ကယားပြည်နယ်ဖယ်ခုံတိုက်ပွဲတွင် ကျဆုံးသွားခဲ့သည့် ရဲဘော်၁၀ဦး၏ ဈာပနပြုလုပ်

ရေးသူ: Web Master
| ရက်စွဲ: ၀၈ ဇူလိုင် ၂၀၂၂
| ကြည့်ရှုသူ: 4.4k

နိရဉ္စရာ၊ ဇူလိုင် ၈/၂၀၂၂

ကယားပြည်နယ်(ကရင်နီပြည်နယ်) ဖယ်ခုံမြို့နယ်အတွင်း စစ်ကောင်စီတပ်နှင့် တော်လှန်ရေးအင်အားစုများအကြားဖြစ်ပွားခဲ့သည့် တိုက်ပွဲအတွင်း ကျဆုံးသွားခဲ့သည့် ရဲဘော် ၁၀ ဦးအတွက် ဈာပနအခမ်းအနားကို ဇူလိုင် ၆ ရက်နေ့က ပြုလုပ်ခဲ့သည်ဟု သတင်းရရှိသည်။

ကယားပြည်နယ် အခြေစိုက် ကန္တာရဝတီတိုင်း(မ်) ၎င်းကျဆုံးခဲ့ရသည့် ရဲဘော်များမှာ ကရင်နီ အမျိုးသားများကာကွယ်ရေးတပ် (KNDF) ရဲဘော် ၉ ဦး နှင့် Mobye PDF ရဲဘော် ၁ ဦး တို့ ဖြစ်ကြသည်ဟု ဖော်ပြသည်။

၎င်းတို့မှာ ဇူလိုင် ၄ ရက်နေ့က စစ်ကောင်စီတပ် တပ်စွဲထားသည့် လွယ်ပသာကုန်းစခန်း သွားရောက်တိုက်ခိုက်သည့်တိုက်ပွဲတွင် ပါဝင်သူများဖြစ်ကြသည်ဟု သိရသည်။

၎င်းတိုက်ပွဲမှာ ၎င်းနေ့က တစ်နေကုန်နီးပါး ဖြစ်ပွားခဲ့ပြီး KNDF B-03 တပ် ရဲဘော် ၈ဦး၊ KNDF B-11 တပ်က ရဲဘော် ၁ဦး၊ KA မှ ရဲဘော် ၁ဦး နှင့် Mobye PDF မှ ရဲဘော် ၁ဦး စုစုပေါင်း ကရင်နီဒေသခံ ကာကွယ်ရေးပူးပေါင်းတပ်ဖွဲ့မှ ၁၁ ဦး ကျဆုံးခဲ့သည်ဟု ကန္တာရဝတီတိုင်း(မ်)က သတင်းဖော်ပြသည်။

ကရင်နီတပ်မတော် KA မှ ကျဆုံးသွားခဲ့သည့် ရဲဘော် တစ်ဦးကိုလည်း ဇူလိုင် ၆ရက်နေ့ ညနေ ၄ နာရီအချိန် ဖရူဆိုမြို့နယ်မှာ ဈာပန အခမ်းအနားပြုလုပ် သဂြိုင်္လ်ခဲ့သည်ဟု သိရသည်။

၎င်းတိုက်ပွဲအတွင်းအတွင်း စစ်ကောင်စီတပ်ဖက်မှ ၄၀ ဦး သေဆုံးခဲ့ပြီးဒဏ်ရာရရှိသူ များပြားကြောင်း ဒေသခံ ကာကွယ်ရေး ပူးပေါင်းတပ်ဖွဲ့၏ ထုတ်ပြန်ချက်ကို ကိုးကားပြီး ကန္တာရဝတီတိုင်း(မ်) က သတင်းဖော်ပြသည်။