(စစ်ဆင်ရေးအတွင်း စစ်ကောင်စီ တပ်ရင်းမှူးနှင့်ဒု-ရင်းမှူးများအပါအဝင် တပ်ဖွဲ့ဝင် (၁၁၀)ကျော်သေဆုံးခဲ့ပြီးစစ်သုံ့ပန်း(၃၈)ယောက်၊ လက်နက်ကြီး၊ လက်နက်ငယ်မျိုးစုံ (၁၂၈)လက် နှင့် ခဲယမ်းပစ္စည်းများအားသိမ်းဆည်းနိုင်ခဲ့သည်ဟု ဖော်ပြ)

ကယား(ကရင်နီ) ပြည်နယ် လွိုင်ကော်တက္ကသိုလ်ထဲ၌ တပ်စွဲထားသောတပ်မ(၆၆)လက်အောက်ခံ ခမ၇ (၄၂၅) နှင့် ခမ၇ (၆) တပ်ရင်းတို့အား အပြီးသတ်ချေမှုန်းနောက် နောက်ဆုံးလက်ကျန်တပ်ဖွဲ့ဝင် ၃၂ ဦးသည်  ကရင်နီအမျိုးသားကာကွယ်ရေးတပ် - KNDF ထံ လက်နက်ချခဲ့သည်ဟု သိ၇သည်။

နိုဝင်ဘာလ(၁၄)ရက်နေ့တွင် လွိုင်ကော်တက္ကသိုလ်ဝန်းအတွင်းတပ်စွဲကျန်ရှိနေသောခမ၇ (၆) မှ တပ်ဖွဲ့ဝင်များအား လက်နက်ချအညံ့ခံရန် KNDFမှ အခွင့်အရေးပေးခဲ့ပြီးနောက် တပ်ခွဲမှူး “ကောင်းမြတ်ကို”(ကြည်း – ၄၆၅၉၇) ဦးစီးသောစစ်ကောင်စီတပ်သား (၃၂) ဦး လက်နက်ချ အညံ့ခံခဲ့သည်ဟု နိုဝင်ဘာ ၁၅ ရက် ယနေ့ နေ့စွဲဖြင့် KNDF ၏ သတင်းထုတ်ပြန်ချက်တွင် ဖော်ပြသည်။

နိုဝင်ဘာလ(၁၃)ရက်နေ့တစ်နေ့လုံး ဖြစ်ပွားခဲ့သည့်  လွိုင်ကော်တက္ကသိုလ်ဝန်းတိုက်ပွဲတွင် တက္ကသိုလ် ဝင်းထဲ တပ်စွဲထားသောစစ်ကောင်စီ၏ ခမ၇(၄၂၅) တပ်ရင်းမှူး နှင့် ဒု-ရင်းမှူးအပါအဝင် တပ်ရင်းတစ်ရင်းလုံးနီးပါးသေဆုံးခဲ့ပြီးခမ၇(၆)၏ အင်အား တစ်ဝက်နီးပါးကိုပါ ချေမှုန်းနိုင်ခဲ့သည်ဟု ဖော်ပြသည်။

အပြီးသတ်ချေမှုန်းရန်စစ်ဆင်ရေးအားယမန်နေ့  မနက်ပိုင်းမှစ၍ ညနေပိုင်းတွင်ကျန်ရှိစစ်ကောင်စီ တပ်ဖွဲ့များအား လက်နက်ချ အညံ့ခံရန် အခွင့်အရေး ပေးပြီးနောက်ထိုသို့ လက်နက်ချ အညံ့ခံလာခြင်းဖြစ်သည်ဟု သိ၇သည်။

လွိုင်ကော်တက္ကသိုလ်တွင်တပ်စွဲထားသည့် စစ်ကောင်စီတပ်ရင်း (၂) ရင်းအား ချေမှုန်းတိုက်ခိုက်ခဲ့သည့်KNDF စစ်ကြောင်း၏စစ်ဆင်ရေးတွင် စစ်ကောင်စီ တပ်ရင်းမှူး နှင့်ဒု-ရင်းမှူးများအပါအဝင် တပ်ဖွဲ့ဝင် (၁၁၀)ကျော်အား သုတ်သင်နိုင်ခဲ့ပြီးစစ်သုံ့ပန်း(၃၈)ယောက်၊ လက်နက်ကြီး၊ လက်နက်ငယ်မျိုးစုံ (၁၂၈)လက် နှင့် ခဲယမ်းပစ္စည်းများအားသိမ်းဆည်းနိုင်ခဲ့သည်ဟု ဖော်ပြထားသည်။

၎င်းစစ်ဆင်ရေးသည် “၁၁.၁၁ စစ်ဆင်ရေး” (11.11Operation) ၏အစိတ်အပိုင်းတစ်ခုဖြစ်သည် KNDF က ပြောဆိုသည်။ (NN-30)

ဓာတ်ပုံ - KNDF