ပြင်ယောင်းရွာပစ်ခတ်မှု အသေအပျောက်မရှိဟု ကျေးရွာအုပ်ချုပ်ရေးမှူး အတည်ပြုပြောဆို


နိရဥ္စရာ၊ ဇွန်လ ၂၇/၂ဝ၁၉

ရခိုင်ပြည်နယ်၊ မင်းပြားမြို့နယ်၊ ပြင်ယောင်းရွာတွင် ဇွန်လ ၂၆ ရက်နေ့ ညနေက စစ်တပ်မှ ပစ်ခတ်မှု တစ်ချို့ရှိခဲ့သော်လည်း လူသေဆုံးမှု၊ ဒဏ်ရာရရှိမှု မရှိကြောင်း ပြင်ယောင်းကျေးရွာ အုပ်ချုပ်ရေးမှူး ဦးဝေလှအောင်က နိရဥ္စရာ သတင်းဌာနသို့ ပြောဆိုသည်။
 
ပြင်ယောင်းကျေးရွာတွင် စစ်တပ်က ပစ်ခတ်မှုကြောင့် ရွာသား ၄ ဦးသေဆုံးပြီး သုံးလေးဦးခန့် ဒဏ်ရာ ရရှိသွားခဲ့ကြောင်း လူမှုကွန်ယက် စာမျက်နာပေါ်တွင် သတင်းများပျံ့နှံ့နေသဖြင့် ကျေးရွာ အုပ်ချုပ်ရေးမှူးသို့ ဆက်သွယ်မေးမြန်းစဉ် ကျေးရွာအုပ်ချုပ်ရေးမှူးက ထိုသတင်းအပေါ် ငြင်းဆိုသည်။

“ သေဆုံးတာမရှိပါဘူး။ တစ်ယောက်မှ သေဆုံးတာမရှိပါဘူး။ ဒီနေ့မနက်ကတည်းက စစ်ဆေးပြီးပါပြီ။ စစ်တပ်က ရွာထဲဝင်လာတော့ ရွာသားတွေ ရွာကနေထွက်ပြေးတဲ့အခါ ပစ်ခတ်မှု တစ်ချို့တော့ ရှိခဲ့ပါတယ်။ လူတွေကို ပစ်တာလား၊ မိုးပေါ်ခြောက်လှန့်ပစ်တာလား ကျွန်တော်လည်း မသိဘူး” ဟု အုပ်ချုပ်ရေးမှူး ဦးဝေလှအောင်က ပြောကြားသည်။

တစ်ခြားရွာသားတစ်ဦးဖြစ်သူ ဦးညီညီသို့ ဆက်သွယ် မေးမြန်းရာတွင်လည်း သေဆုံးထိခိုက် ဒဏ်ရာရရှိခြင်း မရှိဟု ပြောဆိုသည်။

“ စစ်တပ်က ရွာပြင်မှာနေတော့ ရွာသားတွေက ရွာအနောက်ဘက် သင်္ချိုင်းမှာကြောက်ပြီး ထွက်ပြေးပုန်းအောင်းနေကြတယ်။ စစ်တပ်က ရွာထဲကို ဝင်လာတော့ သင်္ချိုင်းမှာ ပုန်းနေတဲ့ လူတွေ ထွက်ပြေးကြတော့ စစ်တပ်က လက်နက်ငယ်တွေနဲ့ ပစ်တယ်။ လက်နက်ကြီးသံလည်း ပေါက်တာ တစ်ခုကြားရတယ်။ ဒါပေမယ့် တစ်ယောက်ကိုမှ ထိတာ မရှိပါဘူး။ ဖြစ်တာက မနေ့ ညနေ ၄ နာရီခန့်မှာပါ” ဟု ပြောကြားသည်။

ထိသို့ ထွက်ပြေးကြရာ  ယေင်္ာကျား ၃ဝ ခန့်သည် အနီးအနားရှိ ပန်းမြောင်းရာသို့ ရောက်ရှိသွားခဲ့ကြပြီး ညအိပ်နေခဲ့ကြရသည်ဟု ပြင်ယောင်းရွာသား တစ်ဦးက နိရဥ္စရာသို့ ပြောဆိုသည်။

ထိုသို့ ရွာသားများ ကစဉ့်ကလျားထွက်ပြေးကြသဖြင့် ရွာသားတစ်ချို့ သေဆုံးမှုရှိကြောင်း လူမှုကွန်ယက်စာမျက်နာအပေါ် သတင်းများ ပျံ့နှံ့လာခဲ့သည်။

Share: