သဉ္ဇာနွယ်၊ နိရဉ္စရာ၊ ဇူလိုင် ၁၂/ ၂၀၂၅

ရခိုင်ပြည်အတွင်း စစ်ကောင်စီထိန်းချုပ်မှုအောက်တွင်နေရသည့် စစ်တွေနှင့် ကျောက်ဖြူမြို့တွင်းမှ ပိတ်မိနေသည့်ဒေသခံများသည် မြို့ပြင်သို့ ထွက်ခွင့်ပေးရန် တောင်းဆိုနေကြောင်း သတင်းရရှိသည်။

ရခိုင်ပြည်စစ်ကောင်စီရုံးစိုက်ရာ စစ်တွေမြို့တွင် ကုန်ဈေးနှုန်းကြီးမြင့်ပြီး အလုပ်အကိုင်မရှိဖြစ်နေသည့်အတွက် မြို့တွင်းမှ စစ်ရှောင် လက်လုပ်လက်စား၊ ဆင်းရဲနွမ်းပါးသူများမှာ ငတ်ပြတ်နေသည့်အနေအထားသို့ ရောက်ရှိနေ၍ မြို့ပြင်ရှိ မိမိနေရပ်နှင့် ကျေးရွာများဖက်တွင် လုပ်ကိုင်စားသောက်နိုင်ရန် ထွက်ခွာခွင့်ပေးသင့်သည်ဟု စစ်တွေမြို့နယ်မှ စစ်ရှောင်အမျိုးသမီးတစ်ဦးက နိရဉ္စရာကို ပြောသည်။

"အခုမြို့တွင်းမှာပိတ်မိနေတာ တစ်နှစ်ကျော်လောက်ရှိနေပြီ။ ကျမတို့က စစ်တွေမြို့ပြင်ကရွာပါ။ အိမ်ရှိတယ်။ လုပ်စားဖို့နေရာရှိတယ်။ စစ်ကောင်စီဖက်က အတင်းနှင်ထုတ်ထားလို့ အိုးမဲ့အိမ်မဲ့ဘဝနဲ့နေနေရတာ။ အခုမြို့ထဲမှ ဘာအလုပ်မှမရှိဘူး။ ကျွေးရင်စား၊ လှူရင်စားရတဲ့ဘဝ။ ငတ်နေကြပြီ။ အစိုးရဆီကလည်း မထောက်ပံ့တော့ဘူး။ အဲဒါကြောင့် ကျမတို့နေရပ်ပြန်ချင်တယ်။ ဒါမှမဟုတ်ရင်တောင် မြို့ပြင်ထွက်ပြီး ဟင်းရှာ၊ ငါးရှာခွင့်ပေးသင့်တယ်"ဟု ပြောသည်။

ဗျိုင်းဖြူရွာ၊ ကျေးတောပိုက်ဆိပ်ရွာတို့အပါအဝင် စစ်တွေမြို့နှင့် အနီးတဝိုက်ရှိ ကျေးရွာအများအပြားရှိဒေသခံများကို စစ်ကောင်စီတပ်က ပြီးခဲ့သည့် ၂ဝ၂၄ ခုနှစ်၊ မိုးတွင်းမှစတင်ကာ ရွာမှ အတင်းနှင်ထုတ်ထားပြီး စစ်တပ်ကားများဖြင့်သယ်ဆောင်ကာ စစ်တွေမြို့တွင်းရှိ ဘုန်းကြီးကျောင်းအချို့ထံ ပို့ဆောင်ထားခဲ့သည်။

သူတို့နှင့်အတူ ငွေကြေးမတတ်နိုင်၍ စစ်ဘေးတိမ်းရှောင်ခွင့်မရဘဲ စစ်တွေမြို့ထဲ ပိတ်မိနေသူအများစုသည်လည်း စားရေးသောက်ရေး အလွန်တရာကျပ်တည်းလျက်ရှိပြီး ဒေသခံအလှူရှင်အချို့၏ လှူဒါန်းမှုများကို မျှော်ကိုးနေရသည်ဟု သိရသည်။

ရန်ကုန်သို့ စစ်ရှောင်မည်ဆိုပါကလည်း အလုပ်အကိုင်မရှိသည့်အပြင် အိမ်ငှားစရိတ်ကြီးမားမှု၊ ဆွေမျိုးမရှိမှု၊ စစ်ကောင်စီ၏ဖမ်းဆီးခြင်းကိုခံရမှုကြောင့် မူလရပ်ရွာများနှင့် အာရက္ခတပ်တော်(AA)ထိန်းချုပ်ရာ လွတ်မြောက်နယ်မြေများတွင် လုပ်ကိုင်စားသောက်နိုင်ရေး ထွက်သွားခွင့်ပေးရန် တောင်းဆိုခြင်းဖြစ်သည်ဟု ဒေသခံများက ပြောသည်။

ဓာတ်ပုံ - စစ်တွေမြို့တွင်းရှိ ပိတ်မိနေသည့် ရခိုင်ပြည်သူများအား တွေ့ရစဉ်။

အလားတူ ကျောက်ဖြူမြို့နယ်တွင်လည်း ကုန်ဈေးနှုန်းအပြင် ဆန်များဈေးအဆမတန်မြင့်နေ၍ ဆန်ကိုလုယက်ဝယ်ရကာ ငတ်ပြတ်သည့်သူများလည်းရှိနေသည်ဟု အမျိုးသမီးတစ်ဦးက နိရဉ္စရာကိုပြောသည်။

"ဈေးထဲမှာ အလုအယက်ဝယ်ရတယ်။ တန်းစီးပြီးဝယ်ရတာ။ ဟိုတလောက ဆန်မရလို့ ရန်ဖြစ်တဲ့အဆင့်ထိတောင်ဖြစ်သေးတယ်။ ငတ်တဲ့သူကလည်း ငတ်နေပြီ။ ဈေးကလည်း ဆန်ချေတစ်တောင်းတောင် ကျပ်ငါးသောင်းလောက်ရှိတယ်။ အလုပ်အကိုင်မရှိတဲ့သူက များတယ်။ နယ်ကလူတွေ အိမ်ကိုမပြန်လိုက်ရလို့ မြို့ထဲမှာနေနေရတဲ့သူလည်း ရှိတယ်။ သူတို့ဆို ပိုဆိုး။ စားဝတ်နေရေးအဆင်မပြေတာ" ဟု ပြောသည်။

အာရက္ခတပ်တော်(AA)နှင့် စစ်ကောင်စီဖက်ကလည်း မြို့ထဲပိတ်မိနေသူများ ထွက်ခွာနိုင်ရန် တိုက်ပွဲများနှင့် စစ်ရေးလှုပ်ရှားမှုများကို ရက်အကန့်အသတ်ဖြင့် ရပ်ဆိုင်းပြီး လမ်းများကိုဖွင့်ပေးစေလိုကြောင်း သူမက ပြောသည်။

"တိုက်ပွဲက မြို့နဲ့လည်းနီးကပ်လာပြီ။ ကျမအနေနဲ့ နှစ်ဦးနှစ်ဖက်ညှိနှိုင်းပြီး ကျမတို့ပြည်သူတွေ အဆင်ပြေအောင် စစ်ရှောင်ခွင့်ပေးစေချင်တယ်။ လမ်း သုံးရက်ဆို သုံးရက်ဖွင့်ပေး။ ပစ်တာခတ်တာမရှိစေချင်ဘူး။ အဲဒီသုံးရက်အတွင်း မြို့တွင်းကပိတ်မိနေတဲ့လူတွေ အကုန်ထွက်။ အဲလိုသဘောမျိုးပြောတာပါ" ဟု ပြောသည်။

မြို့တွင်း ပိတ်မိနေသူများမှာ အလုပ်အကိုင်ရှားပါးပြီး စားဝတ်နေရေးအလွန်ကျပ်တည်းလာသည့်အတွက် ယခုကဲ့သို့ နှစ်ဦးနှစ်ဖက်ကိုတောင်းဆိုရခြင်းဖြစ်သည်ဟု ဆိုသည်။

စစ်တွေနှင့် ကျောက်ဖြူမြို့တွင်းပိတ်မိနေသူများမှာ ရရာလမ်းကြောင့်ဖြင့် မြို့ပြင်သို့ထွက်ခွာပါကလည်း စစ်ကောင်စီတပ်သားများ၏ ဖမ်းဆီးခြင်း၊ ငွေညှစ်ခြင်းတို့ကို ခံနေကြရသည်ဟု သိရသည်။

စစ်တွေနှင့် ကျောက်ဖြူရှိ ဒေသခံများကို အဆုံးအဖြတ်တိုက်ပွဲများ ဖြစ်လာနိုင်သဖြင့် ပြည်သူများ အဆင်ပြေသည့်နည်းလမ်းဖြင့် လွတ်မြောက်နယ်မြေများသို့ ထွက်ခွာကြရန် အာရက္ခတပ်တော် (AA) စစ်ဦးစီးချုပ် ဗိုလ်ချုပ်ထွန်းမြတ်နိုင်က ပြီးခဲ့သည့် ၂ဝ၂၄ ခုနှစ်၊ ဧပြီ ၁၀ ရက်တွင် ကျရောက်သော AA ၏ ၁၅ နှစ်ပြည့်မွေးနေ့တွင် ပေးပို့သည့်သဝဏ်လွှာတွင် တိုက်တွန်းပြောဆိုခဲ့ကြောင်း သိရသည်။

ယင်းနောက် စစ်တွေနှင့် ကျောက်ဖြူကို AA က ပြီးခဲ့သည့် ဖေဖော်ဝါရီလမှစတင်ကာ ထိုးစစ်ဆင်တိုက်ခိုက်ခဲ့သော်လည်း လက်ရှိတွင် စစ်တွေမြို့နယ်အတွင်း တိုက်ပွဲဖြစ်ပွားမှု ရပ်တန့်နေပြီး တရုတ်စီမံကိန်းများတည်ရှိရာ ကျောက်ဖြူမြို့နယ်တွင် တိုက်ပွဲပြင်းထန်လျက်ရှိသည်ဟု သိရသည်။

---

ကျနော်တို့မီဒီယာဆက်လက်ရှင်သန်ရပ်တည်နိုင်ရေးအတွက် လူကြီးမင်းတို့ရဲ့ အားပေးမှုနဲ့ အကူအညီတွေကို အထူးလိုအပ်နေပါတယ်။ ဒီလင့် https://donorbox.org/narinjara-news ကနေတဆင့် ကူညီနိုင်ပါတယ်။ လူကြီးမင်းတို့ရဲ့ ကူညီထောက်ပံ့မှုအတွက် ကျေးဇူးအထူးတင်ပါတယ်။

#အာဆီယံ