ရခိုင်လူမျိုးသိပ္ပံပညာရှင် ဒေါက်တာစောဝေလှခေါင်းဆောင်သည့်သိပ္ပံပညာရှင်အဖွဲ့က ကမ္ဘာ့ပထမဆုံးအက်တမ်တစ်လုံးချင်းစီ၏ X Ray ပုံရိပ်ကို ရယူနိုင်သည့်နည်းပညာအသစ်အားရှာဖွေတွေ့ရှိပြီဟု မြန်မာနိုင်ငံ နက္ခတ္တဗေဒနှင့်သိပ္ပံဝါသနာရှင်များအသင်း(Myanmar Astronomy and Science EnthusiastsSociety-MASES)ကထုတ်ပြန်သည်။

ဒေါက်တာစောဝေလှခေါင်းဆောင်ပါဝင်သည့်အမေရိကန်နိုင်ငံ အိုဟိုင်းအိုတက္ကသိုလ်မှ သိပ္ပံပညာရှင်အဖွဲ့က ယခုကဲ့သို့တွေ့ရှိခဲ့မှုကြောင့် အက်တမ်တစ်လုံးချင်းစီ၏ဂုဏ်သတ္တိများကို အသေးစိတ်လေ့လာနိုင်လာတော့မည်ဖြစ်ပြီး နောင်အနာဂတ်တွင် သဘာ၀ပတ်ဝန်းကျင်ဆိုင်ရာသိပ္ပံပညာဘာသာရပ်နဲ့ ဆေးသိပ္ပံပညာရပ်များတွင် များစွာအထောက်အကူပြုနိုင်မည်ဟုလည်းMASES အသင်း၏ဇူလိုင်လ ၁၄ ရက်ကထုတ်ပြန်ချက်တွင် ဖော်ပြထားသည်။

“လက်ရှိကုသရန်ခက်ခဲသော ရောဂါများအတွက်ကုသနည်း အသစ်တွေ ရှာဖွေလာနိုင်တော့မှာဖြစ်ပြီး လူသားမျိုးနွယ်အတွက်ကြီးမားတဲ့ အထောက်အပံ့ ဖြစ်စေလာမှာဖြစ်ပါတယ်”ဟုလည်း ထုတ်ပြန်ချက်တွင်ဖော်ပြထားသည်။

X Ray ကို ၁၈၉၅ ခုနှစ်တွင် စတင်တွေ့ရှိခဲ့သည်မှအစပြု၍နှစ်ပေါင်းများစွာကြာအောင် X Ray အား အသုံးပြုလိုပါကအက်တမ်အမြောက်အမြားပါရှိသည့် အရာတ္ထုများကိုသာ စူးစမ်းအသုံးပြုနိုင်ခဲ့ကြသည်ဟုသိ၇သည်။

ယင်းကြောင့် အက်တမ်အနည်းငယ်စီကိုX Ray အသုံးပြုစူးစမ်းနိုင်ရန်အတွက် သိပ္ပံပညာရှင်များကကြိုးစားလာခဲ့ကြသည်မှာ နှစ်ကာလ အတော်ကြာမြင့်နေခဲ့ပြီဖြစ်ပြီး ယခုမှဒေါက်တာစောဝေလှခေါင်းဆောင်သည့် သိပ္ပံပညာရှင်အဖွဲ့ကကမ္ဘာ့ပထမဆုံးရှာဖွေတွေ့ရှိခြင်းဖြစ်သည်။
 
ယခုတွေ့ရှိမှုကိုလုပ်ဆောင်သည့်သိပ္ပံပညာရှင်အဖွဲ့တွင် မြန်မာလူမျိုး ၂ ဦးပါဝင်သည်ဟုလည်း သိရသည်။

သူတို့မှာအဖွဲ့ခေါင်းဆောင်ဖြစ်သည့် အိုဟိုင်းအိုတက္ကသိုလ်မှ ရူပဗေဒနှင့် နက္ခတ္တဗေဒပညာဌာန၏ ပရော်ဖက်ဆာတစ်ဦးဖြစ်သော ဒေါက်တာစောဝေလှနှင့် Postdoc ပညာရှင်ဦးကျော်ဇင်လတ်တို့ဖြစ်ကြသည်ဟု သိ၇သည်။ (NN-16)

Photo – MASES