NLD ပြန်ကြားရေးတာဝန်ခံ မုံရွာအောင်ရှင် ကွယ်လွန်

ချစ်အိလှိုင်

နိရဥ္စရာ၊ နိုဝင်ဘာ ၂၈/ ၂ဝ၂၁

ဖမ်းဆီးခံနေရာမှ လွန်ခဲ့သည့် အောက်တိုဘာ ၁၈ ရက်နေ့က ပြန်လည်လွတ်မြောက်လာသည့် NLD  ပြန်ကြားရေး တာဝန်ခံ မုံရွာအောင်ရှင်သည် ယနေ့နိုဝင်ဘာ ၂၈ ရက် နံနက် ၆ နာရီခန့်က နှလုံးရောဂါဖြင့် ကွယ်လွန်ကြောင်း သတင်းရရှိသည်။

၄င်း၏ဇနီးဖြစ်သူက “ အခု မနက် ၆ နာရီခွဲမှာဆုံးတယ်။ နှလုံးသွေးကြောပိတ်တာ။ အရင်က ပန်းနာရင်ကြပ်ပဲရှိတာ။ အခုနောက်ပိုင်းမှဖြစ်တဲ့အခြေအနေပါ” ဟု မီဒီယာများသို့ ပြောဆိုသည်။

မုံရွာအောင်ရှင်မှာ အမျိုးသားဒီမိုကရေစီအဖွဲ့ချုပ် (NLD) မှ ပြန်ကြားရေးတာဝန်ခံတစ်ဦး ဖြစ်သည်။

၄င်းမှာ နှလုံးသွေးကြောပိတ်သည့်ရောဂါဖြင့် ယမန်နေ့က ဆေးရုံကဆင်းလာပြီးနောက် ၄င်း၏ နေအိမ်မှာ ယနေ့ နံနက်က ကွယ်လွန်ခဲ့ခြင်းဖြစ်ကြောင်း နိုင်ငံရေးသုံးသပ်လေ့လာသူ

ဦးမောင်မောင်စိုးက ပြောသည်။

“ ဆေးရုံကပြန်ဆင်းလာပြီးဒီနေ့မနက်ဆုံးတာ။ ကိုအောင်ရှင်ဖုန်းနံပါတ်တွေကလည်း ထောင်ကထွက်လာပြီးတော့ အကုန်ပြောင်းကုန်တာ” ဟုပြောသည်။

၄င်းမှာ စစ်တပ်အာဏာသိမ်းပြီးနောက်ပိုင်းဖေဖော်ဝါရီ ၁ ရက်နေ့ဖမ်းဆီးခံခဲ့ရပြီး ပြန်လွတ်လာပြီး အောက်တိုဘာ ၁၈ ရက်နေ့တွင် ပြန်လွတ်လာခဲ့သည်။