ဂျာမန်တွေကို ဘွန်ဒက်စ်လီဂါ ဆေးခါးကြီး ပြန်တိုက်ကျွေးလိုက်တဲ့ ဆာမူရိုင်းအပြာ ဂျပန်..။

နိရဉ္စရာ၊ နိုဝင်ဘာ ၂၄/၂၀၂၂ (ကမ္ဘာဖလား)

ဗုဒ္ဓဟူးနေ့(နိုဝင်ဘာ-၂၃) ညနေက ဒိုဟာ၊ ခါလီဖာကွင်းမှာ ဂျပန်ဆာမူရိုင်းအပြာတွေက ကမ္ဘာ့ဖလား လေးကြိမ်ရ ဘောလုံးဘိုးအေ၊ ဘောလုံးဂုရုဂျာမနီကို အံ့အားသင့်ဖွယ် အနိုင်ရရှိသွားခဲ့တယ်။

ဒီမတိုင်ခင် တစ်ရက်က အာရှဘောလုံးချာတိတ် ဆောဒီက ကမ္ဘာ့ထိပ်သီး အာဂျင်တီးနားကို အနိုင်ယူပြီးတဲ့နောက် ဂျပန်ရဲ့ ဂျာမနီနိုင်ပွဲဟာ အာရှသားတွေအတွက် ဒီနှစ် ကာတာကမ္ဘာ့ဖလား မှတ်တမ်းသစ်တွေပါ။

ဂျပန်အသင်းအတွက် ဒုတိယပိုင်းမှာ လူစားဝင်လာပြီး အနိုင်ဂိုးသွင်းခဲ့သူ နှစ်ဦးစလုံးဟာ ဂျမန် ဘွန်ဒက်စ်လီဂါကလပ် ဖရိုင်းဘတ် နဲ့ ဘိုချမ်မှာ ကစားနေတဲ့ ဂျပန်တိုက်စစ်မှူး ရစ်ဆူ ဒိုအန် နဲ့ တာကူမာ အာဆာနို တို့ပါပဲ။ သူတို့နှစ်ဦး ဟာ ဘွန်ဒက်စ်လီဂါက ရရှိခဲ့တဲ့ အတွေ့အကြုံသင်္ခန်းစာတွေနဲ့ ဂျာမနီအသင်းကြီးကို အသည်းခွဲခဲ့တာပဲဖြစ်တယ်။

ပထမပိုင်းမှာ ဂျာမနီက ဘောလုံးပိုင်မှု ၇၀%၊ ဂိုးပေါက်ကန်သွင်းမှု (၁၆)ကြိမ်နဲ့ တစ်ဖက်သတ်ဖိကစားပြီး  ၃၃မိနစ်မှာ ဂန်ဒိုဂမ်ရဲ့ ပင်နယ်တီဂိုးနဲ့ အနိုင်ရထားပေမယ့် ဆာမူရိုင်းအပြာ ဂျပန်တွေရဲ့ အနိုင်မခံ အရှုံးမပေးစိတ်ဓါတ်နဲ့ ဒုတိယပိုင်းမှာ ချေပဂိုး နဲ့ အနိုင်ဂိုးသွင်းပြီး ဂျာမန်တွေကို အသည်းခွဲတာပါ။

တကယ်တော့ လက်ရှိ ဂျပန်လက်ရွေးစင်အသင်းမှာ ဂျာမန်ဘွန်ဒက်လီဂါ မှာ ကစားနေကြတဲ့ ကစားသမား(၈)ဦးအထိ ပါဝင်ပါတယ်။ ဒုတိယကမ္ဘာစစ်အပြီး ဂျပန်ဘောလုံးဖွံ့ဖြိုးလာအောင် အများကြီးအကူအညီပေးခဲ့တာ ဂျာမနီပါ။ ဒီရှုံးပွဲဟာ ဂျမနီအတွက်တော့ကိုယ့်ဆေးခါးကြီး ကိုယ်ပြန်မြိုရသလို အဖြစ်မျိုးပါ။

ဒုတိယပ်ိုင်းတစ်ပိုင်းလုံး ဆာမူရိုင်းအပြာတွေရဲ့ ရုန်းကန်မှုအောက် ဂျမနီပြားပြားဝပ်ခဲ့ပြီး ၇၅ မိနစ်မှာ ဂျပန်မက်ဆီ လို့ တင်စားကြတဲ့ ရစ်ဆူ ဒိုအန်နဲ့ ၈၃မိနစ်မှာ တာကူမာ အဆာနိုတို့ရဲ့ ဂိုးနှစ်ဂိုးက ဂျာမန်တွေကို သင်္ခန်းစာပြန်ပေးလိုက်တဲ့ ကမ္ဘာ့ဖလားပွဲစဉ်တစ်ခုပါ။

သတင်း- CMW

ဓာတ်ပုံ- The Japan Times, CAN, Sports Holidays, India today