ကယားပြည်နယ် ဘော်လခဲသွားရာလမ်းပေါ်တိုက်ပွဲဖြစ်၊ စစ်ကောင်စီတပ်မှ ၈ဦးသေ၊ ၁ဦး အရှင်ဖမ်းမိထားဟု KnIC ဆို

နိရဉ္စရာ၊ ဧပြီ ၂၁ / ၂၀၂၃

ကရင်နီ (ကယား) ပြည်နယ် ဒီးမော့ဆိုမြို့နယ် ဒေါညေးခူရွာအနီး ဘော်လခဲမြို့သွားသည့်လမ်းမပေါ်၌ စစ်ကောင်စီတပ်နှင့် ကရင်နီလက်နက်ကိုင်ပူးပေါင်းတပ်ဖွဲ့တို့ ဧပြီ ၁၉ ရက်က တိုက်ပွဲဖြစ်ပွားခဲ့ရာ စစ် ကောင်စီဖက်က ၈ဦးသေဆုံးပြီး ၁ဦး အရှင်ဖမ်းမိခဲ့ကြောင်း ကရင်နီစစ်ဖက်ဆိုင်ရာဗဟို ပြန်ကြားရေး တာဝန်ခံ ခူးညေးရယ် က နိရဉ္စရာ သတင်းဌာနကို ပြောသည်။

ဧပြီ ၁၉ ရက် နေ့လယ် ၁နာရီခန့်က ခလရ (၈၀) တပ်ရင်းမှ စစ်ကားများသည် ဘော်လခဲဖက်သို့အသွား လမ်းမပေါ်တွင် KA ၊ KNDF ပူးပေါင်းတပ်ဖွဲ့တို့နှင့် တိုက်ပွဲဆက်ဖြစ်ပွားခဲ့ခြင်းဖြစ်ကြောင်း ခူးညေးရယ် က ပြောသည်။

‘’ဧပြီ ၁၉ရက် နေ့လယ် ၁နာရီလောက်က ဘော်လခဲဖက်သွားတဲ့လမ်းပေါ်မှာ စစ်ကားတစ်စီးမိုင်းထိ တယ်၊ နောက်ကစစ်ကားတစ်စီးနဲ့ KA နဲ့ KNDF တပ်တွေတိုက်ပွဲဖြစ်တော့ စကစ ဖက်က ရှစ်ယောက် သေတယ်၊ တစ်ယောက်အရှင်ဖမ်းမိတယ်၊ လက်နက်ခြောက်လက်နဲ့ ကျည်ဆန်တွေလည်း ရလိုက် တယ်။’’

အဆိုပါနေ့က အရှင်ဖမ်းမိထားသည့်သူမှာ ခလရ ၈၀ တပ်မှ အခြားအဆင့်ရှိသူဖြစ်ပြီး အသေးစိတ်တော့ မသိရသေးကြောင်း၊ ပြီးခဲ့သည့်မတ်လအတွင်း ဖမ်းမိထားသူများနှင့်ပေါင်းလျှင် အရှင်ဖမ်းမိထားသူ ၆ဦးရှိ ပြီဖြစ်ကြောင်း ပြောသည်။

ဧပြီ ၁၆ ရက်ကတည်းက ဘော်လခဲမြို့နယ်ထဲ တိုက်ပွဲဖြစ်ပွားရာ စစ်ကောင်စီတပ်လေကြောင်းမှလည်း နေ့စဉ် ပစ်ခတ်တိုက်ခိုက်ခဲ့ပြီး တိုက်ပွဲမရှိသည့်နေ့များမှာလည်း ဘော်လခဲ၊ လွိုင်ကော်မြို့နယ်တဝိုက် လေယာဉ် နှင့် လာရောက်ထောက်လှမ်းတာမျိုးတွေရှိကြောင်း ပြောသည်။

ပြီးခဲ့သည့် ဧပြီ ၁၆ ရက်ကတည်းက ဒေါညေးခူရွာအနီး တိုက်ပွဲများပြင်းထန်ခဲ့ပြီး စစ်ကောင်စီဖက်က ၃၀ ကျော်အထိ သေဆုံးခဲ့ကာ လက်နက်အများအပြား ဆုံးရှုံးခဲ့သည့်အတွက် စစ်ကောင်စီဖက်က ထပ်မံစစ် ကြောင်းထိုးလာနိုင်သည့်အတွက် စစ်ရေးတင်းမာနေဆဲဖြစ်ကြောင်းလည်း ၎င်းက ပြောသည်။ NN – 24

Photo  ; KNIC