ကျောက်တော်တွင် မိုင်းနင်းမိ၍ အမျိုးသမီးတစ်ဦး ပြင်းထန်ဒဏ်ရာရ

ရေးသူ: Web Master
| ရက်စွဲ: ၂၁ ဇွန် ၂၀၂၁
| ကြည့်ရှုသူ: 7.6k

ထက်အောင်

နိရဥ္စရာ၊ ဇွန် ၁၈/ ၂၀၂၁

ရခိုင်ပြည်နယ်၊ ကျောက်တော်မြို့နယ်၊ ငှက်ပျောချောင်းကျေးရွာတွင် မိုင်းပေါက်ကွဲမှုကြောင့် အမျိုးသမီးတစ်ဦး ဒဏ်ရာပြင်းပြင်းထန်ထန် ရရှိသွားကြောင်း သိရသည်။

မိုင်းနင်းမိပြီး ဒဏ်ရာပြင်းပြင်းထန်ထန်ရရှိသွားသည့် အမျိုးသမီးမှာ ငှက်ပျောချောင်းကျေးရွာမှ အသက် (၄၉) နှစ်အရွယ် ဒေါ်အေးမြဖြစ်သည်။

သူမသည် နောက်ထပ် အမျိုးသမီး ၄ ဦးနှင့်အတူ ယမန်နေ့ ဇွန်လ ၁၇ ရက်နေ့ နေ့လယ် ၁၁ နာရီအချိန်ခန့်က ရွာအနီးရှိ ကျောက်ပန်းတောင်သို့

မျှစ်ချိုးသွားစဉ် မိုင်းနင်းမိခဲ့ခြင်းဖြစ်ပြီး မိုင်းပေါက်ကွဲမှုကြောင့် သူမ၏ဘယ်ခြေထောက် ပြင်းထန်ဒဏ်ရာရရှိခဲ့ကာ ခြေကျင်းဝတ်အောက် ပြတ်ထွက်သွားသည့် ဒဏ်ရာနှင့် ဘယ်ဘက်လက်မောင်း အနည်းငယ် ဒဏ်ရာရရှိသွားကြောင်း သိရသည်။

သူမ၏ဆွေမျိုး ဦးထူးအောင်မြင့်က “မျှစ်ချိုးဖို့သွားတုန်းက (၅) ယောက်၊ မိုင်းနင်းမိတဲ့အခါ သူ့ဘေးမှာ နောက်တစ်ယောက်ပါသေးတယ်။ ဒါပေမဲ့ အဲဒီတစ်ယောက်ကို မိုင်းမထိဘူး။ သူတစ်ယောက်တည်း ထိသွားတာ။ သူ့ရဲ့ ဒဏ်ရာအခြေအနေကတော့ ခြေထောက်ဖြတ်ရမယ်လို့ကြားပါတယ်။” ဟု ပြောသည်။

ထိုအမျိုးသမီးမှာ လက်ရှိတွင် စစ်တွေဆေးရုံ၌ ဆေးကုသမှုခံယူလျက်ရှိပြီး ဘယ်ခြေထောက်အား ဖြတ်ရမည်ဖြစ်ကာ ဆေးကုသရန်ငွေကြေးအကူအညီများ လိုအပ်နေကြောင်း သိရသည်။

ထိုမိုင်းထိဒဏ်ရာရ အမျိုးသမီးတွင် အသက် (၁၉) နှစ်အရွယ် တက္ကသိုလ်ကျောင်းတက်နေသည့် သမီးတစ်ဦးရှိပြီး သမီးဖြစ်သူအား တက္ကသိုလ်ကျောင်းတက်နိုင်ရန်အတွက် ကျေးရွာအနီးရှိ တောတောင်ကို အမှီပြု၍ ပင်ပန်းဆင်းရဲကြီးစွာ ရုန်းကန်လှုပ်ရှားနေသူဖြစ်ကြောင်း ရခိုင်တိုင်းရင်းသားမျိုးနွယ်များအစည်းအရုံး (REC)၏ ဖော်ပြချက်အရ သိရသည်။

ယမန်နေ့က မိုင်းပေါက်ကွဲမှုဖြစ်ပွားခဲ့သည့် ငှက်ပျောချောင်းကျေးရွာကနေ (၁)နာရီဝက်ခန့်သွားရသည့် ကျောက်ပန်းတောင်အနီးတစ်ဝိုက်တွင် အရင်ကလည်း မိုင်းပေါက်ကွဲမှု (၂) ကြိမ်ရှိခဲ့ပြီး လွန်ခဲ့သည့် ၂၀၁၉ ခုနှစ်က ပေါက်ကွဲမှုတစ်ကြိမ်တွင် အမျိုးသား (၂)ဦး ဒဏ်ရာရရှိသွားခဲ့ကြောင်း ဒေသခံများက ပြောသည်။

Photo - REC