ရခိုင်တွင် ရခိုင်စာသတ်ပုံကျမ်း မူကြမ်းတစ်ခု စတင်ရေးဆွဲနေ


နောင်ခိုင်အောင်
နိရ ဉ္စရာ၊ ဩဂုတ် ၂၃ / ၂ဝ၂၁
ရခိုင်တွင် ရခိုင်စာသတ်ပုံကျမ်း မူကြမ်းတစ်ခုကို ရခိုင်စာပီဖွံ့ဖြိုးတိုးတက်ရေးဖောင်ဒေးရှင်း (ရခိုင်ပြည်နယ်)က စတင်ရေးဆွဲနေပြီဖြစ်ကြောင်း သိရသည်။
အဆိုပါ မူကြမ်းတစ်ခုကို ကျောက်တော်မြို့နယ်၊ သာယာကုန်းကျေးရွာဘုန်းတော်ကြီးကျောင်းတွင် ပြီးခဲ့သည့် ဇူလိုင်လ ၈ ရက်နေ့ကကျင်းပခဲ့သည့် ရခိုင်စာပီဖွံ့ဖြိုးတိုးတက်ရေးဖောင်ဒေးရှင်း (ရခိုင်ပြည်နယ်)၏ စတုတ္ထအကြိမ်မြောက် နှစ်ပတ်လည်အစည်းအဝေးတွင် စတင်ရေးဆွဲခဲ့ခြင်းဖြစ်သည်။
အဆိုပါမူကြမ်းကိုု အက္ခရာစဉ်အလိုက်ရေးဆွဲနေခြင်းဖြစ်ပြီး လက်ရှိတွင် "က" မှ "ည"အထိ ရေးဆွဲပြီးစီးနေပြီဟု သိရသည်။
"လူမျိုးတစ်မျိုးတွင် ဝေါဟာရအဘိဓာန်ဆိုတာရှိရတယ်။ ပြီးရင် သတ်ပုံစာအုပ်ဆိုတာရှိရတယ်။ ပြီးရင် သဒ္ဒါစာအုပ်ဆိုတာရှိရတယ်။ ပြီးရင် စွယ်စုံကျမ်းဆိုတာရှိရတယ်။ ရေးထုံးဆိုတာလည်း ရှိရတယ်။ အဲဒါတွေဟာ လူမျိုးတိုင်းမှာရှိဖို့လိုအပ်တယ်။ ရခိုင်မှာလည်း အခုလိုမျိုးရှိဖို့လိုအပ်တဲ့အတွက် ကျနော်တို့ အခုလို ရေးဆွဲနေတာပါ။"ဟု သတ်ပုံကျမ်းမူကြမ်းရေးဆွဲရာတွင်ကိုယ်တိုင်ပါဝင်သူလည်းဖြစ်၊ ရခိုင်စာပီဖွံ့ဖြိုးတိုးတက်ရေးဖောင်ဒေးရှင်း (ရခိုင်ပြည်နယ်) ဥက္ကဋ္ဌလည်းဖြစ်သူ စာရေးဆရာ မင်းပြား မင်းသိန်းဇံက ပြောသည်။
အဆိုပါ ရခိုင်စာသတ်ပုံကျမ်းမူကြမ်းကို စစ်တွေ၊ ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ မြေပုံမြို့နယ်နှင့် ပေါက်တောမြို့နယ်မြို့များမှ ရခိုင်စာပီဖွံ့ဖြိုးတိုးတက်ရေးဖောင်ဒေးရှင်း (ရခိုင်ပြည်နယ်)၏အဖွဲ့ဝင်နှစ်ဦးကျစီဖြင့် ရေးဆွဲနေကြခြင်းဖြစ်သည်။
ရခိုင်စာပီဖွံ့ဖြိုးတိုးတက်ရေးဖောင်ဒေးရှင်း (ရခိုင်ပြည်နယ်)အဖွဲ့ဝင်လည်းဖြစ်၊ ကိုယ်တိုင်ပါဝင်ရေးဆွဲနေသူလည်းဖြစ်သည့် စာရေးဆရာ အောင်ကြည်မိုး(သင်းပုန်းတန်း)က “အဓိကတော့ ဆရာတော် အသျှင် ဝါသဝ ရေးခဲ့တဲ့ ရခိုင်ဝေါဟာရ အဘိဓာန်စာအုပ်ကို အခြေခံပြီး ဝေါဟာတွေကိုဆွဲထုတ်ပြီး မူကြမ်းတစ်ခုကို ရေးဆွဲနေတာဖြစ်ပါတယ်။ မူကြမ်းထွက်လာပြီးရင် ဒေသိယစကားလုံးတွေနဲ့ ညှိနှိုင်းကြမှောဖြစ်ပါတယ် ” ဟု ပြောသည်။
အဆိုပါ ရခိုင်စာသတ်ပုံကျမ်းရေးဆွဲနေခြင်းနှင့်ပတ်သက်၍ သမိုင်းသုတေသီ စာရေးဆရာ နီမင်းသျှင်ကလည်း ဆရာတော် အသျှင် ဝါသဝ ရေးဆွဲခဲ့သည့် အဘိဓာန်တွင် ကျန်ခဲ့သည့် ပေါရာဏ စကားလုံးများကို ပြန်လည်အသုံးပြုရန်အတွက် အချုပ်အခြာအာဏာတွင် မူတည်မည်ဖြစ်ကြောင်း ပြောသည်။
“ ရခိုင်သတ်ပုံကျမ်းကတော့ ဆရာတော် ဝါသဝတို့လည်း အဘိဓာန်တွေထုတ်ခဲ့တာပေါ့။ အဲဒီမှာကိုက တချို့စကားလုံးတွေတော်တော်များများကျန်ခဲ့တာကို တွေ့ရတယ်။ အရပ်သုံးတွေထဲမှာ ပေါရာဏ၊ ဝေါရာဏတွေအထဲမှာ ပေါရာဏအပိုင်းကျန်လိုက်တယ်လို့ ပြောလို့ရတဲ့စကားလုံးတွေရှိတယ်။ ဆိုတော့ အဲဒီပေါရာဏတွေကို ပြန်သုံးဖို့ဆိုတာက လူတစ်ရာမှာ ရှစ်ဆယ်ရာခိုင်နှုန်းက အဲဒီပေါရာဏကို မသုံးတော့ဘူးဆိုတော့ ပြန်ပြီးတော့ အဲဒီအသုံးအနှုန်းတွေဆိုရင်တော့ အချုပ်အခြာအာဏာနဲ့ ဆိုင်မယ်လို့ ထင်တယ်” ဟုပြောသည်။
လက်ရှိတွင် မူကြမ်းတစ်ခုလုံးအား အပြီးသတ်ရေးဆွဲနိုင်ရန် ငွေကြေးအခက်အခဲဖြစ်နေပြီး ငွေကြေးလုံလောက်မှုရှိပါက အမြန်ဆုံးရေးဆွဲနိုင်မည်ဟုလည်း စာရေးဆရာ မင်းပြား မင်းသိန်းဇံက ပြောသည်။
“အခုမူကြမ်းရေးဆွဲနေတဲ့အထဲမှာ ပါတဲ့လူတွေကတော့ ဟိုမြို့မှာတစ်ယောက်၊ ဒီမြို့မှာတစ်ယောက်ဆိုတော့ ဒီလူတွေစုံဖို့အတွက် စရိတ်စခတွေက မရှိဘူး။ ဆိုတော့ ဟိုမှာနည်းနည်း၊ ဒီမှာနည်းနည်းစုပြီးတော့ အဆင်ပြေသလိုလုပ်နေရပါတယ်။ ကျနော်တို့မှာလည်း ရန်ပုံငွေကလည်း မပြည့်စုံဘူး။ သိန်း ၅ဝ လောက်ရလို့ရှိရင်တော့ အမြန်ဆုံးပြီးနိုင်ပါတယ်။” ဟု ပြောသည်။
ရခိုင်စာသတ်ပုံကျမ်းမူကြမ်းကိုရွေးဆွဲပြီးပါက ပြီးစီးမှုအနေအထားကို ကျောက်ဖြူနှင့် သံတွဲမြို့နယ်မှ ဒေသခံ စာရေးဆရာများနှင့်တွေ့ဆုံက ချပြသွားမည်ဖြစ်ပြီး လိုအပ်သည်များကို ပြင်ဆင်ဖြည့်စွက်အတည်ပြုသွားမည်ဟုလည်း ဆိုသည်။

Share: