ကျောက်တော် မဟာမုနိဘုရားဓမ္မာရုံရှိ တပ်မတော်တပ်စခန်းတစ်ခုကို AA က ဝင်ရောက်စီးနင်း၊ လက်နက်တချို့ ယူဆောင်သွားဟုဆို

ချစ်အိလှိုင်

နိရဥ္စရာ၊ ဇွန် ၂၇/ ၂ဝ၂၁

ရခိုင်ပြည်နယ်၊ ကျောက်တော်မြို့နယ် မဟာမုနိဘုရားဓမ္မာရုံတွင် တပ်စခန်းချထားသည့် မြန်မာ့တပ်မတော်တပ်စခန်းတစ်ခုကို ယမန်နေ့ည ၁၂ နာရီခန့်က ရက္ခိုင့်တပ်တော်(AA)က ဝင်ရောက်စီးနင်းမှုဖြစ်ပွားကာ လက်နက်တချို့ကို သိမ်းယူသွားကြောင်း သတင်းရရှိသည်။

ကျောက်တော်မြို့မှ ဒေသခံတစ်ဦးက “ ညဉ့် ၁၂ နာရီဝန်းကျင်လောက်မှာ သူတို့နေတဲ့ဓမ္မာရုံကို ရက္ခိုင့်တပ်တော်က ဝင်ပြီးစီးတယ်။ သူတို့အားလုံးကိုလည်း ပြားပြားဝပ်ခိုင်းထားတယ်။ လက်နက်တွေကို သူတို့က သေတ္တာထဲထည့်ထားတယ်လိို့သိရတယ်။ အဲဒါတွေကို ဖွင့်ပေးဆိုပြီး လက်နက်ခဲယမ်းတွေယူသွားတယ်။ သူတို့ကို ဒီတိုင်းပြားပြားမှောက်လို့ ထားခဲ့တယ်လို့ပြောတယ်။” ဟုပြောသည်။

၄င်းနောက် ယနေ့နံနက်က ဘုရားအနီးတွင် တပ်မတော်ဘက်မှ စစ်ကား ၇ စီးခန့်တွေ့ခဲ့ရသည်ဟု ကြားသိခဲ့ကြောင်း သူက ဆက်ပြောသည်။

အဆိုပါကိစ္စနှင့် ပတ်သက်၍ ရက္ခိုင့်တပ်တော်(AA)မှ ပြောခွင့်ရရှိသူ ဦးခိုင်သုခအား ဆက်သွယ်ရာ သူက “အဲဒီမဟာမုနိဘုရားနားမှာ ဒီလူငယ်သဘာဝပေါ့နော်။ တစ်ဖက်နဲ့တစ်ဖက် ပြဿနာတွေ နည်းနည်းရှိခဲ့တာတော့ ရှိတယ်။ ဒါပေမဲ့လို့ အခုကတော့ နှစ်ဖက်ညှိနှိုင်းပြီးတော့မှ ပြေပြေလည်လည်ဖြေရှင်းလိုက်ကြပြီ။ အခုလောလောဆယ်တော့ ပြဿနာတွေ အေးအေးဆေးဆေးပါပဲ။”ဟု ပြောသည်။

ရက္ခိုင့်တပ်တော်(AA)က မြန်မာ့တပ်မတော်ဖက်မှ လက်နက်တချို့ယူဆောင်သွားသည့်ကိစ္စနှင့်ပတ်သက်၍ မေးမြန်းရာ ဦးခိုင်သုခက တစ်စုံတရာ တုံ့ပြန်ဖြေဆိုခြင်းမရှိခဲ့ပါ။

အဆိုပါကိစ္စနှင့် ပတ်သက်၍ ရခိုင်ပြည်နယ်စီမံအုပ်ချုပ်ရေးကောင်စီအဖွဲ့ဝင် ဗိုလ်မှူးကြီးကျော်သူရအား ဆက်သွယ်ခဲ့ရာ ဆက်သွယ်မှုမရရှိသေးပါ။

ယင်းနောက် အနောက်ပိုင်းတိုင်းစစ်ဌာနချုပ်မှ ပြောရေးဆိုခွင့်ရှိသူ ဗိုလ်မှူးကြီး နေထွန်းလှိုင်အား ဖုန်းဖြင့် ထပ်မံဆက်သွယ်ရာ၌လည်း ဖုန်းမကိုင်ခဲ့ပါ။