“ဗြိတိသျှတွေကမြန်မာပြည်ကိုသိမ်းတဲ့အခါသူတို့ဘယ်နေရာကိုသိမ်းသလဲဆိုတော့ရခိုင်နဲ့တနင်္သာရီကမ်းရိုးတန်းကိုသိမ်းပါတယ်။ ဒါကတကယ့် မဟာဗျူဟာကျတဲ့နေရာဖြစ်တယ်”

ကရင်တော်လှန်ရေးနဲ့ ရခိုင်တော်လှန်ရေးဆိုတာတကယ့်ညီအစ်ကိုတွေ၊ လက်တွဲလာတာလည်းနှစ်ပေါင်းက အများဆုံးဖြစ်တယ်ဆိုတာ ကျွန်တော်တို့ပြောလို့ရတယ်။

(KNU ပြောရေးဆိုခွင့်ရှိသူKNU နိုင်ငံခြားရေးဌာနတာဝန်ခံပဒိုစောတောနီး)

လူထက်နိုင်( ဒွာရာမြီ)/အင်တာဗျူး၊ ဒီဇင်ဘာ ၂၀/၂၀၂၄

ထိုင်းနယ်စပ်မှာ တည်ရှိတဲ့ သမိုင်းဝင် မာနယ်ပလောကို နှစ်ပေါင်း ၃၀ အကြာမှာ ကရင်အမျိုးသား တပ်မတော်(KNLA)က ပြန်လည် သိမ်းပိုက်လိုက်ပါတယ်။ လက်ရှိ ကရင်အမျိုးသား လွတ်မြောက်ရေး တပ်မတော်ဟာ ကရင်ပြည်နယ်အတွင်းက နေရာအတော်များများကို သိမ်းပိုက်ထားပါတယ်။

အလားတူ ရခိုင်မှာဆိုရင်လည်း အာရက္ခတပ်တော် ( AA)ဟာခရိုင်မြို့ကြီး (၅) မြို့၊ မြို့နယ်အားဖြင့် ဆိုရင် ၁၃ မြို့နယ်ထိ တိုက်ခိုက်သိမ်းပိုက်ထားပါတယ်။ လက်ရှိ ဒီကနေ့ ဒီဇင်ဘာ ၂၀ နေ့ ရရှိတဲ့ သတင်းအရ အမ်းကို အပြီးသတ် သိမ်းပိုက်ရရှိသွားပြီလို့ သိရပါတယ်။

ဒီလို AA နဲ့ KNLA တို့ တိုက်ပွဲဖော်ဆောင်မှုနဲ့ ခုလို အောင်မြင်မှုရနေတဲ့ အပေါ် ကရင်အမျိုးသား အစည်းအရုံး (KNU) ပြောရေးဆိုခွင့်ရှိသူ KNU နိုင်ငံခြားရေးဌာနတာဝန်ခံ ပဒိုစောတောနီးကိုနိရဉ္စရာက ဆက်သွယ် မေးမြန်းပြီး ဖော်ပြလိုက်ပါတယ်။

မေး- လက်ရှိKNU က သမိုင်းဝင် မာနယ်ပလောကိုနှစ်ပေါင်း ၃၀ အကြာမှာ ပြန်လည် သိမ်းပိုက် လိုက်ပြီလို့ သိရပါတယ်။ မာနယ်ပလောကို သိမ်းပိုက်လိုက်တာနဲ့ ပတ်သက်ပြီး ပဒိုရဲ့ အမြင်ကို သိပါရစေ။

ဖြေ- ကျွန်တော်တို့ရဲ့အထင်ကရမာနယ်ပလောဌာနချုပ်ကြီးကတော့ပြီးခဲ့တဲ့၁၉၉၄ဒီဇင်ဘာကစပြီးတော့ပြဿနာတက်ခဲ့ပြီးတော့၁၉၉၅ဇန်နဝါရီလ၂၇ရက်နေ့မှာကျဆုံးခဲ့တာလေ။ အဲ့ဒါ အခုဆိုရင်တော့နှစ်သုံးဆယ်ပြည့်ခဲ့ပြီပေါ့နော်ဘာပဲပြောပြောဒီဟာကကျွန်တော်တို့ ခရစ်စမတ် လက်ဆောင်တစ်ခုအနေနဲ့မှတ်ယူရတော့မယ်ဖြစ်နေတယ်၊ဘာဖြစ်လို့လည်းဆိုဒီလဒီရာသီနဲ့ တိုက်ဆိုင် နေတာကိုး။ အထူးသဖြင့်တပ်မဟာ၇နယ်မြေထဲမှာဆိုတော့သူတို့အဓိကကျပါတယ်။ သူတို့အသံလုံလုံနဲ့ပဲစလုပ်ခဲ့တာ လအနည်းငယ်လောက်ရှိပြီ။ တဖြည်းဖြည်းကျွန်တော်တို့ ချွေစစ်ပုံစံနဲ့ လုပ်လာတာဒီဇင်ဘာ၁၆ ရက်နေ့မှာနောက်ဆုံးစခန်းဖြစ်တဲ့၉၁၃စခန်းကိုသိမ်းပိုက်နိုင်ပြီဆိုတာအတည်ပြုလို့ရတယ်။ရှင်းရှင်းပြောရရင်တော့မာနယ်ပလောဒေသတစ်ခုလုံး စစ်ကောင်စီ ကင်းစင် လွတ်မြောက်သွားပြီဆိုတာတော့ပြောလို့ရတယ်ပေါ့နော်။ ဒါပထမဦးဆုံးပြောရမယ့် ဝမ်းသာစရာ သတင်းစကားပါ။ အဲ့ဒါကိုပြောခြင်းအားဖြင့်ဟိုးတချိန်ကလက်တွဲခဲ့တဲ့မဟာမိတ်တွေကိုလည်းပြန်ပြီး သတိရစေခဲ့တယ်။

မေး- ကရင်ပြည်နယ်မှာ ကရင်အမျိုးသားအစည်းအရုံး/ ကရင်အမျိုးသားလွတ်မြောက်ရေးတပ်မတော် (KNU/KNLA)ရဲ့ ဒေသထဲမှာ နယ်မြေစိုးမိုးမှု အနေအထားကိုလည်း ပြောပြပေးပါ။

ဖြေ- ကျွန်တော်တို့ တပ်မဟာတွေကတော့ဒေသတစ်ခုနဲ့တစ်ခု မတူတဲ့အခါကျတော့ပုံစံတစ်ခုနဲ့လုပ်နေရတာရှိတယ်။ သို့သော်ကျွန်တော်တို့မှာ ထူးထူးခြားခြားရှိတာကစစ်အာဏာသိမ်းပြီးတဲ့ နောက်ပိုင်းမှာကျွန်တော်တို့နယ်မြေတွေတခွင်တစ်ပြင်ကြီးဖြစ်သွားတယ်လို့ပြောလို့ရတယ်။ အဓိကအားဖြင့်ဒေသကြီးလေးခုမှာဖြန့်ကျက်ထားတာပဲခူးတိုင်းအရှေ့ခြမ်းရယ်၊ ကရင်ပြည်နယ်မွန်ပြည်နယ်၊ တနင်္သာရီတိုင်းရယ်။ အဲဒီအထဲမှာဆိုတော့အထူးသဖြင့် စစ်တောင်မြစ်ဝှမ်း လွင်ပြင်တစ်ခုကကျွန်တော်တို့၂၀၁၁မတိုင်ခင်ကဆိုစစ်တောင်းအရှေ့ဘက်ခြမ်းမှာပဲလွမ်းမိုးချုပ်ကိုင်ထားတာအခုကစစ်တောင်မြစ်ဝှမ်းရဲ့အနောက်ဘက်ခြမ်းပေါ့နော်။ညောင်လေးပင်မားတောက်တို့တစ်ကကြောလုံး ရန်ကုန်-မန္တလေးကားလမ်းအထိကျွန်တော်တို့တပ်ဖွဲ့ဝင်တွေ အကုန်လုံး တပ်ချထားလို့ရပြီလေ။ အဲ့ဒီတခွင်တပြင်လုံးဟာလည်း စစ်ကောင်စီရဲ့ အုပ်ချုပ်ရေးတွေ ပျက်ပြားသွားပြီးကျွန်တော်တို့လွမ်းမိုးချုပ်ကိုင်နိုင်တဲ့အနေအထားတစ်ခုရောက်လာတယ်။ အဲ့တော့သူတို့ဘာမှမတတ်နိုင်တော့နောက်ဆုံးကျတော့ကျေးရွာတွေကိုနေ့စဉ်လိုလိုလက်နက်ကြီးနဲ့ ထုနေတော့တာပဲ။

မေး- လက်ရှိ တိုက်ပွဲတွေလည်း ဆက်ဖြစ်နေတယ်။ မာနယ်ပလောကိုလည်း သိမ်းပိုက်ထားပြီဆိုတော့ ထိုင်းနယ်စပ်ဒေသအခြေအနေက ဘယ်လိုရှိပါသလဲ။

ဖြေ- နယ်စပ်ကတော့အထူးသဖြင့်သံလွင်မြစ်ကြောင်းပထမဆုံးကရင်နီနဲ့နယ်စပ်ကနေဟိုးဖြတ်ချ လာပြီးတော့၂၀၂၂ပြီးတာနဲ့စခန်းတစ်ခုပြီးတစ်ခုသိမ်းလာတာသောင်းရင်းမြစ်အဆုံးထိုင်းနဲ့ ထိစပ်တဲ့နယ်စပ်။ပြီးရင်ကော့သောင်းအထိဆိုရင်တော့စစ်ကောင်စီစခန်းနည်းနည်းပါးပါးပဲကျန်တော့တယ်။ တပ်မဟာ၆ထဲမှာဆို ဗျူဟာတစ်ခုနှစ်ခုဝေါလေတို့လောက်ပဲကျန်တော့တယ်။ ကျန်တဲ့ဟာကျွန်တော်တို့လက်ထဲအကုန်ရောက်ကုန်ပါပြီလို့ပြောလို့ရတယ်။ နောက်ဆုံး ပြောရမယ်ဆိုရင်တနင်္သာရီတိုင်းမှာရေးထားဝယ်ကားလမ်းမကြီးကိုထိန်းချုပ်လာတာအထူးသဖြင့်၂၀၂၃ဇွန်လက စပြီးတော့ကျွန်တော်တို့၈၀ရာခိုင်နှုန်းကျော်ကျော်ကိုထိန်းချုပ်ပြီးတော့လုပ်လာအခုတစ်နှစ် ပြန်ဖြစ်လာတဲ့ အခါမှာအမှတ်၈ပြည်ထောင်စုလမ်းမကြီးကိုပြန်လည်ထိန်းချုပ်နိုင်ဖို့အတွက်စစ်ကောင်စီဖက်ကလည်း ကျားကုတ်ကျားခဲပြန်လည်ကြိုးစားနေတယ်။ အခုကလည်း တိုက်ပွဲတွေ အများကြီးဖြစ်နေတယ်။ အဲ့ဒီဒေသမှာ။ပုံမှန်အားဖြင့်ကတော့ပျောက်ကျားတိုက်ပွဲတွေကတော့နေ့ တိုင်းလိုလိုဖြစ်တယ်ဆိုတာကျွန်တော်တို့တွေ့ရတယ်။

မေး-တိုင်းရင်းသားလက်နက်ကိုင်တွေ တိုက်အားအားကောင်းနေတဲ့အချိန်၊ စစ်ကောင်စီ နိုင်ငံရေးအရ ဘေးကျပ် နံကျပ် ဖြစ်နေတဲ့ အချိန်၊ ဒီအချိန်မှာ တရုတ်ရဲ့ ကြားဝင်မှုနဲ့အတူ ဖိအားတွေများလာတဲ့အပေါ် ဘယ်လိုမြင်ပါသလဲ။

ဖြေ- အဲ့ဒါကတော့ ရိုးရိုးလေးပါ။ ကျွန်တော်တို့က တော်လှန်ရေးလုပ်တယ်ဆိုကတည်းက ခက်ခဲဆုံး နဲ့ စိန်ခေါ်မှုများတဲ့အလုပ်ကို လုပ်ရတာပါ။ တော်လှန်ရေးမလုပ်ဖူးတဲ့ သူတွေကျတော့မနက်ဖန်သဘက်ခါ ပြီးတော့မလားဆိုတဲ့ ပြောဆိုဝေဖန် သူတွေရှိတယ်။ ဒါပေမယ့် ကျွန်တော်တို့ ဖြတ်သန်း လာမှုအရကတော့ ဖိအားတွေကကိုယ့်အတွင်းထဲမှာရှိသလိုအပြင်မှာလည်း ရှိတယ်။ မြောက်ပိုင်းမှာ ရှိတဲ့ကျွန်တော်တို့ ညီအစ်ကိုတွေ ရင်ဆိုင်နေရတာကတော့အိမ်နီးချင်းနိုင်ငံနဲ့ သွားဆက်နွယ်တဲ့ဟာ ဖြစ်တယ်။ နောက်ပြီးတော့ ပထဝီနိုင်ငံရေးနဲ့ပါ ဆက်စပ်နေတဲ့ အခါကျတော့အချိန်ကာလတစ်ခုတော့ ရင်ဆိုင်ကြုံတွေ့ရမယ့် စိန်ခေါ်ချက်ကိုတော့ မလွဲမသွေကြုံတွေ့ရမှာပါဘဲ။ ဒါပေမယ့်တော်လှန်ရေး ဆိုတာ ဘယ်အချိန်မှာ ဘယ်လို လုပ်သင့်တယ်ဆိုတာ ကျွန်တော်တို့ တော်လှန်ရေးသမားတွေ ကောင်းကောင်းသိတယ်။ ဘယ်အချိန်မှာ အဟုန်ပြင်းပြင်းနဲ့ ပြန်ပြီးတော့ ပြန်ပြီးတော့ ထိုးနှက်ရမလဲ ဆိုတာ သိတဲ့အပေါ်မှာဘယ်အနားမှာ ယိုကွက်ရှိတယ်ဆိုတာကျွန်တော်တို့ အသိဆုံးပါ။ အဲ့ဒါကြေင့်ကျွန်တော်တို့ကတော့ဘယ်လို ပြင်ပ ဖိအားတွေလာပါစေအသေအချာ ယုံကြည်တယ်။ ဘယ်လို ကျော်လွားပြီး အသက်ရှင်ရပ်တည်မလဲ။ ကောင်းကောင်းသိတယ်။ အချိန် တစ်ခုရောက်လာရင် ဒီလို အနှောင့်အယှက် အတားအဆီးတွေကို ကျော်ဖြတ်ဖောက်ထွက်မယ်ဆိုတာ သေချာပါတယ်။ စစ်ကောင်စီက ဘာဘဲလုပ်လုပ်၊ ဟိုဘက်ကပ်လိုက်၊ ဒီဖက်ကပ်လိုက်။ ဒါလည်း ကျွန်တော်တို့ အများကြီးတွေ့ကြုံခဲ့ရဖူးတယ်။လွန်ခဲ့တဲ့နှစ်ပေါင်းသုံးလေးငါးဆယ်အတွင်းမှာ စစ်ခေါင်းဆောင်တွေ ဘာဘဲလုပ်နိုင်သလဲဆိုတော့ဒီနိုင်ငံမှာ ကွန်မြူနစ် သူပုန်တွေရှိတယ်ဆိုရင်အဲ့ဒီနိုင်ငံကို သွားရောက် ခယဝပ်တွားပြီးတော့မျက်နှာငယ်လေးနဲ့ သွားအသနားခံတာတွေလုပ်တာ။ ဒါတွေကကျွန်တော်တို့ တောက်လျှောက်ခံလာခဲ့ရတော့ကျွန်တော်တို့က သိတယ်။အတွင်းဖိအား အပြင်ဖိအား ဆိုတာရှိပါတယ်။ ကျွန်တော်တို့ဘာမှ စိုးရိမ်စရာ မရှိဘူး။ ကျွန်တော်တို့ အသေအချာ ယုံကြည်တယ်။ ဒီဖိအားတွေကို ကျွန်တော်တို့ ညီအစ်ကိုတွေ ကောင်းကောင်း ကျော်လွှားနိုင်မယ်။ လက်ချင်းချိတ်နိုင်တဲ့အနေအထားကိုတော့ ရောက်ကို ရောက်လာမယ်။

မေး- ဟုတ်ကဲ့အခုရခိုင်ပြည်ဖက်ကိုလှည့်ကြရအောင်ပါ။ ရခိုင်မှာ အာရက္ခတပ်တော် ( AA) စစ်ကောင်စီရဲ့ စခန်းတွေအများအပြားကို သိမ်းပိုက်ပြီး နယ်မြေ ၉၀ ရာနှုန်းလောက်ကို သိမ်းပိုက် ထိန်းချုပ်ထားပါတယ်။ ဒီအခြေအနေကိုဘယ်လိုသုံးသပ်ပါသလဲ။

ဖြေ- အဲ့ဒါကတော့ကျွန်တော်တို့ လုံးဝ သံသယမရှိပါဘူး။ ဖိအားတွေအတွင်းကပဲလာလာအပြင်ကဘဲ လာလာကျော်လွားနိုင်ပြီးတော့ ပန်းတိုင်ကိုရောက်မှာပါ။ သေချာတယ်။ အဲ့ဒီလို ဘာဖြစ်လို့ ပြောရသလဲဆိုတော့ ရခိုင်တော်လှန်ရေးအဖွဲ့တွေနဲ့ ကျွန်တော်တို့ ကရင် တော်လှန်ရေးအဖွဲ့တွေက ဝေးဝေးလံလံရှိနေတဲ့ သူတွေ မဟုတ်ဘူး။ နီးနီးကပ်ကပ်ရှိတဲ့သူတွေပဲဖြစ်တယ်။ သမိုင်းကြောင်းအရ ပြောရမယ်ဆိုရင်မင်းနေပြည်တော်စပြိုကွဲကတည်းကရခိုင်တော်လှန်ရေးကရှိခဲ့တာပဲ။ဒါပေမယ့် တော်လှန်ရေးက ပေါ်လိုက် ပျောက်လိုက်၊ ပေါ်လိုက် ပျောက်လိုက်ဖြစ်သွားတာ။ ကျွန်တော်တို့ လက်ထက်မှာ ရှိလာတဲ့အခါအထူးသဖြင့် ဗိုလ်မှူးခိုင်မိုးလင်းတို့ခရီးရှည်ရှည်တိုက်ပွဲဆိုတာကောင်းကောင်းသိခဲ့တယ်။ ကျွန်တော်တို့ငယ်ငယ်ကတည်းက အရမ်း လေးစားပြီးတော့ လေ့လာခဲ့တဲ့ အရာတွေ ဖြစ်တယ်။ ကျွန်တော်တို့ကျောင်းသားဘဝ ဗိုလ်မှူးခိုင်မိုးလင်း ဘယ်လိုပြန်ပြီးတော့ ဆင်းသွားတယ်။ ဘယ်လိုဖြတ်ကျော်ပြီးတော့ရခိုင်ကို ထိုးဖောက် သွားတယ်ဆိုတာကောင်းကောင်း သိတယ်။ အဲ့ဒါအပြင်ကျွန်တော်တို့လက်ထက်ရောက်လာတယ်။ အထူးသဖြင့် ဗိုလ်ချုပ်ခိုင်ရာဇာတို့ ပင်လယ်ပြင်ကိုဖြတ်ပြီးတော့ဖဒိုမူးလွယ်တို့လက်တွဲပြီးတော့ပင်လယ်ကိုဖြတ်ပြီးတော့အာဇာနည်ပီပီ အသက်ဆုံးရှုံးသွားခဲ့ကြရတယ်။ တချို့တွေဆို ဆယ်စုနှစ်ထိအန္ဒိယထောင်ထဲမှာ ကျသွားတယ်ဆိုတာကျွန်တော်တို့ကောင်းကောင်းသိနေတဲ့ အပေါ်မှာ ဒီတော်လှန်ရေးက ဘယ်လိုမှ မကျဆုံးနိုင်ဘူး။ တနေ့သောအခါမှာ ပြန်ပြီးတော့ဦးမော့လာပြီးတော့အရာရာကိုချေမှုန်းနိုင်မယ်ဆိုတာကျွန်တော်တို့ သိနေတယ်။ ကျွန်တော်တို့ဘယ်လောက်ဘဲ ဖိဖိ၊ ဖိလေကြွလေပဲဆိုတာအချိန်တန်တဲ့ တနေ့မှာ ဒါကို ကျော်ဖြတ်နိုင်မယ်ဆိုတာ လေးလေးနက်နက် ယုံကြည်တယ်။ ကရင်တော်လှန်ရေးနဲ့ ရခိုင်တော်လှန်ရေးဆိုတာတကယ့်ညီအစ်ကိုတွေလက်တွဲလာတာလည်းနှစ်ပေါင်းကအများဆုံးဖြစ်တယ်ဆိုတာ ကျွန်တော်ပြောလို့ရတယ်။အခုကရခိုင်အေအေကအဓိကအရေးကြီးတဲ့နေရာကိုရောက်လာပြီနော်။ ဥပမာတစ်ခုပဲပြမယ်ဗြိတိသျှတွေကမြန်မာပြည်ကိုသိမ်းတဲ့အခါသူတို့ဘယ်နေရာကိုသိမ်းလဲဆိုတာ ရခိုင်နဲ့ တနင်္သာရီ ကမ်းရိုးတန်းကိုသိမ်းပါတယ်။ ဒါကတကယ့် မဟာဗျူဟာကျတဲ့နေရာဖြစ်တယ်။ ဒီဒေသမှာ ဘယ်သူတွေရှိလဲကျွန်တော်တို့ပဲရှိတယ်။ ကရင်နဲ့ ရခိုင်ပဲရှိပါတယ်။ မုတ္တမကွေ့အထိ ကော့သောင်းအထိ ကျွန်တော်တို့ရှိတဲ့နေရာတွေ။ အဲဒါကြောင့် မဟာဗျူဟာ အရမ်းကျတဲ့ဒေသကိုစိုးပိုင်နိုင်ပြီ ဆိုတော့ကျွန်တော်တို့သွားရမယ့်လမ်းကတော့ ဖြူးဖြူးလေးပဲ။မရောက်ခင်လေးတော့ကျွန်တော်တို့ကုန်းရုန်းပြီးတော့ လုပ်ရမယ်။ ကျွန်တော်တို့အားပေးတယ်။ ရခိုင်မှာ ကျန်တဲ့ သုံးလေးမြို့ဆိုတာ ဘာမှမဟုတ်တော့ဘူး။ အင်မတန်ခက်ခဲတဲ့ဟာတွေကို ကျော်လွှားပြီးတဲ့ နောက်မှာ ကျွန်တော်တို့ ယုံကြည်တယ်၊လက်တွဲသွားမယ်။ မြစ်ဝကျွန်းပေါ်နဲ့ရခိုင်ဆိုတာအနီးဆုံးဒေသတွေအောင်ပွဲဟာ လက်ထဲမှာပဲရှိတယ်လို့ပြောပါရစေ။

မေး- AA ရဲ့တိုက်ရည်ခိုက်ရည်နဲ့ဒီနေ့ စစ်ရေးဗျူဟာကို ဘယ်လို မြင်လဲ။

ဖြေ- ကျွန်တော်တို့ ဘက်မှာကျတော့ကိုယ့်နေရာနဲ့ ကိုက်ညီတဲ့ချွေစစ်ကိုသွားနေတဲ့ အခါကျတော့တဆင့်ချင်း ဖြည်းဖြည်းမှန်မှန်သွားနိုင်တယ်။ ဒါပေမယ့် အေအေရဲ့ အနေအထားကတော့ တခါတည်းကိုပုံအောနိုင်တဲ့ အနေအထားမှာရှိတယ်။ ပုံအောနိုင်တယ် အနေအထားဆိုတာကလည်း ချက်ချင်းလက်ငင်း ဘယ်လိုမှမအောနိုင်ဘူး။ဒါပေမယ့် အချိန်ကာလများစွာယူပြီးတော့ အသံတိတ်တိတ်၊ ခြေသံလုံလုံနဲ့လုပ်နိုင်တဲ့အခါ၊ ဒါကတော့ရှင်းရှင်းလေးပဲ။ အဲ့ဒီအခွင့်အလမ်း ကျွန်တော် ပြောခဲ့တဲ့ အရှိန်နဲ့အဟုန်နဲ့ပေါ့နော်။ အချိန်ကာလကိုရောက်လာပြီ၊အခုကစစ်ကောင်စီက ခွေးရူးတွေ ဖြစ်ပြီးတော့ ပတ်ရှာရမ်းပြီးတော့အရင်ကတော့လှန်ရေးကကျွန်တော်တို့ကရင်တစ်ခုထဲကစတဲ့ အနေအထားက တပြည်လုံးကိုဖြန့်ချလာတဲ့အခါမှာ သူကခွေးရူးလိုဖြစ်ပြီးတော့ ဟိုကိုက်ရ ဒီကိုက်ရပတ်ချာလည်ပြီးတော့ ဘယ်လိုမှ လှုပ်လို့မရတဲ့ အနေအထား တစ်ခုရောက်သွားပြီ။ အဲဒါကြောင့်မို့လို့ကျွန်တော်တို့ ဆက်တွန်းဖို့ပဲလိုပါတယ်။ ဒါကြောင့်မို့လို့ကျွန်တော်မြင်တာကတော့အေအေရဲ့ စစ်ရေအနေအထားကကို နိုင်တဲ့အနေအထားကနေ ဆက်လုပ်နိုင်မယ်ဆိုတာ ကျွန်တော်တို့နဲ့ ခပ်မြန်မြန်လေးလက်တွဲနိုင်မယ်။ကျွန်တော်တို့ယူံကြည်ပါတယ်။

မေး- ရခိုင်တော်လှန်ရေးနဲ့ ဒီတော်လှန်ရေးကို ဝိုင်းရံနေ့ တဲ့ ရခိုင်ပြည်သူတွေကိုအမှတ်တရ စကားပြောပေးပါအုံး။

ဖြေ- ကျွန်တော်တို့ ရခိုင်ကို တကယ်အားရတဲ့ အနေအထားမှာရှိပါတယ်။ တချိန်တုန်းကလည်း အချိန်တစ်ခု မရောက်လာသေးတဲ့အခါမှာ အမျိုးမျိုးအပြောအဆို ခံရတာတွေအများကြီးရှိပါတယ်။ တက်တက်ကြွကြွမရှိတာတွေ ဖြတ်ဖြတ်လတ်လတ်မရှိတာတွေ ဘာပဲဖြစ်ဖြစ်တော်လှန်ရေးကို အုံလိုက်ကျင်းလိုက် မလုပ်နိုင်တဲ့ဟာတွေကတော့ အားမရတာတွေကရှိခဲ့ဖူးတယ်။ ဒါပေမယ့် ဒီနေ့အချိန်ကာလမှာ တကယ်အားရတဲ့ အနေအထားတစ်ခုကိုရောက်သွားပြီ။ လမ်းဆုံးကို မရောက်သေးပေမယ့်အထူးသဖြင့်တော်လှန်ရေးကမပြီးဆုံးသေးပေမယ့်တော်တော်လေး အလင်းရောင်သန်းလာတဲ့ အနေအထားတစ်ခုမှာ တွန်းလက်စနဲ့တွန်းကြပါ။ ကျွန်တော်တို့ရဲ့ ဗိုလ်ချုပ်မြ ပြောခဲ့သလိုပဲတော်လှန်ရေးကပန်းတိုင်နီးလေလေအခက်အခဲအကြမ်းတမ်းဆုံးနေရာများလေလေ။ ဒါပေမယ့် အဲ့ဒါဘယ်လိုမှ လက်လျော့လို့မရဘူး။ ကျော်ဖြတ်ပြီး ပန်းတိုင်ကိုယူကြပါစို့လို့ပဲရခိုင်ပြည်သူတွေကို အားပေးချင်ပါတယ်။

(ပြီး)

#ရန်ကုန်