နိရဉ္စရာ၊ ဩဂုတ် ၁/၂၀၂၅

ရခိုင်ပြည်၊ဂွမြို့နယ်တွင်လက်လုပ်လက်စား ဒေသခံများ အလုပ်အကိုင်ရှားပါးကာ ဒေသထွက်သီးနှံများလည်းရောင်းမစွံသဖြင့် ဝင်ငွေမရှိ၍ထမင်းလျော့စားနေရသည့် အနေအထားရောက်ရှိနေကြကြောင်းဂွမြို့ဒေသခံများကနိရဉ္စရာသတင်းဌာနသို့ ပြောသည်။

ဂွမြို့နယ်ကိုလက်ရှိ အာရက္ခတပ်တော်ကထိန်းချုပ်ထားပြီးလက်ရှိတွင် ပြန်လည် ထူထောင်ရေး လုပ်ငန်းများကိုလည်း ထိရောက်စွာ မလုပ်နိုင်သေးဟု သိရသည်။

 ဒေသခံများမှာအလုပ်အကိုင်ရှားပါးပြီး ဝင်ငွေမရှိမှု၊  ထွက်လာသော သီးနှံများကို ရောင်းရန် စျေးကွက်မရှိ၍ ဝင်ငွေမရှိမှုစသည်တို့ကြောင့်  စားဝတ်နေရေးအလွန်ကျပ်တည်းနေကြ‌ကြောင်း ဂွဒေသခံအမျိုးသမီးတစ်ဦးက နိရဉ္စရာ ကိုပြောသည်။

" အရင်ကဆိုရင် ‌ရာသီပေါ်အစားအစာ မျှစ်တွေ၊မှိုတွေ၊အသီးအရွက်တွေရောင်းတာ ဈေးလည်းရတယ်။ ဝယ်သူလည်းရှိတယ်။ အခုမျှစ်တပိဿာ ပိုက်ဆံ ၈၀၀ နဲ့ရောင်းမစွံဘူး။ဝယ်မယ့်လူလည်း မရှိ။ အကုန်လုံးကလက်လုပ်လက်စားတွေ။ရှာစားတဲ့သူများတယ်။ မိသားစုများရင် ဆန် ၅ဗူးချက်ရင် ၃ဗူးချက်စားရတယ်။ တခါတလေ ညနေဖက်ဆန်ပြုတ်ကြိုသောက်ရတဲ့အနေအထားရှိတယ်" ဟု ပြောသည်။

ဂွဒေသခံအများစုမှာလယ်သမားများဖြစ်ကြပြီး စစ်ရှောင်စဉ်က မိမိအိမ်တွင်ကျန်ခဲ့သည့် အိမ်သုံး၊လယ်ယာသုံး၊ကျွဲနွားများပါ ခိုးယူခြင်းခံရ၍ အိမ်ပြန်လာသည့်အချိန်တွင် လုပ်ကိုင်စားသောက်စရာမရှိသည့် ဘဝအခြေအနေသို့ရောက်ရှိနေကြရသည်ဟု ဂွဒေသခံအမျိုးသားတစ်ဦးက နိရဉ္စရာ ကိုပြောသည်။

" ကိုယ့်အိမ်မှာတော့နေရပါတယ်။ ဒါပေမယ့်အလုပ်မှမရှိတာ။ ရှိသမျှဟာတွေလည်းကုန်ပြီ။ခိုးတာကခိုးပျောက်တာကပျောက်။  နွားတွေလည်းပျောက်။လက်ဝတ်လက်စားတွေဆိုလည်း ရောင်းစားလို့ကုန်ပြီ။ ဆင်းရဲသားတွေပဲ ကိုယ့်အိမ်မှာနေပြီးလုပ်စားကြတာ။အခုက ဘာအလုပ်မှ မရှိကြတော့ဘူး " ဟုပြောသည်။

ဂွမြို့တွင်လည်းအများစုပြည်သူများမှာ အခြေခံ လက်လုပ်လက်စားဖြစ်ကြပြီး ပြည်မဖက်သို့လမ်းပန်းဆက်သွယ်ရေးပိတ်ထားသဖြင့် ကုန်ရောင်း၊ကုန်ဝယ်မပြုနိုင်သည့် အပြင်  ငွေကြေးတတ်နိုင်သူများမရှိ၍ ဈေးရောင်းရာတွင်လည်း ခက်ခဲကာ စားဝတ်နေရေးပို၍ကျပ်တည်းလာခြင်း ဖြစ်သူဟု ဂွမြို့ခံအမျိုးသားတစ်ဦးက နိရဉ္စရာကိုပြောသည်။

" အရင်ကကုန်စည်လည်ပတ်တယ်ပေါ့။ပိုက်ဆံတတ်နိုင်တဲ့သူတွေမြို့ကလူတွေက ပြည်မဖက်ကကုန် ကိုယူပြီးရောင်း။ရွာကလူတွေက ဒေသထွက်သားငါးတွေအသီးအနှံတွေ မြို့ကိုလာရောင်းနဲ့ လည်ပတ်တယ်လေ။အကုန်စွံတယ်။ထမင်းနပ်မှန်အောင်စားနိုင်တယ်။ အခုကရောင်းသူရှိပြီးဝယ်သူမရှိလို့ ပိုပြီးကျပ်တည်းတာ။ ဘာလို့ဆို ဂွကရွာခံတွေက တရွာလုံးနီးပါးမျှစ်ဆိုရင်မျှစ်ချိုးတဲ့အလုပ်၊ သီးနှံစိုက်ရင်စိုက်တဲ့အလုပ် လုပ်ကြတယ်။ ရွာတွေမှာဘဲ လည်ပတ်နေပြီး အသီးအနှံတွေအရွက်တွေပေါတော့ ဈေးမရ။မြို့ပေါ်လည်းမရောင်းရ။သူဌေးနဲ့အလတ်တန်းစားတွေဆို အကုန်နီးပါး ပြည်မဖက်မှာ" ဟု ပြောသည်။

ဂွဒေသခံ အခြေခံလူတန်းစားများမှာပင်လယ်ကမ်းနား၊မြစ်ချောင်းကမ်းစပ်နားများကိုအမှီပြု၍ လုပ်ကိုင်စားသောက်သည့် ရေလုပ်သားများရှိသလို တော၊တောင်ကိုမှီ၍ ဥယျာဉ်သီးနှံစိုက်ပျိုးခြင်း၊ လယ်ယာခင်းစိုက်ပျိုးကြသူများလည်း  ရှိကြောင်း ဒေသခံများက ပြောသည်။

ဂွမြို့ကို အာရက္ခတပ်တော် (AA) က ဒီဇင်ဘာလ ၂၈ ရက်နေ့က သိမ်းပိုက်ထိန်းချုပ်နိုင်ခဲ့ပြီးနောက် ပြန်လည်ထူထောင်ရေးလုပ်ငန်းများကို အင်တိုက်အားတိုက် လုပ်ဆောင်ရန် လိုနေသည်ဟု သိရသည်။ 

ရခိုင် တောင်ဘက်အစွန်ဆုံးမှ ဂွမြို့နယ်သည် လက်ရှိတွင် ဧရာဝတီတိုင်းနှင့် ဆက်သွယ်မှု ပြတ်တောက်သွားနေသဖြင့် စီးပွားရေးအရ အခက်အခဲရှိနေကြသည်ဟု သိရသည်။

ဂွမြို့နယ်တွင်ပြီးခဲ့သည့် ၂၀၂၂ခုနှစ်အထိ အစိုးရ၏စာရင်းအရလူဦးရေ၈၂၅၇၂ဦးရှိပြီးမြို့ပေါ်ရပ်ကွက် ၆ ခု၊ ကျေးရွာအုပ်စု ၃၃ စုနှင့် ကျေးရွာပေါင်း ၁၅၉ ရွာ ရှိကြောင်း သိရသည်။

ပုံစာ- ၂၀၂၁ ခုနှစ် စစ်ကောင်စီအာဏာသိမ်းမှုအပေါ် ကန့်ကွက်နေကြသည့် ဂွဒေသခံပြည်သူများ