ရန်ကုန်ရှိ တီမောသံတမန်များကို မြန်မာစစ်ကောင်စီနှင်ထုတ်

မြန်မာနိုင်ငံရှိ အရှေ့တီမောသံရုံးမှ ယာယီသံရုံးတာဝန်ခံအား စက်တင်ဘာလ ၁ ရက်မတိုင်မီ မြန်မာနိုင်ငံမှထွက်ခွာရန် အသိပေးအကြောင်းကြားထားသည်ဟု မြန်မာစစ်ကောင်စီ နိုင်ငံခြားရေး ဝန်ကြီးဌာနမှ ယနေ့တွင် သတင်း ထုတ်ပြန်ထားသည်။

အဆိုပါ အသိပေးအကြောင်းကြားစာကို သြဂုတ်လ ၂၅ ရက်နေ့က ပေးပို့ အကြောင်းကြားထားခြင်း ဖြစ်ကြောင်း သိရှိရသည်။

မြန်မာ-တီမောလက်စ်တေ နှစ်နိုင်ငံ ဆက်ဆံရေးကို ထိခိုက်စေသည့် မြန်မာနိုင်ငံတွင် အကြမ်းဖက်မှုများကို အားပေးအားမြောက်ပြုလျှက် အကြမ်းဖက်မှုများကို ကျူးလွန်နေသည့် NUG နှင့် ထိတွေ့ ဆက်ဆံမှုများ ပြုလုပ်ခဲ့သည်ကို ဝန်ကြီးဌာနမှ သိရှိခဲ့သည်ဟု စစ်ကောင်စီ နိုင်ငံခြားရေးဝန်ကြီးဌာန ထုတ်ပြန်ချက်တွင် ဖော်ပြထားသည်။

ဇူလိုင်လ အစပိုင်းက အမျိုးသားညီညွတ်ရေးအစိုးရ NUG နိုင်ငံခြားရေးဝန်ကြီး ဒေါ်ဇင်မာအောင်နှင့် NUG ချက်ပြည်ထောင်စု သမ္မတနိုင်ငံ ကိုယ်စားလှယ် ဦးလင်းသန့်တို့ တီမောလက်စ်တေ အစိုးရသစ် ကျမ်းသစ္စာ ကျိန်ဆိုပွဲကို တက်ရောက်ခဲ့သည်။

အလားတူ တီးမောက်စ်တေးနိုင်ငံ သမ္မတ ဟိုဆေးရားမို့စ်ဟော်တာ ဖိတ်ကြားချက်အရ ဒေါ်ဇင်မာအောင် အရှေ့တီမောသို့ရောက်ရှိနေစဉ် တီမောလက်စ်နိုင်ငံ သမ္မတအား ဒေါ်ဆောင်ဆန်းစုကြည် ပုံတူပန်းချီကား ပေးအပ်ခဲ့ကြောင်းလည်း NUG နိုင်ငံခြားရေးဝန်ကြီးဌာနက ဇူလိုင်လ ၃ ရက်နေ့တွင် သတင်းထုတ်ပြန် ထားသည်။

တီမောလက်စ်တေ အစိုးရ၏ အဆင်ခြင်မဲ့ လုပ်ရပ်များမှာ နှစ်နိုင်ငံချစ်ကြည်ရင်းနှီးမှုကို ထိခိုက်စေသည်သာမက အကြမ်းဖက်အဖွဲ့အစည်းဖြစ်သည့် NUG မှ ကျူးလွန်လျှက်ရှိသည့် အကြမ်းဖက်ဆောင်ရွက်ချက်များကို ပိုမို လုပ် ဆောင်စေရန် အားပေးအားမြှောက် ပြုလုပ်ရာ ရောက်သကဲ့သို့ တီမောလက်စ်တေ အစိုးရ ပြောကြား ချက်နှင့် လုပ်ဆောင်ချက်များမှာ သံတမန်ရေးဆိုင်ရာ ဗီယင်နာ ကွန်ဗင်းရှင်းနှင့်လည်း မကိုက်ညီသည့်အတွက် အပြင်းအထန် ရှုတ်ချသည်ဟု စစ်ကောင်စီ ထုတ်ပြန်ချက်တွင် ဖော်ပြထားသည်။

မြန်မာနိုင်ငံမှာရှိနေသည့် အရှေ့တီမောနိုင်ငံက သံရုံးဝန်ထမ်းများ  စက်တင်ဘာ ၁ ရက်နေ့ နောက်ဆုံးထားပြီးထွက်ခွာကြရန်  မြန်မာနိုင်ငံခြားရေးဝန်ကြီးဌာနက ထုတ်ပြန်ကြေညာထားကြောင်း သံတမန်ရင်းမြစ်ကို ကိုးကားပြီး ပေါ်တူဂီအခြေစိုက် Lusa သတင်းကလည်း  သြဂုတ် ၂၆ ရက်က ဖော်ပြထားသည်။