စနေ၊ ဇွန်လ ၂၂ရက်၊ ၂၀၂၄

မောင်တောတွင် လက်နက်နှင့်အတူထွက်ပြေးသည့် နယ်ခြားစောင့်ရဲတပ်သားတစ်ဦးနှင့် လိုက်ဖမ်းသည့်စစ်ကောင်စီတပ်ဖွဲ့ဝင်များအကြား အပြန်အလှန်ပစ်ခတ်မှုအချို့ရှိခဲ့


  • ရေးသူ: Web Master (NN 16)
  • | ရက်စွဲ: ၀၈ စက်တင်ဘာ ၂၀၂၃
  • | ကြည့်ရှုသူ: 2.1k

ရခိုင်ပြည်နယ်၊ မောင်တောမြို့နယ်တွင် နယ်ခြားစောင့်ရဲတပ်သားတစ်ဦးသည် လက်နက်နှင့်အတူ ထွက်ပြေးသွားပြီးနောက် သူ့ကိုလိုက်ဖမ်းသည့် စစ်ကောင်စီတပ်ဖွဲ့ဝင်များနှင့် အပြန်အလှန်ပစ်ခတ်မှု ဖြစ်ပွားခဲ့သည်ဟု သိရသည်။

ထွက်ပြေးသွားသည့်နယ်ခြားစောင့်ရဲတပ်သားမှာ ဘူးသီးတောင်-မောင်တောကားလမ်းပေါ်ရှိ ၆ မိုင်စစ်ဆေးရေးဂိတ်မှ ရခိုင်အမျိုးသား လူငယ်ပိုင်းတစ်ဦးဖြစ်သည်ဟု  မောင်တောမြို့ခံတစ်ဦးက ပြောသည်။

သူသည် ယမန်နေ့ စက်တင်ဘာ ၇ ရက် ညအချိန်ကပင် ထွက်ပြေးသွားဟန်တူပြီး သူ့ကိုလိုက်ဖမ်းသည့် စစ်ကောင်စီတပ်ဖွဲ့ဝင်များအပါအဝင် နယ်ခြားစောင့်ရဲတပ်ဖွဲ့ဝင်တို့ အပြန်အလှန်ပစ်ခတ်မှုများမှာ ယနေ့ စက်တင်ဘာလ ၈ ရက်၊ ညဉ့်အချိန်တွင် ဖြစ်ပွားခဲ့ခြင်းဖြစ်သည်ဟု ဆိုသည်။

“လက်နက်တွေပါသွားတယ်။ ထွက်ပြေးတာက မနေ့ညကနေထွက်ပြေးတာလို့ သိရတယ်။ ပစ်ကြ၊ ခတ်ကြတာကတော့ ဒီကနေ့မနက်အစောကြီး ညဉ့်အချိန်လို့ ပြောရမှာပေါ့”ဟု ပြောသည်။

စစ်ကောင်စီတပ်ဘက်က ဆက်လက်ပြီး အင်အားဖြည့်ကာ လိုက်လံရှာဖွေနေကြဆဲဖြစ်သည်ဟု သိရသည်။

ထွက်ပြေးသွားသူကို ဖမ်းမိရန် မလွယ်ကူတော့ကြောင်းလည်း အထက်ပါ ဒေသခံက ပြောသည်။

ယခုကိစ္စနှင့်ပတ်သက်ပြီး ဘူးသီးတောင်မြို့နယ်မှ လွှတ်တော်ကိုယ်စားလှယ်ဟောင်းတစ်ဦးကလည်း ပစ်ခတ်မှုအချို့ဖြစ်ခဲ့သည်ကို ကြားသိရသော်လည်း အသေးစိတ်ကို အတိအကျမသိရသေးဟု ပြောသည်။

ပြီးခဲ့သည့် ဇူလိုင်လ ၃ ရက်၊ ညအချိန်ကလည်း မောင်တောမြောက်ပိုင်း ငါးခူရကျေးရွာတွင်ရှိသည့် နခခ(၇) လက်အောက်ခံ နယ်မြေ (၅) နယ်ခြားစောင့်ရဲစခန်းမှ စခန်းမှူး အပါအဝင် အရာရှိ ၃ ဦးတို့သည် ထွက်ပြေးသွားခဲ့ကြောင်း ဒေသခံများက ပြောသည်။

အလားတူ ပြီးခဲ့သည့် မတ်လ ၆ ရက်ကလည်း မောင်တောမြို့နယ် တောင်ပိုင်း မြင်းလွှတ်နယ်ခြားစောင့် ရဲစခန်းမှ သင် တန်းဆင်းခါစ ရဲဝန်ထမ်း ၄ ဦး လက်နက်များနှင့်အတူ ထွက်ပြေးမှုဖြစ်ပွားခဲ့သည်ဟု သိရသည်။ (NN-16)

ဓာတ်ပုံ - နယ်ခြားစောင့်ရဲတပ်ဖွဲ့ဝင်အချို့ကို မောင်တောမြို့တွင် ၂ဝ၁၆ ခုနှစ်က တွေ့ရစဉ်။

ဆက်စပ် သတင်းများ