(တော်လှန်ရေး တစ်စုံလုံးကိုကြည့်ရင် ရခိုင်ပြည်သူတွေကိုရော AA ကိုရောတကယ်ကိုအတုယူစရာလို့မြင်ပါတယ်)

လူထက်နိုင် (ဒွါရာမြီ)- နိရဉ္စရာ၊ဒီဇင်ဘာ၂၃ / ၂၀၂၄

မွန်အမျိုးသား လက်နက်ကိုင် ၄ ဖွဲ့က မွန်တော်လှန်ရေးတပ်များအားလုံး ပါဝင်သည့် တစ်ခုတည်းသောမွန်တပ်တော် ပေါ်ထွန်းလာရေးကို အကောင်အထည်ဖော်ရန် သဘောတူညီခဲ့ကြကြောင်း ဒီဇင်ဘာ၁၉ ရက်နေ့က ပူးတွဲကြေညာချက် ထုတ်ပြန်ခဲ့သည်။

အဆိုပါ မွန်လက်ကိုင် ၄ ဖွဲ့မှာ မွန်ပြည်လွတ်မြောက်ရေးတပ်တော် (MLA)၊ မွန်ပြည်ကာကွယ်ရေးတပ်(MSDF)၊မွန်ပြည်တော်လှန်ရေးတပ် (MSRF)နှင့် မွန်အမျိုးသားလွတ်မြောက်ရေးတပ်မတော်(MNLA-AD) တို့ ဖြစ်ကြသည်။

အဆိုပါ ၄ ဖွဲ့၏ စစ်ရေးဆိုင်ရာပူးပေါင်း ဆောင်ရွက်ရေးအစည်းအဝေးကို ၂၀၂၄ ခုနှစ် ဒီဇင်ဘာလ(၁၈) ရက်နေ့တွင် တော်လှန်ရေးနယ်မြေ တစ်နေရာ၌ ပြုလုပ်ခဲ့သည်။

ထိုအစည်းအဝေးမှ မွန်တော်လှန်ရေးတပ်များအားလုံး ပါဝင်သည့် တစ်ခုတည်းသော မွန်တပ်တော် ပေါ်ထွန်းလာရေးကို အကောင်အထည်ဖော်ရန် သဘောတူညီခဲ့ကြောင်းအဆိုပါအဖွဲ့လေးဖွဲ့၏ထုတ်ပြန်ချက်တွင် ပါရှိသည်။

ပထမအဆင့်အနေဖြင့် တပ်ဖွဲ့ (၄) ဖွဲ့မှ ပူးတွဲစစ်ရေးလှုပ်ရှားမှုများ ပြုလုပ်သွားရန် သဘော တူညီခဲ့သည်ဟု သိရသည်။

blob

အဆိုပါ တစ်ခုတည်းသော မွန်တပ်တော် ပေါ်ပေါက်ရေးနှင့် ပတ်သက်ပြီး မွန်အမျိုးသားလွတ်မြောက်ရေးတပ်မတော်(MNLA-AD) ပြောရေးဆိုခွင့်ရှိသူ နိုင်ကောင်းစတားကို နိရဉ္စရာသတင်းဌာက ဆက်သွယ်မေးမြန်းရာ သူက ယခုလို စတင်ပြောဆိုသည်။

“ စစ်ရေးအရရော နိုင်ငံရေးအရရောပေါ့။ ဒီလိုမျိုးပေါင်းစည်းခြင်းအားဖြင့် ပိုပြီးတော့ စကစကိုတိုက်ခိုက်နိုင်မယ်လို့ယုံကြည်ပြီး ဒီလိုမျိုး တပ်တော်တစ်ခု တည်ထောင်လိုက်တာပါ”ဟု ပြောသည်။

မွန်အမျိုးသား လက်နက်ကိုင် ၄ ဖွဲ့မှာ ရည် မှန်းချက်လည်းတူသလို ဘုံရန်သူလည်တူသဖြင့်ယခုကဲ့သို့ တစ်ခုတည်းသော မွန်တပ်တော်ပေါ်ပေါက်လာရေးမှာ ပြည်တွင်း ပြည်ပရှိ မွန်လူထု၏ဆန္ဒနှင့်လည်း ကိုက်ညီသည်ဟု ပြောသည်။

“ ဒီတပ်အတော် တစ်ခုတည်း အကောင်အထည်ဖော်ဖို့ကျွန်တော်တို့ မြေပြင်တပ်မှူးတွေမှာ ဘယ်လိုမျိုး ပူးတွဲစစ်ဆင်ရေးတွေ လုပ်ကြမလဲဆိုတာလည်း ဆွေးနွေးချက်တွေရှိခဲ့တယ်။ နောက်ကျွန်တော်တို့ကိုထောက်ပံ့ပေးနေတဲ့ပြည်ပမှာရော ပြည်တွင်းကရော မွန်ပြည်သူလူထုတွေကဒီလိုမျိုး မြင်စေချင်တာပေါ့ဗျာ။မွန်တပ်တွေ ရည်မှန်းချက်လည်း တူတယ်။ဘုံရန်သူလည်တူတယ်။မွန်တပ်တစ်ခုထဲဖြစ်ရင်ပိုပြီး ထိရောက်မယ်ဆိုပြီးအမြဲလိုလို တောင်းဆိုတယ်တွန်းအားပေးတဲ့ သဘောလဲရှိတယ်။အဲဒီတော့ မွန်လူထုရဲ့ သဘောနဲ့လည်းတထပ်ထဲဖြစ်သွားအောင် ခုလို တစ်ခုတည်းသော မွန်တပ်တော်ဖြစ်အောင် အကောင်အထည်ဖော်ဖို့ ဖြစ်လာရတာပါ ”ဟုပြောသည်။

မွန်လက်နက်ကိုင် အဖွဲ့ ၄ ဖွဲ့မှာ တစ်ဖွဲ့နှင့် တစ်ဖွဲ့ ပေါက်ဖွားလာပုံမတူသော်လည်း တစ်စုတစ်စည်းတည်း တော်လှန် တိုက်ပွဲဝင်ပါက ပိုပြီးထိရောက်နိုင်မည်ဟုလည်း MNLA ပြောရေးဆိုခွင့်ရှိသူ နိုင်ကောင်းစတားက ထပ်လောင်းပြောဆိုသည်။

"မွန်ဒေသ မွန်ပြည်နယ်ထဲမှာရှိတဲ့ကျွန်တော်တို့ တော်လှန်ရေး အင်အားစုတွေမွန်တပ်လေးတပ်ပေါ့။ ပေါက်ဖွားလာတဲ့ ရည်ရွယ်ချက်ချင်း မတူပေမယ့်လည်းကိုယ့်နည်းကိုယ့်ဟန်နဲ့တိုက်ပွဲဝင်နေမယ့်အစားတစ်စုတစ်စည်းထဲတပြိုင်နက်တိုက်ပွဲဝင်ရင်ပိုပြီး ထိရောက်မယ်ဆိုတဲ့ရည်မှန်းချက်အပေါ်မှာဆုံးဖြတ်ချက်ချတာပါ။ ပထမဆုံး အချိန် ဆုံးဖြတ်ချက်ချနိုင်တဲ့သဘောပေါ့နော်။ တော်တော်လေး ဆွေးနွေးပြီးမှဆုံးဖြတ်ချက်ချနိုင်တဲ့သဘောပါ“ဟုပြောသည်။

၎င်းအပြင်ရခိုင်ပြည်တွင် စစ်ကောင်စီစခန်းများကို တစ်ခုပြီး တစ်ခုသိမ်းပိုက်နေပြီးတိုင်းစစ်ဌာနချုပ်တစ်ခုကိုပါ သိမ်းပိုက်ခဲ့သောအရက္ခတပ်တော် ( AA) အားဂုဏ်ယူလေးစားပြီးအတုယူရမည်ဟုလည်း နိုင်ကောင်းစတားက ပြောသည်။

“ အေအေကိုတော့ကျွန်တော်တို့နွေဦးတော်လှန်ရေးမှာ တော်တော်လေးကိုအားရပါတယ်။ ကျွန်တော်တို့ သတင်းတွေလည်း ကြားပါတယ်။ကျွန်တော်တို့ကိုယ့်ကြမ္မာကိုယ်ဖန်တီးဖို့အတွက် တိုက်ပွဲဝင်နေခြင်းဟာတရားသောစစ်ဟာ အောင်မြင်နေပြီလို့သုံးသပ်ကြပါတယ်။ ကျွန်တော်တို့တိုင်းရင်းသားတွေနှစ် ၇၀ကျော်တိုက်ပွဲဝင်နေတာမတရား တောင်းဆိုတာ မဟုတ်ဘူး။ တရားသော စစ်ဟာနိုင်မယ့် တစ်နေ့ကိုရောက်ရှိနေပြီ။ ရခိုင်ကိုကြည့်ခြင်းအားဖြင့် ကျွန်တော်တို့လည်း ကျွန်တော်တို့လည်း ဂုဏ်ယူမိတယ်။ အေအေလိုဖြစ်အောင်ပေါ့နော်။ အခုဆိုရင်မြို့တွေ တပ်ရင်းတွေသိမ်းနိုင်ပြီး တိုင်းစစ်ဌာနချုပ်တစ်ခုကိုတောင် အပြုတ်တိုက်နိုင်ပြီဆိုတော့ အခုဒါကျွန်တော်တို့လည်း ဒီလိုမျိုးဖြစ်အောင်ကြိုးစားရမယ်ဆိုပြီး စိတ်ဓာတ်ကခိုင်မာသွားတဲ့သဘောရှိတယ်။ တော်လှန်ရေး တစ်စုံလုံးကိုကြည့်ရင် ရခိုင်ပြည်သူတွေကိုရော အေအေကိုရော တကယ့်ကိုအတုယူစရာလို့မြင်ပါတယ်” ဟုပြောသည်။

စစ်တပ်အာဏာသိမ်းပြီးနောက်ပိုင်း ပေါ်ပေါက်လာသည့် မွန်လက်နက်တော်လှန်ရေး အင်အားစု ၄ ခုသည် တစ်ခုတည်းသော မွန်တပ်တော်ပေါ်ထွန်းရေး အတွက် ကြိုးပမ်းနေချိန်တွင် ကနဦး အဆင့်အနေဖြင့် ဗျူဟာမြောက်စစ်ရေးဆိုင်ရာ ပူးပေါင်းဆောင်ရွက်မှုများ စတင်လုပ်ဆောင်သွားမည် ဖြစ်ကြောင်း သိရသည်။

မွန်ပြည်ကာကွယ်ရေးတပ် (MSDF)ကို ၂၀၂၁ ခုနှစ် စက်တင်ဘာလတွင် စတင် ဖွဲ့စည်းပြီး မွန်နှင့် ကရင် ဆက်စပ်ဒေသများဖြစ်ကြသည့် ကျိုက်မရော၊ ကော့ကရိတ်၊ ဂျိုင်းမြစ်ဝှမ်းနှင့် တနင်္သာရီတိုင်း ရေး၊ ရေဖြူမြို့နယ်တို့ တွင် စစ်ရေးလှုပ်ရှားလျက်ရှိသည်ဟု သိရသည်။

အာဏာသိမ်းပြီးနောက်ပေါ်ပေါက်လာသည့် မွန်ပြည်တော်လှန်ရေးတပ် (MSRF)ကို ပြီးခဲ့သည့် နှစ်ကုန်ပိုင်းက မွန်ပြည်ဖက်ဒရယ်ကောင်စီတပ် အဖြစ် ရပ်တည်ခဲ့ပြီးလက်ရှိတွင် တနင်္သာရီတိုင်းရေဖြူ၊ မွန်ပြည်နယ် ရေးမြို့နယ်တို့တွင် စစ်ရေးလှုပ်ရှားနေသည်။

မွန်ပြည်လွတ်မြောက်ရေးတပ်တော် (MLA) မှာ မြောက်ပိုင်း မဟာမိတ် ၃ဖွဲ့ အနက် တစ်ခုဖြစ်သည့်တအာင်း အမျိုးသား လွတ်မြောက်ရေး တပ်တော် (TNLA) ထံတွင်စစ်ပညာ သင်ယူခဲ့ပြီးနောက်၂၀၂၂ ခုနှစ်စက်တင်ဘာလတွင် မွန်ပြည်နယ်တွင်စတင်လှုပ်ရှားခဲ့သည်။လက်ရှိတွင် ၎င်းတို့၏အဓိက စစ်ရေးလှုပ်ရှားမှု နယ်မြေမှာ ကျိုက်မရော၊ ကျုံဒိုး၊ ကော့ကရိတ် မြို့နယ်တို့ ဖြစ်သည်။

မွန်အမျိုးသား လွတ်မြောက်ရေးတပ်မတော် (စစ်အာဏာရှင်တိုက်ဖျက်ရေး) (MNLA – AD) အဖွဲ့မှာသက်တမ်းရင့်တိုင်းရင်းသားလက်နက်ကိုင်အဖွဲ့ ဖြစ်သည့် မွန်ပြည်သစ်ပါတီမှယခုနှစ်ဖေဖော်ဝါရီ လတွင် ခွဲထွက်လာသည့် တပ်ဖြစ်သည်။

အင်အား ၃၀၀ နီးပါးရှိသည့် ထိုအဖွဲ့မှာ မွန်ပြည်နယ် မုဒုံ၊ ကျိုက်မရော၊ ရေး၊ သံဖြူဇရပ်၊ ကရင်ပြည်နယ် ကြာအင်းဆိပ်ကြီးနှင့်ကော့ကရိတ်မြို့နယ်တို့တွင်စစ်ရေးလှုပ်ရှားနေသည့်အဖွဲ့ဖြစ်ကြောင်းသိရှိရသည်။

blob