ထွန်းခိုင် (တောင်ရင်းကျွန်း)
နိရဥ္စရာ၊ ဇူလိုင် ၉ / ၂ဝ၂ဝ
ရခိုင်ပြည်နယ်၊ ငတောက်တူချေကျေးရွာမှ မိုင်းပေါက်ကွဲမှုကြောင့် ဒဏ်ရာပြင်းပြင်းထန်ထန် ရရှိခဲ့သော ဦးမောင်ကျော်သန်း (၆၆) နှစ်သည် စစ်တွေမြို့ပြည်သူ့ဆေးရုံးကြီးတွင် ယနေ့ နံနက် ၄ နာရီအချိန်ခန့်က သေဆုံးသွားကြောင့် သတင်းရရှိသည်။
ငတောက်တူချေကျေးရွာမှ ဦးမောင်ကျော်သန်းသည် ကျွန်းတောင်အနီး သူ့၏လယ်ကွင်းမှာ နွားကျောင်းနေစဉ် ယမန်နေ့ နေ့လယ် ၁၂ နာရီခွဲအချိန်ခန့်က မိုင်းကွဲမှုကြောင့် ခြေထောက်နှစ်ဘက်တွင် ဒဏ်ရာ ပြင်းပြင်းထန်ထန် ရရှိခဲ့သည်။
၎င်းနောက် ဦးမောင်ကျော်သန်းအား ရသေ့တောင်မြို့နယ် ဆေးရုံသို့ ယူဆောင်ခဲ့ပြီး ဒဏ်ရာ အခြေအနေဆိုးရွားသဖြင့် ရသေ့တောင်မြို့နယ်ဆေးရုံမှ စစ်တွေ ပြည်သူ့ဆေးရုံကြီးသို့ ယမန်နေ့ညနေက ထပ်မံယူဆောင်လာခဲ့ကာ ယနေ့နံနက် ၄ နာရီခန့်က သေဆုံးသွားခြင်း ဖြစ်သည်။
တစ်ရွာတည်းနေသူ ဦးညိုဇံအောင်က “ သူ့က ရွာမြောက်ဖက်က လယ်ကွင်းကို နွားကျောင်းဖို့ထွက်သွားတယ်။ အဲဒီနားမှာ ကုက္ကိုလ်ပင်၊ ညောင်ပင်နှင့် ဝါးရုံတောတွေရှိတယ်။ သူ့က ကုက္ကိုလ်ပင်အောက်ကို ဝင်ထိုင်တဲ့အခါ ပေါက်ကွဲတယ်လို့ ပြောတယ်။ ဒဏ်ရာရတာကတော့ ခြေထောက်နှစ်ဖက်လုံး ပြတ်လုမတတ် ဖြစ်သွားတယ်” ဟု ၎င်းက ပြောသည်။
ယခုမိုင်းပေါက်ကွဲသည့် နေရာအနီးတစ်ဝိုက်တွင် တိုက်ပွဲဖြစ်ပွားမှု တစ်စုံတစ်ရာမရှိကြောင်းနှင့် ယခင်က မိုင်းပေါက်ကွဲမှုများလည်း မရှိခဲ့ကြောင့် ၎င်းက ဆက်လက်ပြောကြားသည်။
ရသေ့တောင်မြို့နယ်မှ လူမှုရေးလုပ်ငန်းများ ဆောင်ရွက်နေသူ ကိုဘက္ကာက“ သူ့က ဖြစ်ကတည်းကနေ ဒဏ်ရာကတော်တော်များတယ်။ စစ်တွေကို သွားဖို့အတွက် ICRC speed boat ရောက်နေတဲ့အတွက် သူတို့ကို အကူညီတောင်းတယ်။ သူတို့မှာလည်း အထက်ကို အဆင့်ဆင့် တင်နေရတာနဲ့ အချိန် ကြန့်ကြာသွားတယ်။ ကျနော်တို့ကလည်း ဒီအတိုင်းဆိုရင် ဖြစ်မှာမဟုတ်တော့ဘူး။ ဒါကြောင့် စက်လှေငှားပြီး စစ်တွေကိုလာတယ်။ နယ်မြေဒေသမတည်ငြိမ်တဲ့အတွက် ကားလမ်းလည်းသွားလို့ မရဘူး။ စစ်တွေဆေးရုံကို ရောက်တဲ့အချိန်မှာလည်း အချိန်ကြန့်ကြာမှုတွေရှိတယ်။ ဒီနေ့ မနက်မှာတော့ စစ်တွေဆေးရုံကြီးမှာ သေဆုံးသွားပါတယ်” ဟုပြောသည်။
သေဆုံးသွားသူ၏ ရုပ်အလောင်းကို ရသေ့တောင်မြို့မှာ သင်္ဂြိုလ်သွားမည်ဖြစ်ကြောင်း သိရှိရသည်။
မိုင်းပေါက်ကွဲမှုဖြစ်စဉ်နှင့် ပတ်သက်ပြီး ရခိုင်ပြည်နယ်၊ အစိုးရအဖွဲ့ရဲ့ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး မင်းသန်းအား ယမန်နေ့ ညနေ ၈ နာရီခန့်က ဆက်သွယ်မေးမြန်းစဉ် သူ့အနေဖြင့် အဆိုပါ ဖြစ်စဉ်အား မသိသေးကြောင်း ဖြေကြားခဲ့သည်။