နိရဉ္စရာ၊ ဇူလိုင် ၂၈/၂၀၂၅

ရခိုင်ပြည်၊ ကျောက်ဖြူမြို့နယ်ရှိ တရုတ်စက်ရုံ OGT အတွင်း ဝင်ရောက်တပ်စွဲပြီးနေရာယူထားသည့် စစ်ကောင်စီတပ်သားများ မူးယစ်ရမ်းကားသဖြင့်တရုတ်ဝန်ထမ်းများ ဝင်ရောက်ဟန့်တားရာမှ အချေအတင်စကားများမှုဖြစ်ပွားခဲ့ကြသည်ဟုသတင်းရရှိသည်။

ဝန်ထမ်းနှင့်နီးစပ်သူအမျိုးသားတစ်ဦးက " OGTခြံဝင်းမှာစစ်သားတွေနေတယ်။ တိုက်ပွဲဖြစ်ရင်လည်း အဲ့ဒီစက်ရုံထဲကို ထွက်ပြေးတယ်။အကာအကွယ်ယူတာလေ။ စစ်ကြောင်းထိုးရင်လည်း အဲ့ဒီနားကပြန်ထိုးတယ်။ အဲ့ဒါနဲ့ဒီရက်ပိုင်းအတွင်း စစ်ကောင်စီဖက်က သောက်စားမူးယစ်ရမ်းကားနေတော့စက်ရုံဝန်ထမ်းတွေကဟန့်တယ်။ အဲ့ဒါနဲ့စကားများရန်ဖြစ်ကြရော။ အဲ့ဒါနဲ့တရုတ်ဝန်ထမ်း၊မြန်မာဝန်ထမ်းရော ရန်ဖြစ်တဲ့စစ်သားတွေကိုရော စစ်ကောင်စီအရာရှိကဖမ်းတယ်။ ဒါပေမယ့် တရုတ်လူမျိုးက သူ့ဝန်ထမ်းကိုငါဟန့်ခိုင်းတာဆိုပြီး ပြန်ခေါ်သွားတယ်။ ဟိုဖက်ကဘာမှမပြောရဲဘူး" ဟုနိရဉ္စရာ ကိုပြောသည်။

 ကျောက်ဖြူမြို့နယ်၊ဂုံးချွိန်တိုက်နယ်အတွင်းက တရုတ်ပိုင် ကုန်းတွင်းသဘာဝဓါတ်ငွေ့လက်ခံသိုလှောင်ပို့ဆောင်ရုံ (OGT)ခြံဝန်းတွင် ဝင်ရောက်နေရာယူထားသည့်စစ်ကောင်စီတပ်သားများသည်အရက်သေစာ သောက်စားမူးယစ်ရမ်းကားမှုများမကြာခဏ ပြုလုပ်နေသဖြင့် ယခုလို စကားများကြခြင်း ဖြစ်သည်ဟု ဆိုသည်။

OGT တည်ရှိသည့်စက်ရုံအပါအဝင် မလကျွန်းဧရိယာအနီးတစ်ဝိုက်တွင် တပ်မစွဲရန်တရုတ်တာဝန်ရှိသူများက စစ်ကောင်စီအရာရှိအကြီးပိုင်းများအား ဆက်သွယ်ကာ မှာကြားထားသည်ဟုလည်းသတင်းများထွက်ပေါ်နေကြောင်း  စစ်ကောင်စီနှင့်နီးစပ်သူတစ်ဦးက နိရဉ္စရာ ကိုပြောသည်။

" လွန်ခဲ့တဲ့လပိုင်းတုန်းကလည်း တခါ စစ်ကောင်စီအကြီးပိုင်းတွေကိုခေါ်ပြီးစက်ရုံဝင်းထဲနဲ့  စက်ရုံနားက ကွင်းထဲမှာမနေကြဖို့ပြောထားတာရှိတယ်။ ဒီကိစ္စတွေဟာ ငါ့တို့စက်ရုံတွေနဲ့မဆိုင်ဘူးဘာညာပေါ့။ ဖုန်းနဲ့သတိပေးတာလည်းရှိတယ်။ ဒီလလည်းအဲ့ဒီလိုပြောထားတယ်။ဒါပေမယ့် စစ်သားတွေက စက်ရုံကို အကာအကွယ်ယူနေကြတယ်" ဟု ပြောသည်။

တရုတ်ဖက်မှသူတို့၏ လုပ်ငန်းခွင်၊ စက်ရုံများကို လက်နက်ကြီးကျည်ကျရောက်မည်စိုးရိမ်သဖြင့် ဟန့်တားရခြင်းဖြစ်နိုင်သည်ဟု နိရဉ္စရာကိုပြောသည်။

" စစ်သားတွေက နေရာလည်းယူတယ်။ အဲ့ဒီကနေ AA ရှိတဲ့ဖက်ကိုလက်နက်ကြီးတွေနဲ့လှမ်းပစ်တယ်။ဟိုက ပြန်ပစ်ရင် ထိနိုင်တယ်လေ။ သူတို့ကလည်း တရုတ်စက်ရုံကိုအကာအကွယ်ယူပြီးပစ်နေကြတာ။ ဒါကို တရုတ်ဖက်က စက်ရုံထိနိုင်လို့အခုလိုဟန့်တားတာဖြစ်နိုင်တယ်" ဟုပြောသည်။

ယင်းအပြင် ယခင်ကလည်းအဆိုပါ စက်ရုံမှ တရုတ်စကားပြန်များ၊ ဒေသခံဝန်ထမ်းများကိုလည်း(AA)နှင့်ဆက်စပ်နေသည်ဟု စစ်ကောင်စီဖက် သံသယဖြင့် ပြောဆိုမှုများရှိခဲ့ကြောင်း ဒေသခံများကပြောသည်။

ဝန်ထမ်းနှင့်နီးစပ်သည့်ဒေသခံအမျိုးသားတစ်ဦးက " ဝန်ထမ်းတွေထဲမှာ ကျောက်ဖြူဒေသခံတွေလည်းရှိတယ်။ တရုတ်စကားပြန်တွေလည်းရှိတယ်။သူတို့က မြို့ကိုသွားပြီးလိုအပ်တာတွေသွားဝယ်တာမျိုးရှိတယ်။ အဲ့ဒါကို စစ်ကောင်စီဖက်က စောင့်ကြည့်ပြီးအေအေနဲ့ဆက်စပ်နိုင်တယ်။အေအေနဲ့တွေ့နိုင်တယ်ဆိုပြီး သံသယထားပြီး လျှောက်ပြောစွပ်စွဲတာတွေရှိတယ်" ဟု ပြောသည်။

ကျောက်ဖြူတွင်ဖြစ်ပွားနေသည့် တိုက်ပွဲတွင် OGT အပါအဝင် တရုတ်စီမံကိန်းများအနီးတွင်တိုက်ပွဲ မဖော်ဆောင်ရန် AA အား ပြောကြားထားပြီး တစ်ခြားတစ်ဘက်တွင်စစ်ကောင်စီအား ခေတ်မီ ဒရုန်းများသာမက နည်းပညာပိုင်းပါ ကူညီပေးနေသလို  စစ်လက်နက်ပစ္စည်းများကိုလည်း ထောက်ပံ့ပေးနေသည်ဟုသတင်းများထွက်ပေါ်နေသည်ဟု  အနီးကပ်စောင့်ကြည့်နေသူများက ပြောသည်။

ကျောက်ဖြူမှ စစ်ကောင်စီတပ်သားများသည် (AA)ကို တိုက်ခိုက်နိုင် အောင် မူးယစ်ဆေးဝါးများသုံးစွဲမှုကိုလည်း ပေါ်ပေါ်ထင်ထင်ပြုလုပ်လျက်ရှိကြောင်း သိရသည်။

ကျောက်ဖြူသည် ယူနန်ပြည်နယ်ကို သဘာဝဓာတ်ငွေ့ပို့သည့်  တရုတ်-မြန်မာပိုက်လိုင်း စတင်သည့် နေရာဖြစ်သဖြင့် တရုတ်အတွက်အရေးပါသည့်စီမံကိန်းတစ်ခုလည်းဖြစ်သည်။

လက်ရှိရရှိသော သတင်းများအရ  စစ်ကောင်စီဖက်မှ မလကျွန်း OGT စက်ရုံအနီးမှ ဒရုန်းများ၊လက်နက်ကြီးများဖြင့် AAရှိနိုင်သည့် နေရာများအားပစ်ခတ်တိုက်ခိုက်နေကြောင်း သိရသည်။

(OGT)စက်ရုံသည် (AA)နှင့်စစ်ကောင်စီတို့ တိုက်ပွဲများ  ပြင်းပြင်းထန်ထန်မကြာခဏဖြစ်ပွားနေသည့် ပြိုင်စေကေ့ရွာနှင့် (၂)မိုင်ခန့်သာကွာဝေးကြောင်းသိရသည်။