ကချင်ပြည်နယ် ချီဖွေ နှင့် ပန်ဝါဒေသများ၌ မြေရှားသတ္တုတူးဖော်နေသည့်လုပ်ငန်းများကို စစ်ကောင်စီ က ရပ်တန့်ခိုင်းလိုက်သည့်အတွက် တရုတ်နိုင်ငံထဲ၌ မြေရှားသတ္တုဈေးနှုန်းများ စံချိန်တင်ဈေးတက် သွားကြောင်း ISP Myanmar က စက်တင်ဘာလ ၂၁ ရက် မနေ့က ထုတ်ပြန်ထားချက်အရ သိ၇သည်။

ပြီးခဲ့သည့် စက်တင်ဘာလ ၆ ရက်နေ့ကစပြီး စစ်ကောင်စီက သဘာ၀ပတ်ဝန်းကျင် သက်ရောက်မှုများ အပေါ် စစ်ဆေးဖို့ဆိုပြီး ပိတ်လိုက်သည့်အတွက် သတ္တုမိုင်းတွင်းလုပ်သားများလည်း နေရပ်ပြန်ကုန်ကြရ ကြောင်း သိ၇သည်။

စစ်ကောင်စီသည် မြေရှားသတ္တုတူးဖော်မှုကို တရားဝင်ခွင့်ပြုထားခြင်းမရှိကြောင်း နှင့် ဆက်မလုပ်ကြဖို့ တားမြစ်ထားသည်ဆိုပေမယ့် အဆိုပါလုပ်ငန်းကို လက်ဝါးကြီးအုပ်ဖို့ ကြံစည်နေခြင်းဖြစ်ကြောင်း ဒေသ ခံအရပ်ဖက်အဖွဲ့အစည်းများနှင့် ISP Myanmar တို့က ယူဆနေကြသည်။

ပြီးခဲ့သည့် ဩဂုတ်လမကုန်ခင်လောက်ကစပြီး စစ်ကောင်စီက အခုလိုရပ်တန့်ခိုင်းလိုက်သည့်အတွက် တစ်လအတွင်း Dysprosium အမျိုးအစား မြေရှားသတ္တု တစ်ကီလိုဂရမ်ကို အမေရိကန်ဒေါ်လာ ၃၂၀ ကနေ ၃၆၀ အထိ ဈေးတက်သွားပြီး Terbium မြေရှားသတ္တုအမျိုးအစားဟာလည်း တစ်ကီလိုဂရမ်ကို အမေရိကန် ဒေါ်လာ ၁၂၀၀ ဈေးဖြစ်ကာ တစ်လအတွင်း ဒေါ်လာနှစ်ရာအထိ ဈေးတက်သွားကြောင်းISP Myanmar က ဖော်ပြထားသည်။

မြေရှားသတ္တုဈေးကောင်းရနေသည့်အတွက် ၎င်းတို့အကျိုးစီးပွားအတွက် လက်ဝါးကြီးအုပ်ဖို့ စစ်ကောင် စီက ကြံစည်နေတာဖြစ်နိုင်ကြောင်း Kachin National Forum (KNF) အဖွဲ့၏ ပြောခွင့်ရသူဦးဇော် တောင် က နိရဉ္စရာ ကို ပြောသည်။

"စကစဘက်က တားမြစ်တာ/ရပ်ထားတာဟာ အရောင်ပြလုပ်နေတာလို့ပဲ မြင်ပါတယ်။ ဒီမြေရှားသတ္တု ကနေ စီးဆင်းတဲ့ဝင်ငွေတွေကို သူတို့အကျိုးစီးပွားအတွက် ထိမ်းချုပ်လို့ရအောင် တဖက်လှည့်နဲ့ ကြိုးပမ်း နေတာလည်း ဖြစ်နိုင်သလို၊ ဒီမြေရှားသတ္တုထွက်တဲ့ဒေသတွေကိုအုပ်စိုးချင်လို့ လုပ်ဆောင်နေတာလည်း ဖြစ်နိုင်ပါတယ်။ ဒီမြေရှားသတ္တု အဆမတန်တူးဖော်နေတာတွေကို ရပ်တန့်လာနိုင်အောင် နိုင်ငံတကာ ကနေလည်း ဖိအားပေးပါဝင်လာနိုင်အောင် ကျနော်တို့ အင်တိုက်အားတိုက် ကြိုးပမ်း၇ဦးမယ်။"

လက်ရှိအချိန်အထိ ကချင်ပြည်နယ်ထဲမှ မြေရှားသတ္တုလုပ်ငန်းမှရသည့် အမေရိကန်ဒေါ်လာ ဘီလီယံနှင့် ချီသည့်ဝင်ငွေများသည် စစ်ကောင်စီထံ စီးဆင်းခြင်းမရှိသည့်အတွက် စစ်ကောင်စီအနေနှင့် ပြန်လည် ကိုင်တွယ်ဖို့ ပြင်ဆင်နေတာဖြစ်နိုင်ကြောင်းလည်း ISP Myanmar က ဆိုထားသည်။

တရုတ်နိုင်ငံ ကျန်ဇီနှင့် ဂန်ဆုပြည်နယ်ထဲမှ မြေရှားသတ္တုတူးဖော်သည့်လုပ်ငန်းများကို တရုတ်အစိုးရက ပြီးခဲ့သည့် ဩဂုတ်လကုန်ပိုင်းကလည်းက ရပ်နားထားခဲ့ကြောင်းလည်း သိ၇သည်။

အခုလိုဖြစ်စဉ်နဲ့တစ်ချိန်တည်းမှာပဲ ယူနန်ပြည်နယ် နန်ကျန်းခရိုင်အစိုး၇ကိုယ်စားလှယ်အဖွဲ့တို့သည် ကချင်ပြည်နယ် မြစ်ကြီးနားမြို့ကို ဩဂုတ်လ ၂၄ နှင့် ၂၅ ရက်နေ့တွေက ရောက်လာပြီး စစ်ကောင်စီ၏ ကချင်ပြည်နယ်အစိုးရအဖွဲ့နှင့် တွေ့ဆုံဆွေးနွေးခဲ့ကြောင်း သိ၇သည်။

အဆိုပါဆွေးနွေးပွဲ၌ ကချင်ပြည်နယ် ဝန်ကြီးချုပ်၊ စီးပွားရေးဝန်ကြီးနှင့် သယံဇာတဝန်ကြီးတို့လည်း ပါဝင်ခဲ့သည့်အတွက် မြေရှားသတ္တုတူးဖော်တင်ပို့သည့်ကိစ္စရပ်များကိုလည်း ထည့်သွင်းဆွေးနွေးခဲ့ဖွယ်ရှိနိုင်မည်ဟု ယူဆ၇ကြောင်း ISP Myanmar က ဆိုထားသည်။

၂၀၂၃ ခုနှစ် ဇန်နဝါရီလမှ ဇူလိုင်လအထိ တရုတ်နိုင်ငံ၏ မြေရှားသတ္တုတင်ပို့မှု စုစုပေါင်းသည် အမေရိ ကန်ဒေါ်လာ ၁ ဘီလီယံကျော်ရှိရာ မြန်မာနိုင်ငံမှတင်သွင်းမှုသည် အမေရိကန်ဒေါ်လာ သန်း ၉၀၀ နီးပါး အထိရှိကြောင်း ISP Myanmar က ပြုစုထားသည့်စာရင်းများကို ထုတ်ပြန်ချက်တွင် ဖော်ပြထားသည်။ 

Photo- BETV Business