ရှမ်းပြည်မြောက်ပိုင်း ကျောက်မဲမြို့နယ်၊မိုင်းငေါ့မြို့ကို အပြီးသတ် သိမ်းပိုက်နိုင်ခဲ့ပြီဟု PSLF/TNLA မှ ယနေ့ ဇန်နဝါရီ၁ရက်နေ့တွင်ထုတ်ပြန်သည်။

မိုင်းငေါ့မြို့နယ် စစ်ကောင်စီတပ်စခန်းများကိုတအာင်းတပ်မတော်  PSLF/TNLA ကဒီဇင်ဘာ ၂၉ ရက်နေ့မှ ၃၁ ရက်နေ့ ထိ၃ရက်ကြာတိုက်ခိုက်ပြီးနောက် ယမန်နေ့ ည ၁၂ နာရီခန့်က တပ်စခန်းဗျုဟာကုန်းအပါအဝင် ၊ ရဲစခန်းနှင့် စကစ ဌာနဆိုင်ရာရုံးများကိုအလုံးစုံသိမ်းပိုက် ရရှိခဲ့သည်။

မိုင်းငေါ့မြို့ စခန်းသိမ်းတိုက်ပွဲ၃ ရက်တာ တိုက်ပွဲ ကာလအတွင်း စစ်ကောင်စီတပ်မှ လေကြောင်းတိုက်ခိုက်မှုစုစုပေါင်း ၂၄ ကြိမ်၊ ဗုံးကြဲချမှု အကြိမ်ပေါင်း ၁၀၃ ကြိမ်၊လက်နက်ကြီး ပစ်ခတ်မှု ၄၅ ကြိမ် ထက်မနည်း အသုံးပြု တိုက်ခိုက်ခဲ့သည်ဟုထုတ်ပြန်ထားသည်။

စစ်ကောင်စီတပ်စခန်းများကို PSLF/TNLA ကတိုက်ခိုက်နေစဥ်တွင် စစ်ကောင်စီတပ်က အရပ်သားများကို ဦးတည်တိုက်ခိုက်မှုကြောင့်မိုင်းငေါ့မြို့နယ် ဒေသခံ ၂ ဦးသေဆုံးခဲ့ပြီး ၅ ဦး ဒဏ်ရာ ရရှိကာဘာသာရေး အဆောက်အဦး၊ ဘုရားကျောင်းကန်များ လူနေအိမ် ၁၄ လုံး မီးလောင်ပျက်စီးခဲ့သည်ဟုထုတ်ပြန်ထားသည်။

တိုက်ပွဲကာလအတွင်း စစ်ကောင်စီ၏လက်နက်ခဲယမ်းများ၊ ဟောင်ဝစ်ဇာအမြောက်အပါအဝင် လက်နက်မျိုးစုံ၊မိုင်း၊ခဲယမ်းမျိုးစုံနှင့် စစ်သုံးဆောင်ပစ္စည်းများသိမ်းဆည်း၇မိခဲ့သည်ဟုဖော်ပြထားသည်။

ယနေ့ ၂၀၂၄ခုနှစ်၊ ဇန်နဝါရီလ ၁ ရက်နေ့အထိ တအာင်းတပ်မတော် PSLF/TNLA က နမ့်ဆန်မြို့၊နမ့်ခမ်းမြို့၊ မန်တုံမြို့၊ နမ္မတူမြို့၊ မိုင်းလုံမြို့တို့ကိုသိမ်းပိုက်ခဲ့ပြီးနောက် ဆဌမမြောက်မြို့အဖြစ် မိုင်းငေါ့မြို့ကိုအလုံးစုံ ထိန်းချုပ်ထားပြီးဖြစ်သည်ဟု ထုတ်ပြန်ထားသည်။

ပုံစာ-PSF/TNLA