သောကြာ၊ မတ်လ ၂၉ရက်၊ ၂၀၂၄

ကမ္ဘာ့ဖလားအုပ်စုအဖွင့်ပွဲစဉ်မှာ အိပ်မက်ဆိုး မက်ခဲ့ရတဲ့ အိမ်ရှင် ကာတာ ..။


  • ရေးသူ: Web Master
  • | ရက်စွဲ: ၂၁ နိုဝင်ဘာ ၂၀၂၂
  • | ကြည့်ရှုသူ: 9.6k

နိရဉ္စရာ၊ နိုဝင်ဘာ ၂၁/ ၂၀၂၂ ( ကမ္ဘာဖလားအဖွင့်ပွဲသုံးသပ်ချက်/ CWM)

 ၂၀၂၂ ကမ္ဘာ့ဖလားအိမ်ရှင် ကာတာရဲ့ အုပ်စုအဖွင့်ပွဲစဉ်ကတော့ မလှမပနဲ့ ပြီးဆုံးခဲ့ပြီဖြစ်လို့ ကာတာတွေမက်ခဲ့တဲ့ ကမ္ဘာ့ဖလားအိပ်မက်ကတော့ အိပ်မက်ဆိုးကြီးဖြစ်ခဲ့ရပါပြီ။

ပထမပိုင်း မိနစ် (၃၀) အတွင်း တောင်အမေရိက အီကွေဒေါအသင်းရဲ့ ဦးဆောင် ဂိုး နှစ်ဂိုးအောက်မှာ အိမ်ရှင်အသင်းဟာ ရုပ်ပျက်ဆင်းပျက် ဖြစ်ခဲ့ရပါတယ်။

ဒီအုပ်စုပွဲ မစခင်ကတော့ အိမ်ရှင် ကာတာ နဲ့ ပတ်သက်ပြီး ထင်ကြေးအမျိုးမျိုး ပေးခဲ့ကြတယ်။ ကမ္ဘာ့ဖလားပြိုင်ပွဲသမိုင်းမှာ အိမ်ရှင်တွေ အဖွင့်ပွဲစဉ် မရှုံးနိမ့်ဖူးတာ၊ ၂၀၁၀ တောင်အာဖရိက ကမ္ဘာ့ဖလားတုန်းက တောင်အာဖရိကအသင်း အုပ်စုအဆင့်က မကျော်ခဲ့တာကလွဲရင် ကျန်ပြိုင်ပွဲတွေမှာ အနည်းဆုံး နောက်တစ်ဆင့် တက်ထားဖူးတဲ့ အစဉ်အလာတွေရှိတာမို့ ဒီပွဲ ကာတာ မရှုံးလောက်ဘူး၊ အနည်းဆုံး သရေကျနိုင်မယ်လို့ အများသူငါ ခန့်မှန်းခဲ့ကြတယ

ပြီးတော့ ကာတာဟာ ဒီကမ္ဘာ့ဖလားပွဲစဉ်အတွက် လက်ရွေးစင်အသင်းကို (၆)လကြာ သီးခြား စခန်းသွင်းလေ့ကျင့်စေခဲ့ပြီး စနစ်တကျ ပြင်ဆင်ထားတာရယ်၊ ၂၀၁၉ ခုနှစ်က အာရှဖလားချန်ပီယံ ဖြစ်ဖူးတာရယ်ကြောင့်လည်း ကာတာကို လျှော့မတွက်ရဲခဲ့ကြဘူး။တကယ်ပြန်သုံးသပ်ကြည့်လိုက်တော့လည်း အခု ခြေစစ်ပွဲအောင်လာတဲ့ (၃၂)သင်းမှာ ခြေစစ်ပွဲကစားစရာမလိုဘဲ ကမ္ဘာ့ဖလားအဆင့်အထိ ဝင်ကစားခွင့်ရတာ ကာတာလိုအသင်းအတွက် မတန်မရာများဖြစ်နေမလား။ ကာတာရဲ့ ကမ္ဘာ့ဖလားခရီးစဉ်မှာ ခြေစမ်းပွဲတွေသာ ကစားခဲ့ရပြီး ရလဒ်တွေက ဂိုးမရှိ ရလဒ်တွေများတာမို့ အသင်းရဲ့ ခြေစွမ်းအမှန်ကို မှန်းဆရခက်နေပြန်တယ်။

ကမ္ဘာ့ဖလားအဖွင့်ပွဲစဉ်တွေမှာ အိမ်ရှင်တွေ ပရိသတ်အားနဲ့ မရှုံးတတ်ဖူးဆိုတဲ့ အတွေးက ဘောလုံးပွဲကြည့်ပရိသတ်တွေထဲမှာ ရှိနေခဲ့တယ်။ တကယ်တော့ အိမ်ရှင် ကာတာဟာ ကမ္ဘာ့ဖလား ယှဉ်ပြိုင်ဖို့ အဆင့်မမီသေးဘူးဆိုတာ ဒီအုပ်စု အဖွင့်ပွဲစဉ်ကပဲ သက်သေထူသွားခဲ့တယ်။

ခြေစွမ်းအမှန်ကို မှန်းဆလို့မရတဲ့ ကာတာအသင်းနဲ့ တောင်အမေရိကဇုန်မှာ ဘရာဇီး၊ အာဂျင်တီးနားအသင်းတွေကို သူတင်ကိုယ် သရေကစားထားတဲ အီကွေဒေါတို့ရဲ့ အဖွင့်ပွဲစဉ်ဟာ ပွဲစပြီး မိနစ်ပိုင်းအတွင်းမှာပဲ အဖြေပေါ်ပါတယ်။ ကာတာဟာ အီကွေဒေါကို တစ်ဦးချင်းရော အသင်းလိုက်ပါ ဘယ်လိုမှ မယှဉ်နိုင်တဲ့အတွက် အဖွင့်ပွဲရဲ့ ရသဟာ ပျက်သွားရတယ်။

ပွဲစပြီး စက္ကန့် ၁၆၀ မှာပဲ အီကွေဒေါရဲ့ ဝက်စ်ဟမ်းတိုက်စစ်မှူးဟောင် အင်နာ ဗလင်စီယာရဲ့ ခေါင်းတိုက်ချက်နဲ့ ဂိုးဝင်သွားခဲ့တယ်။ ဒါပေမယ့် ဒါဟာ offside လူကျွံဘောသတ်မှတ်ခံရပြီး ပယ်ဖျက်ခံလိုက်ရတယ်။ သိပ်မကြခင်မှာပဲ အီကွေဒေါက ဦးဆောင်ဂိုး ပြန်ရတယ်။ ဂိုးဧရိယာအတွင်း ကာတာဂိုးသမား အယ်လ် ရှီအက် က ဗလင်စီယာကို ဆွဲလှဲလိုက်တဲ့အတွက် ပင်နယ်တီပေးခံရပြီး ဗလင်စီယာ အသာအယာ သွင်းယူခဲ့တယ်။ ကာတာ ဂိုးသမားဟာ ပွဲစကတည်းက အီကွေဒေါတိုက်စစ်ဖိအားကြောင့် ပျာယာခတ်နေတာတောတွေ့ရတယ်။

ပထမပိုင်းမပြီးခင်မှာပဲ ဗလင်စီယာရဲ့ ဒုတိယမြောက် ခေါင်တိုက်ဂိုးနဲ့အတူ ကာတာကမ္ဘာ့ဖလားအိမ်ရှင် ပရိသတ်တွေ ငြိမ်သက်သွားခဲ့တယ်။ ပွဲအနေအထားဟာ အကြိတ်အနယ် အပြန်အလှန်မရှိဘဲ လူကြီးနဲ့ ကလေးလို တစ်ဖက်သတ်ဖြစ်နေလို့ ဒုတိယပိုင်းမှာ ပရိသတ်အတော်များများ ထပြန်သွားပြီး ပွဲအေးတစ်ပွဲဖြစ်သွားတယ်။

ဒီပွဲမတိုင်မီ ၁၂ နှစ်တာ ကြိုတင်ပြင်ဆင်လာခဲ့ပြီး စိတ်လှုပ်ရှားစရာ ကာတာကမ္ဘာ့ဖလား ဖွင့်ပွဲအခမ်းအနား ကျင်းပပါတယ်။ ဖွင့်ပွဲအခမ်းအနားနဲ့အတူ ကာတာတွေ မက်ခဲ့တဲ့ အိပ်မက်က အီကွေဒေါကို မရှုမလှ အရေးနိမ့်ပြီးနောက်မှာတော့ အိပ်မက်ဆိုးတစ်ခု အဖြစ်ပြောင်းလဲသွားခဲ့ရတယ်။ အိမ်ရှင်အသင်းဟာ ဒုတိယပိုင်းမှာလည်း အီကွေဒေါ ဂိုးပေါက်ကို လုံးဝ ခြိမ်းခြောက်နိုင်ခြင်း မရှိခဲ့ပဲ ပွဲပြီးသွားခဲ့တယ်။

ဒီပွဲရှုံးနိမ့်ခဲ့ရမှုနဲ့ပတ်သက်ပြီး ကာတာနည်းပြ ဖဲလစ်ဆန်းချက်ဇ် က အကြောင်းပြစရာ ဘာမှမရှိပါဘူး။ ကာတာအသင်းဟာ အကောင်းဆုံးအနေအထားမှာ မရှိတဲ့အတွက် ရှုံးသင့် ရှုံးထိုက်လို့ ရှုံးသွားရတာပါလို့ ပြောပါတယ်။ ကာတာဟာ ဒုတိယပွဲစဉ်အဖြစ် အာဖရိကချန်ပီယံ ဆီနီဂေါ နဲ့ ဆက်ကစားဖို့ ရှိနေတယ်။


Photo by Gulf Times

 

#cwm

 

ဆက်စပ် သတင်းများ