ပုဏ္ဏားကျွန်းတွင် ဖမ်းဆီးခံထားရသည့် အရပ်များအထဲက ၈ဦးကို စစ်တွေတပ်ရင်းတစ်ခုသို့ပို့ဆောင်

ပုဏ္ဏားကျွန်းတွင် ဖမ်းဆီးခံထားရသူ အရပ်သားများအထဲက ၈ဦးကို စစ်တွေတပ်ရင်းတစ်ခုသို့ပို့ဆောင်

နိရဥ္စရာ၊ဇွန် ၁၈၊ ၂၀၂၂

ရခိုင်ပြည်နယ်၊ ပုဏ္ဏားကျွန်းမြို့ အခြေစိုက် ခမရ ၅၅၀တပ်ရင်းတွင် ဖမ်းဆီးခံထားရသည့် အရပ်သားများအထဲက ၈ဦးကို စစ်တွေမြို့ရှိ တပ်ရင်းတစ်ခုသို့  ဇွန်လ ၁၇ရက်နေ့ ညနေပိုင်းတွင် ပို့ဆောင်လိုက်သည်ဟု သိရကြောင်း မိသားစုဝင်များကပြောသည်။

စစ်တွသို့ပို့ဆောင်ခံလိုက်ရသူများမှာ ပြီးခဲ့သည့် ဇွန်လ ၁၆ရက်နေ့တွင် စစ်ကောင်စီတပ်က နေအိမ်များအထဲသို့ ဝင်ရောက်လာပြီး ဖမ်းဆီးခြင်းကိုခံလိုက်ရသည့် ပုဏ္ဏားကျွန်းမြို့ စံပြရပ်ကွက်မှ ကိုမျိုးသွင်၊ ဦးဘလှိုင်၊ ဦးထွန်းလှိုင်၊ ဦးကျော်မင်း၊ ဦးမောင်ဝင်းသန်းနှင့် အခြားအမျိုးသား ၃ဦးတို့ဖြစ်ကြသည်။

အပြစ်မရှိဘဲ နေအိမ်အထိ လာရောက်ဖမ်းဆီးခြင်းကိုခံခဲ့ရသလို မိသားစုများနှင့် အဆက်အသွယ် ဖြတ်ကာ စစ်တွေသို့ ပို့ဆောင်လိုက်သည့်အတွက် စိုးရိမ်ပူပင်နေကြရသည်ဟု အမည်မဖော်လိုသည့် ဖမ်းဆီးခံအမျိုးသား တစ်ဦး၏ သားဖြစ်သူက နိရဥ္စရာကိုပြောသည်။

“ကျွန်တော့်အဖေအပါအဝင် ၈ယောက်လို့တော့သိရတယ်။ ဒီထက်လည်းများနိုင်တယ်ပေါ့။ စစ်တွေက

ဘယ်တပ်ရင်းကို ပို့လိုက်တာလဲဆိုတာတော့ မသိရသေးဘူး။ စစ်တွေကိုပို့ခံရတာတော့ သေချာပါတယ်။ ကျွန်တော်တို့ အဖေမှာ ဘာအပြစ်မှမရှိဘဲ အခုလိုဖမ်းဆီးခံလိုက်ရတော့ အရမ်း စိတ်မကောင်းလည်း ဖြစ်သလို ဒေါသလည်း ထွက်ပါတယ်”ဟု ပြောဆိုသည်။

ယင်းအပြင် ယနေ့ဇွန်လ ၁၈ရက်နေ့တွင်လည်း ဖမ်းဆီးထားသည့် မြို့ခံအမျိုးသား ၄၀ကျော်ခန့်တွင် ၃၀ခန့်ကို ပြန်လည် လွတ်ပေးခဲ့သော်လည်း ကျန် ၁၀ ဦးခန့်ကို မလွှတ်ပေးဘဲ  ခမရ ၅၅၀ တပ်ရင်းက အတင်းဓမ္မ လုပ်အားပေးစေခိုင်းနေသည်ဟု  ခိုင်မာသည့် မြေပြင် သတင်းရင်းမြစ်တစ်ခုကပြော သည်။

“ဖမ်းဆီးခံရတဲ့သူတွေက အကုန်လုံးဘေးတွဲဆိုင်ကယ်မောင်းနေကြတဲ့ သူတွေဖြစ်တယ်။ ဖမ်းဆီးထားတဲ့ လူများ ထဲက ၃၀လောက်မှာ အိမ်ထောင်စုစာရင်းနဲ့မယားတွေ၊ မိသားစုတွေက မှတ်ပုံတင်တွေပြလို့ လာထုတ်သွား ခဲ့တယ်။ ကျန်တဲ့လူတွေက အထောက်အထား မပြနိုင်လို့ဆိုပြီးတော့ ဘေးတွဲဆိုင်ကယ်တွေကို တပ်ရင်းရှေ့မှာ တန်းစီရပ်ထားပြီးတော့ ကင်းစခန်း သုံးခု ဆောက်ခိုင်း ထားတယ်”ဟု ဆိုသည်

စစ်ကောင်စီတပ်သားများက ဆောက်လုပ်ခိုင်းထားသည့် ကင်းပုန်းစခန်းနေရာ ၃ခုမှာ အောင်မင်္ဂလာကန် ရှေ့တွင် တစ်ခု၊ အေးစေတီအနီးရှိ လူပျံလက်ဖက်ခြောက်ထုတ်ရောင်းချနေသည့် ဆိုင်ရှေ့တွင် ၁ခုနှင့် ဦးရာဇ်မြေလက်ဖက်ရည်ဆိုင် ရှေ့တွင် ၁ခုတို့ဖြစ်ကြသည်။

“ဖမ်းထားလူတွေကများတော့ နာမည်တွေကိုတော့မရသေးဘူး။ ဘေးတွဲသမားတစ်ယောက်ကိုလည်း တပ်ရင်းထဲ မှာ ကြိုးနဲ့တုတ်နှောင်ချည်ထားသေးတယ်”ဟုဆိုသည်။

ပြီးခဲ့သည့် ဇွန်လ ၁၆ရက်နေ့တွင် ၅၅၀တပ်ရင်းမှ စစ်ကောင် စီတပ်ဖွဲ့ဝင် ၂ ဦးကို AAကဖမ်းဆီးခဲ့ရာ တစ်ဦးကို ဖမ်းဆီးရရှိခဲ့သော်လည်း နောက်တစ်ဦးမှာ လွှတ်မြောက်သွားခဲ့ပြီးနောက် မြို့ခံအရပ်သားများမှာ အကြောင်းမဲ့ ယခုလိုဖမ်းဆီး ခံနေရခြင်းဖြစ်သည်ဟုသိရသည်။  (  NN-11)