တရုတ်နိုင်ငံ ဟန်ကျိုးမြို့တွင် (၁၉)ကြိမ်မြောက် အာရှအားစားပြိုင်ပွဲ ဖွင့်ပွဲအခမ်းအနား ကျင်းပ
“အာရှနိုင်ငံပေါင်း၄၅ နိုင်ငံက အားကစားသမားစုစုပေါင်း ၁၂၀၀၀၊ အားကစားနည်း ၄၀ မှာဝင်ရောက်ယှဉ်ပြိုင်မည်”
(၁၉)ကြိမ်မြောက်အာရှအားကစားပြိုင်ပွဲ ဖွင့်ပွဲအခမ်းအနားကို ပြီးခဲ့တဲ့ စနေနေ့က တရုတ်နိုင်ငံအရှေ့ပိုင်း ဟန်ကျို့မြို့မှာရှိတဲ့ ပရိသတ် ၈၀၀၀ဝဆံ့အားကစားပြိုင်ကွင်းကြီးမှာ ကျင်းပခဲ့ပါတယ်။
ဖွင့်ပွဲအခမ်းအနားကိုတရုတ်သမ္မတ ရှီကျင့်ဖျင် ကိုယ်တိုင် တက်ရောက်လာပြီး အဖွင့်မိန့်ခွန်း ပြောကြားခဲ့တယ်။
ဒီအခမ်းအနားကို နိုင်ငံတကာအိုလံပစ်ကော်မတီ ဥက္ကဋ္ဌသောမတ်ဘက်ချ် အပါအဝင် ကမ္ဘာ့နိုင်ငံအသီးသီးက ခေါင်းဆောင်တွေလည်း တက်ရောက်ခဲ့ကြတယ်။
ကိုဗစ်-၁၉ကန့်သတ်ချက်တွေကြောင့် တစ်နှစ်ကြာ နောက်ဆုတ်ပြီးမှ ကျင်းပခဲ့ရတဲ့ဒီအားကစားပြိုင်ပွဲဟာ ဆယ်စုနှစ်တစ်ခုအတွင်း တရုတ်နိုင်ငံမှာ ကျင်းပတဲ့ပြိုင်ပွဲတွေအနက် အကြီးကျယ် အခမ်းနားဆုံး အားကစားပွဲတော်တစ်ခုလို့ ဆိုပါတယ်။
အာရှနိုင်ငံပေါင်း၄၅ နိုင်ငံက အားကစားသမားစုစုပေါင်း ၁၂၀၀၀ တို့ဟာ အားကစားနည်း ၄၀ မှာဝင်ရောက် ယှဉ်ပြိုင်မယ်လို့ သိ၇တယ်။
ဝင်ရောက်ယှဉ်ပြိုင်ကြတဲ့နိုင်ငံတွေထဲမှာ အမျိုးသမီးအားကစားကို ပိတ်ပင်ထားတဲ့ အာဖဂန်နစ္စတန်နိုင်ငံပါဝင်သလို တရုတ်နဲ့ နိုင်ငံရေးအ၇ အားပြိုင်နေတဲ့ ထိုင်ဝမ်လည်း ပါဝင်တယ်။
ပြည်တွင်းစစ်ဖြစ်နေတဲ့ဆီးရီးယား နိုင်ငံလည်း ပါဝင်ပြီး သမ္မတ ဘာရှာ အယ်လ်အာဆတ်လည်းတက်ရောက် လာတာတွေ့၇တယ်။
တရုတ်ပြည်သူ့သမ္မတနိုင်ငံအလံကို လွှင့်ထူလိုက်ပြီးတဲ့နောက် ပါဝင်ယှဉ်ပြိုင်မယ့် နိုင်ငံအသီးသီးက ကွင်းထဲကိုချီတက်ဝင်ရောက်လာခဲ့ကြတယ်။ ဖွင့်ပွဲအခမ်းအနားမှာ ခေတ်မီနည်းပညာသုံးတင်ဆက်မှုတွေနဲ့အတူ ရောင်စုံ မီးရှူး မီးပန်း ပစ်ဖောက်ခြင်း နဲ့ လှပဆန်းပြားတဲ့တင်ဆက်ပုံတွေ ပါဝင်ခဲ့ပြီး ဒီဖွင့်ပွဲအခမ်းအနားဟာ စိတ်လှုပ်ရှားစရာကောင်းလှတယ်လို့ ဟန်ကျို့မြို့မှာ နေထိုင်သူတစ်ဦးက ပြောပါတယ်။
" ကျွန်တော်တို့မြို့ဘယ်လောက်လှသလဲဆိုတာ ကမ္ဘာကို ပြသနိုင်တဲ့ အခွင့်အရေးတစ်ခု ပါပဲ" လို့ သူကဆိုပါတယ်။
ဖွင့်ပွဲအခမ်းအနားကိုတရုတ်သမ္မတ ရှီကျင့်ဖျင်ကိုယ်တိုင် တက်ရောက်လာတာဖြစ်တဲ့အတွက် ဟန်ကျို့မြို့မှာလုံခြုံရေးအထူးတင်းကြပ်ထားတယ်လို့ သိ၇တယ်။
ဒီအားကစားပြိုင်ပွဲကြီးကျင်းပဖို့ သုံးစွဲခဲ့ရတဲ့ ကုန်ကျစရိတ်နဲ့ပတ်သက်ပြီး ပြိုင်ပွဲကျင်းပရေး ကော်မတီက တရားဝင်ထုတ်ပြန်ခြင်းမပြုပေမယ့် ၂၀၂၀ ပြည့်နှစ် မတိုင်မီ ငါးနှစ်အတွင်းလမ်းပန်းဆက်သွယ်ရေး၊ အားကစားရုံတည်ဆောက်ရေး နဲ့ အခြားအဆောက်အဦးအမျိုးမျိုးအတွက်ကုန်ကျစရိတ် ယွမ် ဘီလျံ (၂၀၀) ရှိတယ်လို့ ဟန်ကျို့ပြည်နယ်အစိုး၇က ပြောပါတယ်။
NN-27
ref:BKpost
လှူရန်