနေတဆင့် ကူညီနိုင်ပါတယ်။ လူကြီးမင်းတို့ရဲ့ ကူညီထောက်ပံ့မှုအတွက် ကျေးဇူးအထူးတင်ပါတယ်။