မင်းပြားမြို့နယ်တွင် တိုက်ပွဲဆက်ဖြစ်၊ ရွာသားများ ဘေးလွတ်ရာသို့ထွက်ပြေး

ရေးသူ: Web Master
| ရက်စွဲ: ၁၈ ဇွန် ၂၀၁၉
| ကြည့်ရှုသူ: 10.2k

နိရဥ္စရာ၊ ဇွန် ၁၈ ∕ ၂ဝ၁၉

မင်းပြားမြို့နယ်၊ ပြင်ယောင်းအုပ်စု၊ သာစည်ကျေးရွာနှင့် ထိန်ပြင်အုပ်စု၊ ရွှေကျင်ကျေးရွာ အကြားတွင် ယနေ့ နံနက် ၇ နာရီမှ စတင်ပြီး ၈ နာရီအထိ မြန်မာတပ်မတော်နှင့် ရက္ခိုင်တပ်တော် (AA) တို့အကြား တိုက်ပွဲဖြစ်ပွားခဲ့သဖြင့် ရွာသားများ ကြောက်လန့်ပြီး ရွာကို စွန့်ခွာ ထွက်ပြေးသွားခဲ့ကြသည်ဟု သတင်းရရှိသည်။

တိုက်ပွဲမှာ နံနက် ၇ နာရီမှ ၈ နာရီကျော်အထိ အပြန်အလှန်ပစ်ခတ်ကြပြီး တိုက်ပွဲမှာ ပြင်းထန်ကာ လက်နက်ကြီး ကျည်များ ရွာအနီးတွင် ကျရောက်ပေါက်ကွဲမှုများရှိသည်ဟုလည်း ပြင်ယောင်းအုပ်ချုပ်ရေးမှူးက ပြောကြားသည်။

ခွဆုံကျေးရွာမှ ချင်းလူမျိုးများသည် ပြင်းယောင်းအုပ်စု ငတာချင်းကျေးရွာသို့လည်းကောင်း၊ သာစည်ကျေးရွာနှင့် ရွှေကျင်ကျေးရွာမှ ရွာသားများသည် ပြင်ယောင်း၊ အိုးပျဉ်ထောင်နှင့် ပွဲရကံဆိပ် ကျေးရွာသို့ ထွက်ပြေးခဲ့ကြသည်ဟု သိရသည်။

“ ရွာနားမှာ လက်နက်ကြီးကျည်တွေကျတာတွေရှိတယ်။ ဒါကြောင့် ကြောက်ပြီးထွက်ပြေးကြတယ်။ ကျွန်တော်တို့ရွာကိုလည်း ထွက်ပြေးလာကြတဲ့သူတွေရှိပါတယ်။ လူပေါင်း ၁ဝဝ လောက်ရှိမယ်ထင်တယ်။ ပြန်တဲ့သူတွေလည်း ပြန်ကြတာတွေရှိပါတယ်” ဟု ပြင်ယောင်းအုပ်ချုပ်ရေးမှူးက ပြောကြားသည်။

တိုက်ပွဲ ဖြစ်ပွားပြီးနောက် မြောက်ဦးအမှတ် ၅၄ဝ ဘက်မှ လက်နက်ကြီးဖြင့် ပစ်ခတ်မှုများရှိခဲ့သည်ဟု ဒေသခံများက ပြောဆိုသည်။

၎င်းကျေးရွာများ အနီးတစ်ဝှိုက်တွင် တပ်ပွဲများ နေ့စဉ် ရက်ဆက်ဆိုသလို ဖြစ်ပွားနေကြောင်း သတင်းရရှိသည်။