အကြမ်းဖက်မှုဖြင့် တရားစွဲခံထားရသူ နောက်ထပ် ၆ ဦး ကျောက်ဖြူအကျဉ်းထောင်မှ လွတ်မြောက်၊ ယနေ့ ရခိုင်တွင်လွတ်မြောက်လာသူ ၁၆ ဦးရှိ

ချစ်အိလှိုင်

နိရဥ္စရာ၊ စက်တင်ဘာ ၉/ ၂ဝ၂၁

အကြမ်းဖက်မှုဖြင့် ဖမ်းဆီးတရားစွဲခံထားရသူ (၆) ဦး ယနေ့ ကျောက်ဖြူမြို့အကျဉ်းထောင်မှ  လွတ်မြောက် လာကြောင်း၊ ယနေ့ စက်တင်ဘာ ၉ ရက်နေ့ တစ်နေ့တည်း ရခိုင်တွင် အကြမ်းဖက်မှုဖြင့် တရားစွဲဆိုခံထားရသူ ၁၆ ဦ လွတ်မြောက်လာကြောင်း သတင်းရရှိသည်။

ယနေ့ ကျောက်ဖြူထောင်က လွတ်လာသူ ၆ ဦးမှယ အမ်းမြို့နယ်မှ ကိုဇော်ဇော်ထွန်း(ခ)ဇော်စေ့ကေ ၊ ကိုမောင်မောင်ချေ၊ ဦးမောင်သန်းထွန်း၊ မောင်ဝင်းခင်(ခ)မောင်ခင်ဝင်းနှင့်  ကျောက်ဖြူမြို့နယ်မှ  ကိုထွန်းမြင့်စိုးနှင့် ကိုအေးနိုင်တို့ ဖြစ်ကြသည်။

ကျောက်ဖြူမြို့မရဲစခန်းမှ တာဝန်ကျ ရဲအရာရှိတစ်ဦးက “ ဒီကနေ့ စက်တင်ဘာလ ၉ ရက် ညနေ ၄ နာရီခန့်မှာ သူတို့ ၆ ဦးကို တရားသေလွတ်ပေးတာပါ။ ကျောက်ဖြူက နှစ်ယောက်ကို စွဲချက်မတင်မီ လွတ်တာဖြစ်ပြီး အမ်းက လေးယောက်ကိုတော့ အပြီးသတ်လွတ်ပေးတာပါ” ဟု နိရဥ္စရာသတင်းဌာနသို့  အတည်ပြုပြောကြားသည်။

 ၄င်းတို့အထဲက ကျောက်ဖြူမြို့က ကိုထွန်းမြင့်စိုးနှင့်ကိုအေးနိုင် တို့မှာ အကြမ်းဖက်မှုတိုက်ဖျက်ရေး ဥပဒေပုဒ်မ ၅ဝ(ည)၊ ၅၂(က)တို့ဖြင့် တရားစွဲခံခဲ့ရခြင်းဖြစ်ပြီး ကျန် အမ်းမြို့နယ်က ၄ ဦးမှာ ပုဒ်မ ၅ဝ(ည) ဖြင့် တရားစွဲခံခဲ့ရခြင်းဖြစ်ကြောင်း သိရသည်။

အမ်းမြို့နယ်မှ သဘာဝပတ်ဝန်းကျင်နှင့် လူမှုရေးလှုပ်ရှားသူ ကိုမျိုးလွင်က လွတ်မြောက်လာသူများမှာ ကဏန်းပြင်အုပ်စု လောင်းချောင်းကျေးရွာသားများဖြစ်ကြောင်း၊ ယနေ့တွင် ပြန်လည် လွတ်မြောက်လာသဖြင့် နေရပ်ပြန်လာနေပြီဖြစ်ကြောင်း၊  ၄င်တို့ ၄ ဦးမှာ လွန်ခဲ့သည့် ၂ဝ၁၉ ခုနစ် နိုဝင်ဘာလအတွင်းက တပ်မတော်စစ်ကြောင်းမှ ဂဏန်းပြင် အုပ်စုသို့ဝင်ရောက်စစ်ဆေးစဉ် မသင်္ကာ၍ ဖမ်းဆီးခံခဲ့ရခြင်းဖြစ်ကြောင်း အမ်းမြို့နယ်က လူမှုရေး လှုပ်ရှားသူ ကိုမျိုးလွင်က ပြောသည်။

၄င်းအပြင် ယနေ့ နံနက်ပိုင်းက စစ်တွေအကျဉ်းထောင်အတွင်းမှ အကြမ်းဖက်ပုဒ်မ ၅၂(က)ဖြင့် တရားစွဲဆိုခံထားရသူ လူငယ် ၄ ဦး၊ ဘူးသီးတောင်ထောင်က ၆ ဦးလည်း လွတ်မြောက်လာခဲ့သည်ဟု သတင်းရရှိသည်။

စစ်တွေ အကျဉ်းထောင်က လွတ်လာသူများမှာ  မြေပုံမြို့နယ်ယိုးချောင်းကျေးရွာမှ ကိုဇော်ဝင်းနိုင်၊ ရသေ့တောင်မြို့နယ် ပြာပင်ရင်းကျေးရွာမှ ကိုနေလင်းထွန်း၊ ရသေ့တောင်မြို့နယ် အရှေ့မြောက် ရပ်ကွက်မှ ကိုမောင်မောင်ချေနှင့် ပေါက်တောမြို့နယ် ရွာချောင်းကြီးကျေးရွာမှ ကိုမောင်သန်းဌေးတို့ ဖြစ်ကြသည်။

ဘူးသီးတောင်အကျဉ်းထောင်မှ  ယနေ့  ညနေပိုင်း ၄ နာရီခန့်က လွတ်လာသူ   (၆) ဦးမှာ ဦးကျော်မင်း၊ ဦးဘစော၊ ဦးဘထွန်း၊ ကိုညီညီအောင်၊ ကိုစောသန်း(ခ)သားကြီးနှင့် ဦးသာထွန်းတို့ဖြစ်ကြသည်။

၎င်းတို့ ၆ ဦးမှာ ဘူးသီးတောင်အကျဉ်းထောင်မှလွတ်မြောက်လာသူများမှာ ပြီးခဲ့သည့် ၂ဝ၁၉ ခုနှစ်က ရွှေနဒီအမြန်ယာဉ်မှ ရက္ခိုင့်တပ်တော် (AA) မှ ဖမ်းဆီးပြီးနောက် ပြန်လည် လွတ်မြောက်လာ သူများဖြစ်ကြသည်ဟု သိရသည်။

ရခိုင်ပြည်နယ်အစိုးရအဖွဲ့ပြောရေးဆိုခွင့်ရှိသူ ဦးလှသိန်းက အကြမ်းဖက်မှုပုဒ်မများဖြင့် ဖမ်းဆီး တရားစွဲခံထားရသူ ၃၅ ဦးအားအမှုရုတ်သိမ်းပေးရန် ဆောင်ရွက်နေကြောင်း၊ အမှု(၅)မှုကို ယနေ့တွင် ရုတ်သိမ်းလိုက်သော်လည်း လွတ်မြောက်သည့် အရေအတွက်ကို မသိရှိသေးကြောင်း ပြောသည်။

“ လူဦးရေကို ပြန်မေးကြည့်အုန်းမယ်။ ၅ မှုကိုတော့သိတယ်။ လူဦးရေ ဘယ်လောက်ဆိုတာ မသိလိုက်ဘူး” ဟုပြောသည်။

 ရခိုင်ပြည်နယ်တွင်လက်ရှိအချိန်အထိ အကြမ်းဖက်မှုတိုက်ဖျက်ရေး ပုဒ်မများဖြင့် တရားစွဲဆို ခံထားရသူ ၁ဝဝ ကျော်ရှိကြောင်းရခိုင့်လူအခွင့်အရေး ကာကွယ်မြှင့်တင်သူများအဖွဲ့၏ စာရင်းအရသိရသည်။