မေလ(၂၁)ရက်ညနေပိုင်းက အီတီဟတ်ကွင်း၌ ယှဉ်ပြိုင်ကစားသည့် အင်္ဂလိပ်ပရီးမီးယားလိဂ်ပွဲစဉ်တွင် မန်စီးတီးအသင်းသည် ချဲလ်ဆီးအား (၁-၀)ဖြင့်အနိုင်ရရှိပြီးနောက် ၂၀၂၂-၂၃ ဘောလုံးရာသီ အင်္ဂလိပ်ပရီးမီးယားလိဂ်ချန်ပီယံဖလားကို နှစ် နှစ်ဆက်တိုက် ဆွတ်ခူး၇ယူသွားပြီဖြစ်သည်။

မန်စီးတီးအသင်းသည်လက်ကျန်ပွဲစဉ်နှစ်ပွဲ ကစားရန်ရှိသေးသော်လည်း အနီးကပ်ဆုံး အမှတ်ပေးဇယားမှ အာဆင်နယ်အသင်းကို(၇)မှတ် ဖြတ်ထားလိုက်သည့်အတွက် ရာသီမကုန်မီချန်ပီယံဖလား ရရှိသွားခြင်းဖြစ်သည်။

အာဆင်နယ်သည်စနေနေ့က ဆောက်သင်ပတန် နှင့်ကစားသောပွဲ၌ (၁-၀) ဖြင့် ရှုံးနိမ့်သွားခဲ့သည်။

ယခုနှစ်ပရီးမီးယားလိဂ်ဖလား ဆွတ်ခူးနိုင်ခဲ့သည့်အတွက် မန်စီးတီးသည် နည်းပြ ဂွါဒီယိုလာ လက်ထက်ခြောက်နှစ်အတွင်း ဖလား(၅)လုံး စံချိန်တင်ဆွတ်ခူးနိုင်ခဲ့သလိုနှစ်နှစ်ဆက်တိုက် ချန်ပီယံဖြစ်လာခဲ့သည်။

တနင်္ဂနွေနေ့ကချဲလ်ဆီးနှင့် ကစားသောပွဲတွင် ဂွါဒီယိုလာသည် အဓိက ကစားသမားအများအပြားကိုအနားပေးထားခဲ့သည်။

ပွဲအစ၁၂ မိနစ်မှာပင် မန်စီးတီးတိုက်စစ်မှူးအယ်လ်ဗာရက်စ်က အဖွင့်ဂိုးသွင်း ဦးဆောင်ခဲ့သည်။

မန်စီးတီးပရိသတ်များမျှော်လင့်နေသော တိုက်စစ်မှူး ဟာလန်းကို ပွဲပြီးရန် မိနစ်၂၀ အလိုကျမှ ထည့်သွင်းခဲ့သည်။ ဟာလန်းသည် ယခုရာသီတွင် စုစုပေါင်း ၅၃ ဂိုးသွင်းထားပြီး အကောင်းဆုံး ခြေစွမ်းပြသနေသည်။

 “ကစားသမားတွေနားဖို့ လိုပါတယ်။ ပွဲက မပြီးသေးပါဘူး။ နောက်ထပ် အဓိက ပြိုင်ပွဲကြီးနှစ်ခု ရှိပါသေးတယ်။ ခါးသည်းတဲ့ ပြိုင်ဘက်ဖြစ်တဲ့ မန်ယူ နဲ့ အက်အေဖလားဗိုလ်လုပွဲကစားပြီးရင် ချန်ပီယံလိဂ်ဖလား ဗိုလ်လုပွဲကစား၇ပါဦးမယ်” ဟုအသင်းခေါင်းဆောင် ဝေါ်လ်ကာ ကဆိုသည်။

မန်စီးတီးအသင်းသည်ယခုရာသီတွင် ဖလား(၃)လုံး ဆွတ်ခူးနိုင်သည့် လမ်းကြောင်းပေါ်တွင်ရောက်ရှိနေသည်။

ချဲလ်ဆီးအားအနိုင်ရပြီးနောက် ချန်ပီယံဆုဖလားပေးအပ်ပွဲကို ကျင်းပခဲ့ရာ အီတီဟတ်ကွင်းတွင်မန်စီးတီးအသင်းသားများနှင့် ပရိသတ်များ အောင်ပွဲခံခဲ့ကြသည်။

NN-27

Ref: Bkpost