‎ကြိုင်ဟိန်းလင်း၊ နိရဉ္စရာ၊ ဇူလိုင် ၂၆/ ၂၀၂၅
‎
‎ရခိုင်ပြည်၊ မောင်တောမြို့နယ်တွင် မိုင်းပေါက်ကွဲမှု ဖြစ်ပွားခဲ့သည့်အတွက် နွားတစ်ကောင်ဒဏ်ရာရရှိသွားကြောင်း သိရသည်။
‎
‎မောင်တောမြို့နယ်၊ အောင်ဗလကျေးရွာနှင့် ရွှေဇားကျေးရွာတို့အကြားတွင် ဇူလိုင်လ ၂၃ ရက်၊ နေ့လယ်က နွားအုပ်တစ်အုပ်သည် အဆိုပါနေရာအနီးရှိ မွတ်ဆလင်လူမျိုးပိုင် ခြံတစ်ခုသို့ ဝင်ရောက်ပြီး အစာစားနေကြချိန် မိုင်းပေါက်ကွဲမှုဖြစ်ပွားခဲ့‌ခြင်းဖြစ်သည်ဟု ဒေသခံတစ်ဦးက ပြောသည်။
‎
‎"အောင်ဗလရပ်ကွက်ဆိုင်းဘုတ်နားက မွတ်ဆလင်အိမ်တစ်ဆောင်ကနေ ပေါက်တာပါ။ အဲမှာ လူတော့ မနေဘူး။ နွားတစ်အုပ်‌တော့ အဲနားမှာရှိတယ်။ မိုင်းနင်းမိတဲ့ နွားတစ်ကောင်မှာ လက်တစ်ချောင်းပြတ်ထွက်သွားတယ်။ မိုင်းက တော်တော်ကြီးတယ်လို့ထင်တယ်။ အသံလည်း တအားကျယ်တယ်" ဟု ပြောသည်။
‎
‎ရခိုင်ပြည်၏ အနောက်ဘက်နယ်စပ်မြို့ဖြစ်သော မောင်တောမြို့နယ်တွင် စစ်ကောင်စီသည် ၎င်းတို့တပ်စခန်းများအပြင် လမ်းမများနှင့် လူနေအိမ်ခြံများတွင်လည်း ထောင်နှင့်ချီသော မိုင်းများကို ထောင်ထားခဲ့သည်ဟု ဒေသခံများက ပြောသည်။
‎
ပြီးခဲ့သည့် မတ်လ ၁၄ ရက်၊ နေ့လယ်ပိုင်းကလည်း မောင်တောမြို့နယ်၊ ရွှေဇားမွတ်ဆလင်‌ကျေးရွာဖက်သို့ ငါးသွားရှာသည့် လသာကျေးရွာမှ အသက် ၄၄ နှစ်အရွယ် ဦးအဒူဟာလေ့ခ်သည် မိုင်းနင်းမိပြီး ညာဖက်ခြေချင်းဝတ် ပြတ်ထွက်သွားခဲ့ရသည်ဟု သိရသည်။
‎
‎‎ပြီးခဲ့သည့် မတ်လ ၁၃ ရက်ကလည်း မောင်တောမြို့နယ်၊ ရွှေဇားအနောက်မွတ်ဆလင်ရွာမှ လူငယ်ခုနစ်ဦးသည် ငါးသွားရှာကြစဉ် အသက် ၁၈ နှစ်အရွယ် ဒေသခံမွတ်ဆလင်လူငယ်တစ်ဦး မိုင်းနင်းမိပြီး ဘယ်ဖက်ခြေတစ်ဖက် ပြတ်ထွက်သွားခဲ့ရသလို မိုင်းစထိမှန်ပြီး ဘယ်ဖက်မျက်လုံးပါ ကွယ်သွားခဲ့ရသည်
‎
‎ထို့အပြင် မောင်တောမြို့နယ်၊ ရွှေဇားဂုံးနားမွတ်ဆလင်ရွာမှ အသက် ၂၂ နှစ်အရွယ် ကိုဖေရုစ်ခါန်သည် ဖေဖော်ဝါရီလ ၁ဝ ရက်က စစ်ကျန်ဗုံးသီးတစ်လုံးအား ထုကစားစဉ် ပေါက်ကွဲမှုဖြစ်၍ သေဆုံးသွားခဲ့သည်။
‎
‎အာရက္ခတပ်တော် (AA)သည် ၂၀၂၄ ခုနှစ်၊ ဒီဇင်ဘာလ (၆)ရက်နေ့တွင် စစ်ကောင်စီလက်ထဲမှ မောင်တောမြို့အား အလုံးစုံသိမ်းပိုက်ပြီးနောက် ဒေသခံများ နေရပ်ပြန်နိုင်ရန် မိုင်းရှင်းလင်းရေး လုပ်ငန်းများကို စတင် လုပ်ဆောင်ခဲ့သည်။
‎
‎ထိုကဲ့သို့ မိုင်းရှင်းလင်းရေးလုပ်ရာတွင် မောင်တောမြို့အတွင်း စစ်ကောင်စီတပ်၏ နောက်ဆုံးခံတပ်ဖြစ်ခဲ့သော နခခ (၅)အနီး လမ်းမတစ်လျှောက်တွင် မိုင်းအလုံးရေ (၁၀၀) ကျော်ရှင်းလင်းနိုင်ခဲ့ပြီး မောင်တောမြို့နယ်အတွင်း စစ်ကောင်စီတပ်ထောင်ထားခဲ့သည့် တိုက်မိုင်း၊ နင်းမိုင်း၊ ရှော့တိုက်မိုင်းအပါအဝင် မြေမြှုပ်မိုင်းအလုံး (၁၀၀၀) ကျော်ကို ဖေဖော်ဝါရီလအတွင်းက ရှင်းလင်းနိုင်ခဲ့ကြောင်း သိရှိရသည်။

ဓာတ်ပုံ - မိုင်းနင်းမိ၍ ခြေထောက်ပြတ်ထွက်သွားသည့် နွားအား တွေ့ရစဉ်။ (ပေးပို့)
---
ကျနော်တို့မီဒီယာဆက်လက်ရှင်သန်ရပ်တည်နိုင်ရေးအတွက် လူကြီးမင်းတို့ရဲ့ အားပေးမှုနဲ့ အကူအညီတွေကို အထူးလိုအပ်နေပါတယ်။ ဒီလင့် https://donorbox.org/narinjara-news ကနေတဆင့် ကူညီနိုင်ပါတယ်။ လူကြီးမင်းတို့ရဲ့ ကူညီထောက်ပံ့မှုအတွက် ကျေးဇူးအထူးတင်ပါတယ်။