မြေပုံမြို့နယ် နေရပ်ပြန်စစ်ဘေးရှောင်များ ဆန်သယ်ယူခွင့်ပိတ်ပင်ခံနေရ

ချစ်အိလှိုင်

နိရဥ္စရာ၊ ဒီဇင်ဘာ ၇/ ၂ဝ၂၁

ရခိုင်ပြည်နယ် မြေပုံမြို့နယ် ယောချောင်း- ရွာသာယာကျေးရွာမှ  နေရပ်ပြန်စစ်ဘေးရှောင်များ ဆန်သယ်ယူခွင့်ပိတ်ပင်ခံနေရသဖြင့် စားဝတ်နေရေး အခက်အခဲ ရှိနေသည်ဟု သိရသည်။

၎င်းဆန်သယ်ယူခွင့်ကို ယောချောင်းတံတားထိပ်ရှိ လုံခြုံရေးယူထားသည့် စစ်တပ်က ဒီဇင်ဘာလ ၅ ရက်မှစတင်ကာ တားဆီးပိတ်ပင်ထားခြင်းဖြစ်ကြောင်း ဒေသခံများက နိရဥ္စရာသတင်းဌာနကို ပြောသည်။

ယောချောင်းရွာသာယာကျေးရွာ ရပ်မိရပ်ဖတစ်ဦးက “ဦးလေးတို့ရွာသားတွေက AA ကိုထောက်ပံ့နေတယ်လို့ သူတို့က ထင်နေတယ်။ မင်းတို့ရွာသားတွေ ဆန်သယ်တာများနေပြီဆိုပြီး လွန်ခဲ့တဲ့ သုံးရက်လောက်ကတည်းက ဆန်သယ်ခွင့်ပိတ်လိုက်တာ။ ဝါးခုတ်ပြီးအသက်မွေးဝမ်းကျောင်းပြုနေကြတဲ့လူတွေဆိုတော့ စပါးလည်း မစိုက်ဘူး။ ငတ်ကုန်ကြတော့မယ်” ဟု ပြောသည်။

အိမ်ခြေ ၅ဝဝ ကျော်ရှိသည့် ၄င်းယောချောင်းရွာသာယာကျေးရွာသားများမှာ ၂ဝ၁၈ ခုနှစ်၊ ဒီဇင်ဘာလခန့်က ရက္ခိုင့်တပ်တော်(AA)နှင့် မြန်မာစစ်တပ်တို့ကြား တိုက်ပွဲများကြောင့် ရွာလုံးကျွတ်နီးပါး နေရပ်စွန့်ခွာကာ မြေပုံ၊ ပေါက်တောနှင့် နီးစပ်ရာ ဆွေမျိုးများထံသို့ ထွက်ပြေးခဲ့ကြကြောင်း သိရသည်။

ယင်းနောက် ၂ဝ၁၉ ခုနှစ်၊ မေလအတွင်းမှစတင်ကာ အိမ်ထောင်စု ၂ဝဝ ကျော်၊ ကျေးရွာသား ၁ ထောင်ခန့်ဖြင့် ရွာသားထက်ဝက်ခန့် ပြန်လည်အခြေချနေထိုင်လျက်ရှိနေပြီဟု သိရသည်။

၄င်းကျေးရွာမှ ဆန်ရောင်းဝယ်သူ ဦးမောင်လှမြင့်က “ဘာကြောင့်မသယ်ရတာလဲမသိဘူး။ မသယ်ရဘူးလို့ပြောတယ်။ ရွာမှာစားဝတ်နေရေးအခက်အခဲဖြစ်တာပေါ့။ ဆန်မသယ်ရမရောင်းရရင်” ဟုပြောသည်။

အဆိုပါကိစ္စနှင့်ပတ်သက်၍ မြေပုံမြို့နယ်အုပ်ချုပ်ရေးမှူး ဦးစိန်လှမောင်က “အဲဒီတံတားမှာတော့ တံတားတစ်ဘက်ကရဲနဲ့ တစ်ဘက်က စစ်တပ်ရှိတယ်။ ကျွန်တော်အဲဒီက ရဲကိုမေးကြည့်နေပါတယ်။ ရဲကလည်း ကျနော်တို့စုံစမ်းကြည့်လိုက်မယ်လို့ပြောတယ်”ဟု ပြောသည်။

ရခိုင်ပြည်နယ်ကောင်စီမှ လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးကျော်သူရကိုဆက်သွယ်ခဲ့သော်လည်း ဆက်သွယ်မရခဲ့ပါ။

မြေပုံမြို့နယ် ယောချောင်းအထက်ဘက်တွင် ယောချောင်းရွာသာယာကျေးရွာနှင့် ချောင်းဖျားတွင် ချင်းလူမျိုးများနေထိုင်ကြောင်း သိရသည်။

ရခိုင်တွင် AA နှင့် စစ်တပ်တို့ကြားတိုက်ပွဲများကြောင့် နေရပ်စွန့်ခွာသူ စစ်ဘေးရှောင် ၂ သိန်းခန့်အထိိရှိခဲ့ပြီး အစိုးရကပြန်ပို့သူနှင့် မိမိတို့သဘောဖြင့် ပြန်ကြသည့် စစ်ဘေးရှောင်အများအပြားရှိနေသည်ဟု သိရသည်။

အစိုးရအစီအစဉ်ဖြင့်ပြန်ပို့သူများကို နေထိုင်စားသောက်ရေးအဆင်ပြေစေရန် ဆန်ရိက္ခာအချို့နှင့် ငွေကြေးအချို့ကို ရခိုင်ပြည်နယ်ကောင်စီက ထောက်ပံ့ပေးခဲ့သည်။