သောကြာ၊ မတ်လ ၂၉ရက်၊ ၂၀၂၄

အမ်းမြို့နယ်တွင် ကြိမ်ခုတ်ရောင်းသူတစ်ဦး မိုင်းနင်းမိ၍ ဒဏ်ရာ အပြင်းအထန်ရရှိ


  • ရေးသူ: Web Master
  • | ရက်စွဲ: ၁၈ ဖေဖော်ဝါရီ ၂၀၂၁
  • | ကြည့်ရှုသူ: 9.4k

ချစ်အိလှိုင်
နိရဥ္စရာ၊ ဖေဖော်ဝါရီ ၁၇/ ၂ဝ၂၁

ရခိုင်ပြည်နယ်၊ အမ်းမြို့နယ်၊ သရက်ပင်ချောင်းကျေးရွာမှ ကြိမ်ခုတ်ရောင်းသူတစ်ဦးသည် မိုင်းနင်းမိ၍ ခြေထောက်ဒဏ်ရာ ပြင်းထန်စွာရရှိခဲ့ကြောင်း သတင်းရရှိသည်။

ဒဏ်ရာရရှိသွားသူမှာ ဦးဌေးဌေး(၃၅)နှစ်ဖြစ်ပြီး ယနေ့ နံနက် ၁ဝ နာရီခန့်က အမ်းမြို့နယ် အုန်းတည်ချောင်းတံတားအနီးရှိ တောင်ကုန်းပေါ်တွင် မိုင်းနင်းမိခဲ့ခြင်းဖြစ်သည်ဟု မိသားစုဝင်များက ပြောသည်။ အဆိုပါဖြစ်စဉ်ကြောင့် ၄င်း၏ ညာဖက်ခြေသလုံးအောက်မှ ပြတ်ထွက်သွားကြောင်း မိသားစုဝင်များက နိရဥ္စရာသတင်းဌာနအား ပြောသည်။

ဦးဌေးဌေး၏ ဇနီး ဒေါ်လွယ်လေးက “ ကြိမ်ခုတ်ဖို့သွားရာမှာ မိုင်းနင်းမိတာပါ။ အခု ဆရာဝန်တွေ သူ့ကို အရေးပေါ်အခန်းထဲသွင်းသွားပါတယ်။ ဒူးအောက်ဖက် ခြေမျက်စိအထက်ကနေ ပြတ်ထွက်သွားပါတယ်။ စိုးရိမ်တာပေါ့ရှင်။ ကိုယ့်အမျိုးသားတစ်ယောက်လုံး ဒီလိုဖြစ်သွားတော့လေ။” ဟုပြောသည်။

ဒဏ်ရာရရှိသူအား မြေပုံမြို့နယ် ကမ်းထောင်းကြီးတိုက်နယ်ဆေးရုံတွင် ဆေးကုသမှုခံယူနေကြောင်း ကမ်းထောင်းကြီးမြို့မှ လူမှုရေးလုပ်နေသည့် ဦးဝင်းလှအောင်က ပြောသည်။

“ ခြေထောက်ပြတ်သွားပေမယ့် လူနာက သတိတော့ ရသေးတယ်။ ဆရာဝန်တွေအထဲခေါ်သွားကြတယ်။ မိသားစုတွေနဲ့အတူ ကျွန်တော်တို့လည်း စောင့်ကြည့်နေကြပါတယ်” ဟုု သူက ပြောသည်။

အဆိုပါကိစ္စနှင့် ပတ်သက်၍ အမ်းမြို့နယ်အုပ်ချုပ်ရေးမှူး ဦးရွှေအေးအား ဖုန်းဖြင့်ဆက်သွယ်ရာ ဆက်သွယ်မှုမရရှိခဲ့ပါ။
အနောက်ပိုင်းတိုင်းစစ်ဌာနချုပ်မှ ဒု-ဗိုလ်မှူးကြီး နေထွန်းလှိုင်အား မေးမြန်းရာ ၄င်းတို့ မိုင်းရှင်းလင်းရေးအဖွဲ့အနေဖြင့် ၄င်းနေရာကို ရောက်ရှိခြင်း ရှိ/မရှိမသိရသေးကြောင်းပြောသည်။

“ ကျွန်တော်မသိသေးဘူးဗျ။ ကျွန်တော်ပြောထားတာပဲ။ ကားလမ်းဘေးယာတွေကို ရှင်းလင်းရေးစလုပ်တာကို။ တောင်ကုန်းပေါ်မှာပေါက်တာဆိုတော့ ကျွန်တော်လည်း ဒီကိစ္စကို မသိသေးဘူး။ ကျွန်တော်တို့ အဖွဲ့တွေကို မေးကြည့်ပါဦးမယ်” ဟုပြောသည်။
အမ်း-စစ်တွေ ပြည်ထောင်စုကားလမ်းမတစ်လျှောက် မိုုင်းရှင်းလင်းမှုကို တပ်မတော်က ဖေဖော်ဝါရီလ ၁၅ ရက်နေ့မှစတင်ဆောင်ရွက်နေပြီဖြစ်သည်ဟုလည်း သိရသည်။

ဆက်စပ် သတင်းများ