မွေးရာပါစအိုမပါ၍ အူကနေမစင်စွန့်ရသူ ၆လအရွယ်ကလေးငယ်ကို ရန်ကုန်တွင်ခွဲစိတ်ရန် ငွေကြေးအခက်အခဲဖြစ်နေ

သဥ္ဇာနွယ်

နိရဥ္စရာ၊ စက်တင်ဘာ ၁၄/ ၂၀၂၁

ရခိုင်ပြည်နယ်၊ ပုဏ္ဏားကျွန်းမြို့နယ်၊ သင်းပုန်းတန်းကျေးရွာမှ မွေးရာပါ စအိုမပါ၍ အူကိုအပြင်ကို ထုတ်ကာ မစင်စွန့်နေရသည့် ကလေငယ်တစ်ဦး ရန်ကုန်တွင်သွားရောက်ပြီး ခွဲစိတ်မှုပြုလုပ်ရန် ငွေကြေးအခက်အခဲ ကျရောက်နေကြောင်း သတင်းရရှိသည်။

၎င်းကလေးငယ်မှာ ပုဏ္ဏားကျွန်းမြို့နယ် သင်းပုန်းတန်းကျေးရွာမှ ဦးထွန်းထွန်းမင်းနှင့်ဒေါ်မတင်ဦးတို့၏ သား အသက် ၆လ အရွယ် မောင်ရဲထက်လင်းဖြစ်ကြောင်း သိရသည်။

ကလေး၏မိဘနှစ်ပါးမှာ ငါးဖမ်း၊ ငါးရှာထွက်၍ တစ်ရက်စာ တစ်ရက်ရှာဖွေ လုပ်ကိုင် စားသောက်နေရသည့်အတွက် ဆေးကုရန် လိုအပ်သည့်ငွေပမာဏကို မတတ်နိုင်ဟုလည်း ပြောသည်။

လက်ရှိတွင် အဆိုပါကလေးငယ်အတွက်လိုအပ်သည့်ငွေကြေးများကို သင်းပုန်းတန်းရွာ ဖွံ့ဖြိုးတိုးတက်ရေး လူငယ်များအသင်းက ဦးဆောင်ကောက်ခံနေကြောင်း သိရသည်။

လက်ရှိအချိန်တွင် ကလေးငယ်သည် ကျန်းမာရေးကောင်းမွန်နေသော်လည်း ဝမ်းဗိုက်မှ ဖောက်ထားသည့်အူမှာ အနည်းငယ်ရှည်ထွက်လာသဖြင့် စိုးရိမ်နေရသည်ဟု မိခင်ဖြစ်သူက ပြောသည်။