ရခိုင်တွင် လေယာဉ်လက်မှတ်စျေးနှုန်းများ ရက်ပိုင်းအတွင်း တဟုန်ထိုး မြင့်တက်

ရေးသူ: Web Master
| ရက်စွဲ: ၀၃ ဧပြီ ၂၀၂၂
| ကြည့်ရှုသူ: 722

သဥ္ဇာနွယ်

နိရဥ္စရာ၊ ဧပြီ ၂ / ၂၀၂၂

ရခိုင်ပြည်နယ်ရှိ လေကြောင်းခရီးစဉ်များ၏ လေယာဉ်လက်မှတ်စျေးနှုန်းများမှာ ရက်ပိုင်းအတွင်း တဟုန်းထိုး မြင့်တက်လာနေကြောင်း သိရသည်။

မတ်လအတွင်းက စစ်တွေမှ ရန်ကုန်သို့ လေယာဉ်လက်မှတ်စျေးမှာ လက်မှတ် ၁ စောင်လျှင် ကျပ် ၆၅,၀၀၀ မှ ၇၅,၀၀၀ အထိသာရှိခဲ့ရာမှ ယခုဧပြီလအစပိုင်းမှစတင်ကာ ကျပ် ၉၀,၀၀၀ မှ ၁၁၀,၀၀၀ ကျော်အထိ စျေးနှုန်းများမြင့်တက်နေသည်ဟု လေယာဉ်လက်မှတ်အရောင်းဆိုင်များက ပြောသည်။

သင်္ကြန်ကာလအတွင်း အချို့ လေယာဉ်လိုင်းများ မဆွဲတော့သောကြောင့် စျေးတက်ရခြင်းဖြစ်နိုင်သည်ဟု လေယာဉ်လက်မှတ်ရောင်းသူ မငြိမ်းငြိမ်းအေးက နိရဥ္စရာကိုပြောသည်။

"စျေးက ဒီရက်ပိုင်းအတွင်းတက်တာပါ။ သင်္ကြန်နဲ့ခရီးသည်တွေအသွားအလာများတော့။ အရင်ကလို လေကြောင်းလိုင်းတွေ အကုန်မထွက်တော့ ကျန်တဲ့လိုင်းတွေက စျေးတက်ကုန်တာ"ဟု ပြောသည်။

စစ်တွေရှိ Sun Moon လေယာဉ်လက်မှတ်အရောင်းဌာနပိုင်ရှင် ဒေါ်မိုးနှင်းငယ်ကလည်း မည်သည့်အတွက် ယခုကဲ့သို့ စျေးနှုန်းများ မြင့်တက်ခြင်းကို မသိကြောင်း ပြောသည်။

"စျေးက ဘာလို့တက်တာလဲတော့ မသိဘူး။ ဆီစျေးတွေကြောင့်လား။ စိတ်တွေလည်း ညစ်တယ်"ဟု ပြောသည်။

လက်မှတ်စျေးနှုန်းများမြင့်တက်နေသော်လည်း မကြာမီ သင်္ကြန်ကာလကျရောက်လာတော့မည်ဖြစ်၍ လေယာဉ်လက်မှတ်များမှာ ဧပြီလ ၁၈ ရက်နှင့် ၁၉ ရက်အထိ လက်မှတ်များကုန်လုနီးပါးဖြစ်နေပြီဟုလည်း အရောင်းဌာနများမှ သိရသည်။

ရခိုင်တွင် စစ်တွေ-ရန်ကုန်၊ စစ်တွေ-မန္တလေး၊ စစ်တွေ-နေပြည်တော်၊ စစ်တွေ-သံတွဲ၊ စစ်တွေ-ကျောက်ဖြူနှင့် စစ်တွေ-မာန်အောင်ခရီးစဉ်များသို့ လေကြောင်းလိုင်းများ ပြေးဆွဲလျက်ရှိသည်ဟု သိရသည်။