ဖီဖာ ယူ-၂၀ ကမ္ဘာ့ဖလားဘောလုံးပြိုင်ပွဲများ ကျင်းပ

( အင်္ဂလန်၊ အာဂျင်တီးနား၊ အမေရိကန်၊ ကိုလံဘီယာတို့ နိုင်ပွဲဆက်နေ)

အာဂျင်တီးနားနိုင်ငံက အိမ်ရှင်အဖြစ် လက်ခံကျင်းပနေသည့် ၂၀၂၃ ခုနှစ် ဖီဖာ အသက်-၂၀ အောက် ကမ္ဘာ့ဖလားဘောလုံးပြိုင်ပွဲ အုပ်စုပွဲစဉ်များ ယှဉ်ပြိုင်ကစားလျှက်ရှိရာ အင်္ဂလန်၊ အာဂျင်တီးနား၊ အမေရိကန်၊ ကိုလံဘီယာ၊ ဂမ်ဘီယာ အသင်းများ နိုင်ပွဲဆက်နေသည်။

မေလ (၂၅)ရက်က ယှဉ်ပြိုင်သော အုပ်စု(င)ပွဲစဉ်များတွင် အင်္ဂလန် ယူ-၂၀ အသင်းက ဥရုဂွေး ယူ-၂၀ အသင်းကို (၃-၂) ဖြင့် အနိုင်ရခဲ့ပြီး တူနီးရှား ယူ-၂၀ အသင်းက အီရတ် ယူ-၂၀ အသင်းကို (၃-၀) ဖြင့်အနိုင်ရခဲ့သည်။

အုပ်စု (စ) ပွဲစဉ်များတွင် အာဖရိကအသင်း ဂမ်ဘီယာ ယူ-၂၀ က ပြင်သစ်ယူ-၂၀ ကို (၂-၁)ဖြင့် နိုင်ပြီး တောင်ကိုးရီးယား ယူ-၂၀ နှင့် ဟွန်ဒူရပ်စ် ယူ-၂၀ တို့ (၂-၂) သရေကျခဲ့သည်။

အုပ်စုပွဲစဉ်(၂)ပွဲ ကစားပြီးချိန်တွင် အင်္ဂလန်၊ အာဂျင်တီးနား၊ အမေရိကန်၊ ကိုလံဘီယာ နှင့် ဂမ်ဘီယာအသင်းများ နှစ်ပွဲစလုံး အနိုင်ရပြီး အုပ်စုအသီးသီးကို ဦးဆောင်လျှက်ရှိသည်။

ယခုနှစ် ဖီဖာ ယူ-၂၀ ကမ္ဘာ့ဖလားပြိုင်ပွဲကို ဖီဖာလက်အောက်ရှိ ကမ္ဘာ့တိုက်ကြီး (၆)တိုက်မှ ခြေစစ်ပွဲအောင် အသင်း(၂၄)သင်း ပါဝင်ယှဉ်ပြိုင်ကစားလျှက်ရှိသည်။

ဖီဖာ ယူ-၂၀ ကမ္ဘာ့ဖလားဘောလုံးပြိုင်ပွဲများကို ၁၉၇၇ ခုနှစ်က စ၍ (၂)နှစ် တစ်ကြိမ် " ဖီဖာ ကမ္ဘာ့လူငယ် ချန်ပီယံရှစ်" အမည်ဖြင့် ကျင်းပလာခဲ့ပြီး ၂၀၀၇ ခုနှစ်မှ စ၍ " ဖီဖာ ယူ-၂၀ ကမ္ဘာ့ဖလားပြိုင်ပွဲ" ဟု ခေါ်တွင်ကျင်းပလာခဲ့ခြင်းဖြစ်သည်။

ယခုနှစ် ကျင်းပသည့် ပြိုင်ပွဲမှာ (၂၃)ကြိမ်မြောက်ဖြစ်သည်။

ယခုနှစ်ပြိုင်ပွဲကို အင်ဒိုနီးရှားနိုင်ငံက အိမ်ရှင်အဖြစ် လက်ခံကျင်းပရန် မူလကရွေးချယ်ထားသော်လည်း ပြိုင်ပွဲတွင် အစ္စရေးအသင်း ပါဝင်သည်ကို အင်ဒိုနီးရှားပြည်သူများက ဆန့်ကျင်ကန့်ကွက်ကြသဖြင့် အာဂျင်တီးနားအား အိမ်ရှင်အဖြစ် ထပ်မံရွေးချယ်ခဲ့ရခြင်းဖြစ်သည်။

ပြိုင်ပွဲကို မေလ(၂၀)ရက်မှ ဇွန်လ(၁၁)ရက်အထိ ခြေစစ်ပွဲအောင် အသင်းပေါင်း(၂၄)သင်းကို တစ်အုပ်စုလျှင် (၄)သင်း ဖြင့် အုပ်စု(၆)ခွဲကာ ယှဉ်ပြိုင်ကစားလျှက်ရှိနေသည်။

ပါဝင်ယှဉ်ပြိုင်နေသော ခြေစစ်ပွဲအောင်အသင်းများမှာ အာရှဇုန်(AFC) မှ အီရတ်၊ ဂျပန်၊ တောင်ကိုးရီးယား၊ ဥဇဘက်ကစ္စတန်။ အာဖရိကဇုန်(CAF) မှ ဂမ်ဘီယာ၊ နိုက်ဂျီးရီးယား၊ ဆီနီဂေါ၊ တူနီးရှား။ မြောက်အမေရိကဇုန်(CONCACAF) မှ ဒိုမီနီကန်၊ ဂွါတီမာလာ၊ ဟွန်ဒူရပ်စ်၊ အမေရိကန်။ တောင်အမေရိကဇုန် ( CONMEBOL) မှ အာဂျင်တီးနား၊ ဘရာဇီး၊ ကိုလံဘီယာ၊ အီကွေဒေါ၊ ဥရုဂွေး။ သမုဒ္ဓရာဇုန်(OFC) မှ ဖီဂျီ၊ နယူးဇီလန် ဥရောပဇုန်( UEFA) မှ အင်္ဂလန်၊ ပြင်သစ်၊ အစ္စရေးလ်၊ အီတလီ၊ ဆလိုဗက်ကီးယား တို့ ဖြစ်သည်။

 အဆိုပါ(၂၄)သင်းကို အုပ်စု(၆)ခုခွဲထားရာ- အုပ်စု(က)တွင် အာဂျင်တီးနား၊ နယူးဇီလန်၊ ဥဇဘက်ကစ္စတန်၊ ဂွါတီမာလာ။ အုပ်စု(ခ)တွင် အမေရိကန်၊ ဆလိုဗက်ကီးယား၊ အီကွေဒေါ၊ ဖီဂျီ။ အုပ်စု(ဂ) တွင် ကိုလံဘီယာ၊ ဂျပန်၊ အစ္စရေး၊ ဆီနီဂေါ၊ အုပ်စု(ဃ)တွင် နိုက်ဂျီးရီးယား၊ ဘရာဇီး၊ အီတလီ၊ ဒိုမီနီကန် အုပ်စု(င) တွင် အင်္ဂလန်၊ ဥရုဂွေး၊ တူနီးရှား၊ အီရတ် အုပ်စု(စ) တွင် ဂမ်ဘီယာ၊ တောင်ကိုးရီးယား၊ ဟွန်ဒူရပ်စ်၊ ပြင်သစ် တို့ပါဝင်ကြသည်။