တိမ်ညိုစစ်ဘေးရှောင်စခန်း မီးလောင်မှု လူနေအိမ် ၇၀၀ခန့် ဆုံးရှုံး၊ လူပေါင်း ၂၇၀၀ ကျော် အိုးမဲ့အိမ်မဲ့ဖြစ်

ထွန်းခိုင် (တောင်ရင်းကျွန်း)

နိရဉ္စရာ၊ မတ် ၁၈ / ၂၀၂၁

ရခိုင်ပြည်နယ်၊ မြောက်ဦးမြို့နယ်၊ တိမ်ညိုစစ်ဘေးရှောင်စခန်းတွင် ယမန်နေ့ ည ၈ နာရီခန့်က မီးလောင်မှု ဖြစ်ပွားခဲ့ရာ လူနေအိမ်အလုံးပေါင်း ၇၀၀ ခန့် ဆုံးရှုံးသွားပြီး လူပေါင်း ၂၇၀၀ ကျော် မီးဘေးသင့်ခဲ့သည်ဟု သိရသည်။

တိမ်ညို စစ်ဘေးရှောင် စခန်းတွင် လူနေအိမ် (၈၇၅) အိမ် ရှိပြီး ယင်းအထဲမှ ၇၀၀ မီးထဲပါသွားကြောင်း စခန်းတာဝန်ခံ ဦးမောင်ငန်းက ပြောသည်။

“ ခန့်မှန်းခြေအားဖြင့်တော့ အိမ်ခြေ ၇၀၀ လောက်ပါသွားတယ်။ မီးတော့ ၈ နာရီမှာ စလောင်ပြီး ည ၁၀ နာရီကျော် လောက်မှာ ငြိမ်းသွားပါတယ်။ လူတွေကတော့ မနေ့ညကတော့ လမ်းဘေးမှာပဲ တာပေါ်လင်စတွေ ခင်းပြီးတော့  အိပ်ကြရတယ်။ အခုတော့ တိမ်ညိုရွာသစ် ဘုန်းကြီးကျောင်းကို သွားပြီးတော့ နေကြတယ်။” ဟုပြောသည်။

လူပေါင်း ၂၇၁၆ ဦး (ကျား ၁၂၀၈၊ မ ၁၅၀၈) ခန့် မီးဘေဒုက္ခသည် ဖြစ်သွားခဲ့ကြောင်း ရခိုင်ပြည်နယ်မီးသတ်ဦးစီးဌာန ထုတ်ပြန်ချက်အရ သိရသည်။

အဆိုပါ မီးလောင်မှုမှာ ဖယောင်းတိုင်မီးမှ တဆင့် လောင်းကျွမ်းခြင်းဖြစ်သည်ဟု မြောက်ဦးမြို့၊ မီးသတ်စခန်းမှ တပ်ကြပ်ကြီး ဦးမျိုးမြတ်ထွန်းက ပြောသည်။

“ ပစ္စည်းတန်ဖိုးဆုံးရှုံးမှုကတော့ ၂၈ သန်းရှိပါတယ်။ မီးစလောင်တာကတော့ ဖယောင်းတိုင်မီး လဲကျပြီးတော့ အနီးအနားက ထရံကို မီးကူးစက်မှုဖြစ်ပြီးတော့ လောင်ကျွမ်းသွားတာပါ။ မီးစတင်လောင်ကျွမ်းတဲ့ အိမ်ရှင်ကိုတော့ မြောက်ဦးရဲစခန်းမှာ အမှုဖွင့်လို့ရှိပါတယ်။ မီးစတင်လောင်ကျွမ်းတာကတော့ မဖြူနှင်းစိုး အိမ်က စတင်လောင်ကျွမ်းတာပါ” ဟုပြောသည်။

မီးလောင်မှုကြောင့် မမိုးနှင်းစိုး အသက် (၂)မှာ နဖူးတွင် ဒဏ်ရာရရှိခဲ့ပြီး၊ မသိန်းမေ (၂၃) နှစ်တွင် ဘယ်ဖက်လက်တို့တွင် မစိုးရိမ်ရ ဒဏ်ရာ အနည်းငယ်ခန့် ရရှိသွားသည်ဟု သူကဆက်ပြောသည်။

 တိမ်ညိုစစ်ဘေးရှောင်စခန်းတွင် ပေါက်ပင်ကွင်း၊ လက္ကာ၊ အောက်သကန်၊ ဘူးရွက်မညို၊ စသည့်ကျေးရွာတို့မှ စစ်ဘေးသင့် ဒုက္ခသည်များနေထိုင်ကြပြီး၊ လူဦးရေ (၃၃၅၅) ဦးရှိကြောင်း သိရှိရသည်။