အိဒ်နေ့တွင် ကော့စ်ဘဇားကမ်းခြေသို့ အပန်းဖြေရန်ထွက်လာသူ ဒုက္ခသည် ၄၅၀ ဖမ်းဆီးခံရ

နိရဉ္စရာ၊ မေ ၅/ ၂၀၂၂ (နယ်စပ်ရေးရာ)

ဘင်္ဂလာဒေ့ရှ်နိုင်ငံ တောင်ပိုင်း ကော့ဘဇားကမ်းခြေသို့ အိဒ် (Eid)နေ့ အခါသမယတွင် အပန်းဖြေရန် စခန်းများက ထွက်လာကြသည့် မြန်မာနိုင်ငံမှ မူဆလင်ဒုက္ခသည် လူပေါင်း ၄၅၀ ကျော် ဖမ်းဆီးခံခဲ့ရကြောင်း Dhaka Tribune က ယမန်နေ့ မေ ၄ ရက် နေ့စွဲဖြင့် သတင်းဖော်ပြသည်။

ဖမ်းဆီးခံရသူများအထဲတွင် ကလေးငယ်များ၊ မိန်းမများနှင့် အမျိုးသားများလည်းပါဝင်ပြီး ခရီးသွားများလည်ပတ်သည့် နေရာအများအပြားကနေ ဖမ်းဆီးမိခဲ့သည်ဟု ဆိုသည်။

၎င်းတို့သည် ကော့စ်ဘဇား ပင်လယ်ကမ်းခြေတွင် ပျော်ရွှင်လိုသည့်အတွက် အိုကီးယား(Ukhiya) နှင့်  တက်ကနက် (Teknaf ) ရှိ ဒုက္ခသည်စခန်းများမှ ထွက်လာကြပြီး သူတို့ကို  Kalatali, Laboni, Sugandha နှင့် Inani ကမ်းခြေဒေသများ၌ ထိန်းသိမ်းခဲ့သည်ဟု သတင်းတွင် ဖော်ပြသည်။

ကော့စ်ဘဇားတွင်  အိဒ် အားလပ်ရက်အတွင်း ခရီးသည် နေ့စဉ်   နှစ်သိန်းခန့် ရောက်ရှိသည်ဟု ဆိုသည်။

ကော့စ်ဘဇားရဲစခန်းမှ ရဲအရာရှိ Md Rezaul Karim က  ရရှိလာသော သတင်းအချက်အလက်များကို အခြေခံ၍ နေရာ အများအပြားကို ဝင်ရောက်စီးနင်းစဉ် ဖမ်းဆီးမိခြင်းဖြစ်ကြောင်း၊ ၎င်းတို့ကို သက်ဆိုင်ရာ ရဲစခန်းသို့ ပို့ဆောင်ထားကြောင်း ၎င်းက ဆိုသည်။

"Over 450 Rohingyas detained at Cox’s Bazar beach"