မောင်တောတောင်ပိုင်း အင်းဒင်နှင့်ကိုးတန်ကောက်အကြား ထိတွေ့တိုက်ပွဲတွင် နယ်ခြားစောင့်တပ်ဖွဲ့ဝင် ၃ ဦးနှင့် အရပ်သားကားဒရိုင်ဘာတစ်ဦးသေဆုံးပြီး ၄ ဦးဒဏ်ရာရဟု တပ်မတော်သတင်းထုတ်ပြန်

ရေးသူ: Web Master
| ရက်စွဲ: ၂၃ ဇွန် ၂၀၂၀
| ကြည့်ရှုသူ: 969

နိရဥ္စရာ၊ ဇွန် ၂၃/၂ဝ၂ဝ

ရခိုင်ပြည်နယ်၊ မောင်တောမြို့နယ်နှင့် ရသေ့တောင်မြို့နယ် အစပ် အငူမော်-မောင်တောကားလမ်းပေါ်တွင် ယမန်နေ့ ညနေ ၅ နာရီ ၂ဝ မိနစ်က ဖြစ်ပွားခဲ့သော တိုက်ပွဲ၌ နယ်ခြားစောင့်တပ်ဖွဲ့ဝင် ၃ ဦးကျဆုံးပြီး အရပ်သား ကားဒရိုင်ဘာတစ်ဦးသေဆုံးကာ နယ်ခြားစောင့်ရဲတပ်ဖွဲ့ဝင် ၄ ဦးဒဏ်ရာရဟု တပ်မတော်မှ သတင်းထုတ်ပြန်သည်။

၎င်းတိုက်ပွဲမှာ မောင်တောမြို့နယ်တောင်ပိုင်း အင်းဒင်ရဲကင်းစခန်းမှ မော်တော်ယာဉ်များဖြင့် ထွက်ခွာလာခဲ့သော နယ်ခြားစောင့်တပ်ဖွဲ့အား ကိုးတန်ကောက်ကျေးရွာအနီးအရောက်တွင် ညနေ ၅ နာရီ ၂ဝ မိနစ်ခန့်၌ AA အဖွဲ့မှ ချောင်းမြောင်း တိုက်ခိုက်ခဲ့သဖြင့် အပြန်အလှန် ပစ်ခတ်မှု ဖြစ်ပွားခဲ့ကြောင်း ဖော်ပြသည်။

၎င်းဖြစ်စဉ်အတွင်း နယ်ခြား စောင့်ရဲတပ်ဖွဲ့ဝင် ၃ ဦး ကျဆုံးခဲ့ကာ ရဲတပ်ဖွဲ့ဝင် ၄ ဦး ဒဏ်ရာရရှိခဲ့ကြောင်း၊ ၎င်းအပြင် မော်တော်ယာဉ် လိုက်ပါမောင်နှင်း ပို့ဆောင်သည့် အရပ်သား ယာဉ်မောင်း ၁ ဦး သေဆုံးခဲ့ပြီး ယာဉ်နောက်လိုက် ၁ ဦး ဒဏ်ရာရရှိခဲ့ကြောင်း ဆက်လက် ဖော်ပြထားသည်။

တိုက်ပွဲမှာ ကိုးတန်ကောက်ကျေးရွာနှင့် အင်းဒင်ကျေးရွာ အကြား ဆားငန်ချောင်းအနီးတွင် ဖြစ်ပွားခဲ့ပြီး နယ်ခြားစောင့်တပ်ဖွဲ့မှ ကားတစ်စီး လက်နက်ကြီးကျည်ထိမှန်ကာ လမ်းဘေးသို့ ထိုးကျသွားသည်ဟု ကြားသိရကြောင်း ကိုးတန်ကောက်ဒေသခံများ အပြောအရ သိရသည်။

ရသေ့တောင်မြို့နယ် အမျိုးသားလွှတ်တော်ကိုယ်စားလှယ် ဦးခင်မောင်လတ်က တိုက်ပွဲဖြစ်ပွားရာ အနီးတွင် ကျေးရွာများ မရှိကြောင်း၊ နယ်ခြားစောင့် ကားနှစ်စီး အထိအခိုက်ရှိသည်ဟု ကြားသိရကြောင်း ယမန်နေ့က မေးမြန်းစဉ် ပြောကြားထားသည်။

၎င်းတိုက်ပွဲမှ သေနတ်ပစ်ခတ်သံများကို ညအချိန်ထိ ကြားခဲ့ရကြောင်း ဒေသခံများက ပြောသည်။