နိရဉ္စရာ၊ ဇူလိုင် ၆ / ၂၀၂၅

ရခိုင်ပြည် အနောက်ဘက်နယ်စပ်၊ မောင်တောမြို့နယ်တောင်ပိုင်း"ချရားတန်း " (ယခင်ခရေမြိုင်)ကျေးရွာအဝင်၀ရှိ ဆိုင်ကယ်ပြုပြင်ရေးဆိုင်ဇူလိုင် ၂ ရက် ညအချိန်က ဖောက်ထွင်းခံရပြီး ကျပ်သိန်း ၃၀ ကျော်ဖိုးပစ္စည်းများ ခိုးယူခံခဲ့ရပြီး အဆိုပါနေ့တွင်ပင်နွားကုန်သည်တစ်ဦးထံမှလည်း ငွေကျပ်သိန်း၂၀ ကျော်အလုခံခဲ့ရကြောင်း သတင်းရရှိသည်။

ဆိုင်ကယ်ပြုပြင်ရေးဆိုင်ပိုင်ရှင်ကိုသန်းစိုးက "ခိုးတဲ့သူတွေကျွန်‌တော်တို့ သိနေတယ်။ အာရက္ခတပ်တော် ထောက်လှမ်းရေးအဖွဲ့ကိုလည်း ခေါ်ယူပြသပြီးသံယဖြစ်သူတွေရဲ့ နာမည်‌ တွေနဲ့ပါတိုင်ချက်ဖွင့်ထားတယ်။ ရွာမှာလည်းထောက်လှမ်းရေးတွေရှိတယ်။ သူတို့ဖက်ကအခုထိဖော်ထုတ်ဖမ်းဆီးမပေးနိုင်‌သေးကြပါဘူး”ဟု နိရဉ္စရာကို ပြောသည်။

လက်ရှိတွင် ခိုးယူသူများဟု သံသယဖြစ်သူများအား တိုင်ကြားထားကြောင်း၊ အမြန်ဆုံး ဖော်ထုတ် အရေးယူပေးစေလိုကြောင်း ၎င်းက ပြောသည်။

“ ကျွန်တော်တို့လည်းချမ်းသာလိုလုပ်စားနေကြတာမဟုတ်ပါ။ အခုအချိန်မှာလူတိုင်း အလုပ်လုပ်မှစားဝတ်နေရေးနည်းနည်းပါးပါး ဖူလုံကြတာပါ။ဆိုင်ကယ်ပစ္စည်တွေကိုလည်းအကြွေးနဲ့ဝယ်ထားကြရတာ။သုံးဘီးကားက ဘတ္တရီအိုးတွေလည်းခိုးသွားကြတယ်။အားလုံးကိုကျွန်တော်ကအလျှော်ပေးရတော့မယ်။ဒီအမှုကို အမြန်ဆုံး ဖော်ထုတ်အရေးယူပေးစေလိုပါတယ်”ဟု ၎င်းက ဆက်လက် ပြောကြားသည်။

ချရားတန်းဝင်ဝ၌တည်ရှိသည့် အဆိုပါဆိုင်ကယ်ပြုပြင်ရေးဆိုင်ကို ပြီးခဲ့သည့် ဇူလိုင်လ ၂ ရက် ည ၈ နာရီခန့်ကဖောက်ထွင်းပြီး ဆိုင်ကယ်အပိုပစ္စည်းများ၊သုံးဘီးများမှဘတ္တရီအိုးများ၊ဆိုင်ကယ် ပြင်သည့် ကရိယာ တန်ဆာပလာများအားလုံးကို ယူဆောင်သွားသည်ဟု ဆိုသည်။

အလားတူ ဇူလိုင်လ ၂ ရက်နေ့ ည ၈ နာရီခန့်ကလည်းနွားကုန်သည်တစ်ဦးဖြစ်သည့် ကံသာယာအလယ်ရွာတွင်နေထိုင်သူ ဦးမောင်လှ(၃၆)နှစ်ထံမှငွေကျပ်သိန်း (၂၀) ကျော်ကို လူ ၄ ဦးမှ ညအချိန်တွင် လုယူသွားခဲ့သည်ဟု သိရသည်။

"ကျွန်တော်ဆိုင် ဖောက်ထွင်းအခိုးခံခဲ့ရတဲ့ညမှာဘကံသာယာအလယ်ရွာကနွားကုန်သည် ကိုမောင်လှ အိမ်ပြန်လာတဲ့အချိန်မှာချရားတန်းရွာဝင်ဝမှာငွေတွေအလုခံလိုက်ရတယ်။ လူ ၄ ဦးက သူ့ဆိုင်ကယ်ကိုတားပြီး အရက်သောက်ဖို့ ငွေ ၅ သောင်းတောင်းတယ်။ သူကဘာအတွက်ပေးရမလဲ။မပေးနိုင်ဘူးလို့ပြောတော့ သူလွယ်ထားတဲ့အိတ်ကိုအတင်းလုယူသွားတယ်။ငွေသိန်း ၂၀ ကျော်ပါသွားတယ်လိုသိရပါတယ်"ဟုပြောသည်။

မောင်တောမြို့နယ်ရှိကျေးရွာများတွင် ယခုလိုဒုစရိုက်မှုများတိုးလာသဖြင့်စိုးရိမ်စရာဖြစ်နေသလို လက်ရှိ ကျူးလွန်သူများအား ဖမ်းဆီးအရေးယူမူမပြုလုပ်‌‌နိုင်ပါက အခြေအနေမှာအနာဂတ်ကာလ၌ ပိုမိုဆိုးရွားလာနိုင်ပြီး လူသတ်မှုထိ ကျူးလွန်လာနိုင်သည်ဟု ဒေသခံများကပြောဆိုသည်။

#ကုန်သွယ်ရေး