တနင်္လာ၊ ဧပြီလ ၂၂ရက်၊ ၂၀၂၄

ရခိုင်ယူနိုက်တက် ယူ- ၁၅ လူငယ်ဘောလုံးအသင်းက မြန်မာ့လက်ရွေးစင်အမျိုးသမီး ဘောလုံးအသင်းကို ၃-၀ ဖြင့် အနိုင်ရ


  • ရေးသူ: Web Master
  • | ရက်စွဲ: ၀၅ စက်တင်ဘာ ၂၀၂၃
  • | ကြည့်ရှုသူ: 969

FIFA- MFF U-15 Youth League အောက်မြန်မာပြည်(ရန်ကုန်ဇုန်)ပွဲစဥ်ပထမကျော့၏ ရာသီဝက်ချန်ပီယံ ရခိုင်ယူနိုက်တက် ယူ - ၁၅ အသင်းက မြန်မာ့လက်ရွေးစင်အမျိုးသမီးဘောလုံး အသင်းကို ၃-၀ ဖြင့်အနိုင်ရရှိခဲ့ကြောင်း သတင်းရရှိသည်။

စက်တင်ဘာလ ၅ ရက်၊ ညနေ ၄ နာရီတွင် ရန်ကုန်မြို့၊ သုဝဏ္ဏအားကစားကွင်း၌ ခြေစမ်းပွဲ ယှဥ်ပြိုင်ကစားရာ ရခိုင်ယူ -၁၅ အသင်းက ၃- ၀ ဂိုးဖြင့် ဂိုးပြတ်အနိုင်ရရှိခဲ့သည်ဟု ရခိုင်ယူနိုက်တက်ဘောလုံးအသင်း (RUFC) မန်နေဂျာ ဦးအောင်မြင့်ထွန်းက နိရဥ္စရာသို့ပြောသည်။

"ခြေစမ်းပွဲမှာ ရခိုင်ယူ - ၁၅ အသင်းက ၃-၀ နဲ့ အနိုင်ရရှိခဲ့ပါတယ်ဗျ" ဟု ပြောသည်။

ရခိုင်ယူနိုက်တက် ယူ- ၁၅ အသင်းသည် FIFA-MFF U -15 Youth League အောက်မြန်မာပြည်(ရန်ကုန်ဇုန်) ဒုတိယကျော့အတွက် ကြိုတင်ပြင်ဆင်မှုတရပ်အနေဖြင့် မြန်မာ့လက်ရွေးစင်အမျိုးသမီးဘောလုံးအသင်းနှင့် ​ခြေစမ်းပွဲကစားခဲ့ခြင်းဖြစ်ကြောင်း သိရသည်။

ထိုသို့ကစားရာတွင် မိနစ် ၃၀ စီ ပွဲချိန်သုံးပိုင်းကစားခဲ့ပြီး ရခိုင်ယူ- ၁၅ အသင်းအတွက် ဦးဆောင်ဂိုးကို ကျောနံပါတ်-(၉) ညီညီသန့်၊ ဒုတိယဂိုးကို ကျောနံပါတ်-(၁၀)စွမ်းဇာနည်နှင့် တတိယမြောက် ဂိုးကို ကျောနံပါတ်(၇) ရဲထက်အောင်တို့က အသီးသီး သွင်းယူခဲ့ကြောင်း သိရသည်။

ရခိုင်ယူနိုက်တက် ယူ - ၁၅ အသင်းသည် စက်တင်ဘာလ ၂ ရက်က ပဲခူးအသင်းနှင့် ရန်ကုန်မြို့၊ ဗဟန်းမြက်ခင်းတုကွင်းတွင် ယှဥ်ပြိုင်ကစားခဲ့ပြီး ၁-၁ ဂိုးဖြင့် သရေရလဒ်ထွက်ပေါ်ခဲ့သော်လည်း ရာသီဝက်ချန်ပီယံအဖြစ် အမှတ်ပေးဇယားထိပ်ဆုံးတွင် ရပ်တည်နိုင်ခဲ့သည်။

အဆိုပါပွဲစဥ်ပထမရာသီဝက်အတွင်း ရခိုင်ယူနိုက်တက် ယူ- ၁၅ အသင်းသည် ၁၁ ပွဲယှဥ်ပြိုင်ကစားရာ ၉ ပွဲနိုင်ပြီး နှစ်ပွဲသရေရလဒ်ဖြင့် ရာသီဝက်ချန်ပီယံအဖြစ် ရပ်တည်နိုင်ခဲ့ခြင်းဖြစ်သည်။

FIFA-MFF U-15 Youth League အောက်မြန်မာပြည်(ရန်ကုန်ဇုန်)ပွဲစဥ် ဒုတိယကျော့ကို စက်တင်ဘာလ ၁၆ ရက်တွင် ပြန်လည်စတင်ကျင်းပမည်ဖြစ်သည်။

ပွဲစဥ်ဒုတိယကျော့တွင် ရာသီဝက်ချန်ပီယံ ရခိုင်ယူ- ၁၅ အသင်းသည် အမှတ်ပေးဇယား ဒုတိယနေရာတွင်ရှိသည့် ရွှေပြည်သာအသင်းနှင့် စက်တင်ဘာလ ၁၇ ရက်တွင် ယှဥ်ပြိုင်ကစားရမည်ဖြစ်သည်။

ရွှေပြည်သာအသင်းကို ပထမရာသီဝက်တွင် ရခိုင်ယူနိုက်တက် ယူ- ၁၅ အသင်းက ၃-၁ ဂိုးဖြင့် ဂိုးပြတ်အနိုင်ရရှိထားကြောင်းလည်း သိရသည်။ (NN-23)

ဆက်စပ် သတင်းများ

ဆက်စပ်သတင်း မရှိပါ!!