ရခိုင်အမျိုးသားပါတီ မူဝါဒရေးရာဦးဆောင်ကော်မတီဝင် ဒေါ်အေးနုစိန် နိုင်ငံတော်စီမံအုပ်ချုပ်ရေးကောင်စီအဖွဲ့ဝင်အဖြစ် ခန့်အပ်ခံရ

ရေးသူ: Web Master
| ရက်စွဲ: ၀၉ ဖေဖော်ဝါရီ ၂၀၂၁
| ကြည့်ရှုသူ: 2.4k

ဆောင်းဇာခြည်

နိရဥ္စရာ၊ ဖေဖော်ဝါရီ ၃/ ၂၀၂၁

ရခိုင်အမျိုးသားပါတီ (ANP) မှ မူဝါဒရေးရာဦးဆောင်ကော်မတီဝင် ဒေါ်အေးနုစိန်သည် နိုင်ငံတော်စီမံအုပ်ချုပ်ရေးကောင်စီအဖွဲ့ဝင်အဖြစ် ခန့်အပ်ခြင်းခံလိုက်ရကြောင်း သတင်းရရှိသည်။

နိုင်ငံတော်စီမံအုပ်ချုပ်ရေးကောင်စီက ယနေ့ ဖေဖော်ဝါရီလ ၃ ရက်နေ့တွင် ဖွဲ့စည်းပုံအခြေခံဥပဒေ ပုဒ်မ ၄၁၉ အရ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် (၅)ဦးအား ခန့်အပ်တာဝန်ပေးအပ်တွင် ဒေါ်အေးနုစိန်လည်း ပါဝင်ခဲ့ခြင်းဖြစ်သည်။

နိုင်ငံတော်စီမံအုပ်ချုပ်ရေးကောင်စီအဖွဲ့ဝင်အဖြစ် ဒေါ်အေးနုစိန်ခန့်အပ်ခြင်းခံရသည်ကို ရသေ့တောင်မြို့နယ် ပြည်သူ့လွှတ်တော်ကိုယ်စားလှယ် ဒေါ်ခင်စောဝေကလည်း အတည်ပြုပြောဆိုသည်။

ယင်းကိစ္စနှင့်ပတ်သက်ပြီး ဒေါ်အေးနုစိန်၏သဘောထားအားသိလို၍ နိရဥ္စရာသတင်းဌာနက ဖုန်းဖြင့် အကြိမ်ကြိမ် ဆက်သွယ်ခဲ့သော်လည်း ဖုန်းလက်ခံဖြေဆိုခြင်း မရှိခဲ့ပါ။

ဒေါ်အေးနုစိန်သည် ANP ပါတီ၏ မူဝါဒရေးရာဦးဆောင်ကော်မတီဝင်ဖြစ်သည့်အပြင် ပါတီ၏ ပြောရေးဆိုခွင့်ရှိသူလည်းဖြစ်ကာ တရားလွှတ်တော်ရှေ့နေတစ်ဦးလည်းဖြစ်သည်။

နိုင်ငံတော်စီမံအုပ်ချုပ်ရေးကောင်စီကို တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်ဥက္ကဋ္ဌအဖြစ်တာဝန်ယူကာ ယမန်နေ့က ဖွဲ့စည်းခဲ့ခြင်းဖြစ်သည်။

ယင်းနောက် တိုင်းဒေသကြီးနှင့် ပြည်နယ်စီမံအုပ်ချုပ်ရေးကောင်စီဥက္ကဋ္ဌများကိုလည်း ယမန်နေ့တွင်ပင် အသီးသီးခန့်အပ်ခဲ့ရာ ရခိုင်ပြည်နယ် စီမံအုပ်ချုပ်ရေးကောင်စီဥက္ကဋ္ဌအဖြစ် ယခင် သမ္မတဟောင်းဦးသိန်းစိန်အစိုးရလက်ထက်တွင် ရခိုင်ပြည်နယ်အစိုးရအဖွဲ့၏ လူမှုရေးဝန်ကြီးအဖြစ်တာဝန်ထမ်းဆောင်ခဲ့သော ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီမှ ဒေါက်တာ အောင်ကျော်မင်း ခန့်အပ်ခံခဲ့ရသည်။