- Web Master
- ၀၄ မေ ၂၀၂၃
နိရဉ္စရာ၊ ဇူလိုင် ၃/ ၂၀၂၂
မြန်မာအိမ်နီးချင်း ဘင်္ဂလားဒေ့ရှ်နိုင်ငံတွင် ကိုဗစ်-၁၉ ရောဂါကြောင့် သေဆုံးသူများထပ်မံရှိလာသလို ကူးစက်ခံရသူလည်း နေ့စဉ်တစ်ထောင်ကျော်အထိ ရှိလာနေသည်ဟု ဘင်္ဂလားဒေ့ရှ်ထုတ် သတင်းများတွင် ဖော်ပြသည်။
လွန်ခဲ့သည့် စနေနေ့ နံနက် အထိ ၂၄ နာရီ အတွင်းဘင်္ဂလားဒေ့ရှ် နိုင်ငံတွင် ကိုဗစ် ၁၉ ကြောင့် သေဆုံးသူ ၆ ဦး၊ ကူးစက်မှု အသစ် ၁,၁၀၅ ဦးရှိခဲ့သည်ဟု The Daily Star က သတင်းဖော်ပြသည်။
သေဆုံးသူများတွင် အမျိုးသားသုံးဦးနှင့် အမျိုးသမီး သုံးဦး စုစုပေါင်း ၆ ဦးဖြစ်ပြီး ၎င်းတို့ထဲမှ သုံးဦးမှာ ဒက္ကားမြို့မှဖြစ်ကာ နှစ်ဦးမှာ စစ်တကောင်းနှင့် တစ်ဦးမှာ Mymensingh ခရိုင်မှ ဖြစ်ကြသည်။
ဘင်္ဂလားဒေ့ရှ်နိုင်ငံတွင် ကိုဗစ်ကြောင့် သေဆုံးသူမရှိဘဲ ရက်အတန်ကြာ ရှိခဲ့ရာမှ လတ်တလော ရက်များအတွင်း သေဆုံးမှုများ ထပ်မံပေါ်ပေါက်လာခြင်းဖြစ်သည်။
လွန်ခဲ့သော သောကြာနေ့ကလည်း ဘင်္ဂလားဒေ့ရှ်နိုင်ငံတွင် ကိုဗစ်ကြောင့် သေဆုံးသူ ၅ ဦး၊ ကူးစက်ခံရသူ ၁၈၉၇ ဦးရှိခဲ့သည်ဟု သိရသည်။
ယခုလို လတ်တလော ရောဂါဖြစ်ပွားမှုများ ပေါ်ပေါက်လာသဖြင် တစ်နိုင်ငံလုံးအနေဖြင့် စုစုပေါင်းရောဂါဖြစ်ပွားမှု ၁၉၇၆၇၈၇ ဦးရှိသွားပြီဖြစ်ကာ စုစုပေါင်းသေဆုံးသူ အရေအတွက်မှာ ၂၉၁၆၀ ဦးသို့ရောက်ရှိခဲ့ကြောင်းကျန်းမာရေးဝန်ဆောင်မှုများညွှန်ကြားမှုဦးစီးဌာန (DGHS) မှပြောကြားခဲ့သည်ဟု သတင်းတွင် ဖော်ပြထားသည်။