- Web Master
- ၀၇ စက်တင်ဘာ ၂၀၂၄
သဉ္ဇာနွယ်
နိရဉ္စရာ၊ မေ ၈/ ၂၀၂၄
ရခိုင်ပြည်၊ စစ်ကောင်စီရုံးစိုက်သည့် မြို့တော်စစ်တွေသို့ စားနပ်ရိက္ခာကုန်စည်တင်ဆောင်သည့် သင်္ဘောများရောက်ရှိနေသော်လည်း ဆန်စျေးနူန်း မြင့်တက်နေဆဲဟု မြို့ခံများက ပြောသည်။
စစ်တွေမြို့တွင် ပြီးခဲ့သည့် ဧပြီလကတည်းက ရန်ကုန်မှ စားနပ်ရိက္ခာပို့ဆောင်သည့် သင်္ဘော၊ ကန့်သတ်ကုန်တင်သည့် သင်္ဘောနှင့် သာမာန်ကုန်ပစ္စည်းတင်ပို့သည့် သင်္ဘောများ အဝင်အထွက်ရှိနေသော်လည်း ဆန်စျေးနူန်းမှာ ဆက်လက်မြင့်တက်နေဆဲဟု စစ်တွေမြို့ခံတစ်ဦးက နိရဉ္စရာ သတင်းဌာနကို ပြောသည်။
“ သင်္ဘောကတော့ သုံးမျိုးလောက်ဝင်တယ်။ တစ်မျိုးက စစ်ကောင်စီပစ္စည်းတင်တဲ့ သင်္ဘော။ အဲ့ဒီသင်္ဘောမှာတော့ ကုန်ပစ္စည်းတွေ အကုန်တင်လို့ရတယ်။ နောက်တစ်ခုက စစ်ကောင်စီက ကန့်သတ်ထားတဲ့ပစ္စည်း။ဆန်၊ဆေးတခြားပစ္စည်း အမျိုး၉၀ လောက်ရှိမယ်။ အဲ့ဒါတွေကို စစ်ကောင်စီကို ပိုက်ဆံပေးပြီး တင်လာတဲ့သင်္ဘောကတစ်မျိုး။ အဲ့ဒီတော့ ဆန်တစ်အိတ်ကို တင်ဆောင်ခ ငါးသောင်းလောက် ပေးရတော့ ဆန်စျေးကမကျဘူး။ ဒါပေမယ့် အဲ့ဒီလိုတင်လာမှ စစ်တွေကို ဆန်ဝင်တာ။ တခြားနေရာက ဝင်တဲ့နေရာမရှိဘူး။နောက်တစ်ခုက သာမာန် စစ်ကောင်စီက ခွင့်ပြုထားသလောက်ပဲတင်တဲ့ သင်္ဘော။ အဲ့ဒီသေ မှာတော့ဆန်တွေ ဆေးတွေမပါဘူး” ဟုပြောသည်။
စစ်တွေတွင် ဆန်စျေးနူန်းမှာ တစ်အိတ်ကို ငွေကျပ် ၂ သိန်းနှင့် ၂ သိန်းခွဲကြားရှိနေပြီး စစ်တွေမှအပ တခြားမြို့နယ်များသို့ ကုန်ပစ္စည်းတင်ပို့ခွင့် ပိတ်ပင်ခံထားရသည့်အတွက် ကုန်ခြောက်ပစ္စည်းများ အနည်းငယ်စျေးကျနေသည်ဟု စစ်တွေမြို့ခံ အမျိုးသမီးတစ်ဦးက နိရဉ္စရာ သတင်းဌာန ကိုပြောသည်။
“ အခုဆိုရင် ကုန်ပစ္စည်းတွေကတော့ ဝင်တယ်။ ဒါပေမယ့် စစ်တွေကနေပြီး တခြားနေရာတွေကို ကုန်ပစ္စည်းတွေ မပို့ရတော့ ကြက်သွန်တို့ ငရုတ်သီးခြောက်တို့ နှစ်ဆလောက်ကျသွားတယ်။ဆန်ကလွဲလို့ပေါ့” ဟုပြောသည်။
ရန်ကုန်မှ စစ်တွေသို့ ကုန်သင်္ဘောများ ဝင်ရောက်သကဲ့သို့ တိုက်ပွဲကြောင့် ပျက်စီးထိခိုက်မည်ကို စိုးရိမ်၍ စစ်တွေမှ ရန်ကုန်သို့ အိမ်သုံးပစ္စည်းများတင်ဆောင်သည့် သင်္ဘောများလည်း ဝင်ထွက်လျက်ရှိသည်ဟု စစ်တွေမြို့ခံ အမျိုးသမီးက ပြောသည်။
“ စစ်တွေမှာက တကယ်မရှိဆင်းရဲသားတွေပဲ ရှိတော့တယ်။ တချို့ ငွေကြေးရှိတဲ့သူတွေက လည်းအခြေအနေစောင့်ကြည့်ပြီးနေတာလည်းရှိတယ်။ အခုနောက်ပိုင်းစစ်တွေကနေ ရန်ကုန်ကို တိုက်ပွဲရှောင်နေတဲ့ သူတွေမှာ အိမ်မှာ ပစ္စည်းတွေ ကျန်ခဲ့တဲ့ ရေခဲသေတ္တာတို့၊ စက်ပစ္စည်းတွေ တန်ဖိုးကြီးတာတွေကို ရန်ကုန်ကို သင်္ဘောနဲ့ တင်နေကြတာတွေလည်းများလာတယ်။ စစ်တွေမှာ တိုက်ပွဲဖြစ်ရင် စစ်ကောင်စီက ဗုံးကြဲတိုက်ခိုက်တာတို့ ၊ လက်နက်ကြီးကျည်ပစ်တာတို့လုပ်ရင် အပျက်အစီးများမှာ စိုးရိမ်လို့” ဟု ပြောသည်။
စစ်ကောင်စီကန့်သတ်ထားသည့် ကုန်ပစ္စည်းများတွင် ဆန်၊ဆေးဝါးပစ္စည်း၊ ကော်ဖီမစ်၊ အလှကုန်နှင့် လူသုံးကုန်ပစ္စည်း အမျိုးအစား ၉၀ ခန့်ရှိကြောင်းသိရသည်။