ခိုင်လူလှ (ရိုးမမြီ)၊ နိရဉ္စရာ၊ မတ် ၂၂/ ၂၀၂၄

စစ်ကောင်စီ ရန်ကုန်တိုင်းစစ်ဌာနချုပ်အတွင်းကိုရန်ကုန်ပကဖ (အထူးတပ်ဖွဲ့)ရဲဘော်များ စစ်ကောင်စီတပ်ဖွဲ့ဝင်များအဖြစ်အသွင်ယူပြီး ဝင်ရောက်တိုက်ခိုက်ခဲ့ကြောင်း People's Spring (လူထုနွေဦး)တွင် သတင်းဖော်ပြထားသည်။

ယနေ့သောကြာနေ့ နေ့လယ်ပိုင်းတွင် ရန်ကုန်တိုင်းစစ်ဌာနချုပ်အတွင်း၊စစ်ကောင်စီအရာရှိကြီးများ ဂေါက်သီးရိုက်ကစားနေသည့် ဂေါက်ကွင်းနေရာသို့ရန်ကုန်ပကဖ (အထူးတပ်ဖွဲ့)က ပြင်းအားမြင့် အဝေးထိန်းမိုင်းဖြင့်အောင်မြင်စွာဖောက်ခွဲတိုက်ခိုက်နိုင်ခဲ့ကြောင်း  ရန်ကုန် ပကဖ(အထူးတပ်ဖွဲ့)မှ တာဝန်ရှိသူကို ကိုးကားပြီး လူထုနွေဦးက သတင်းရေးသားထားသည်။

ရန်ကုန်ပကဖ(အထူးထောက်လှမ်းရေးအဖွဲ့)အသွင်ယူရဲဘော်များထံမှ တိုင်းစစ်ဌာနချုပ်သို့ စစ်ကောင်စီ၏ ကစထ(၅)မှူးဒုတိယဗိုလ်ချုပ်ကြီးသက်ပုံနှင့်အဖွဲ့ လာရောက်မည်ဖြစ်ကြောင်း၊ ၎င်းအပါအဝင်စစ်ကောင်စီဝန်ကြီးအချို့၊ ရန်ကုန်တိုင်း စစ်တိုင်းမှူးနှင့် မြို့တော်ဝန်၊ အခြားတပ်ဘက် အရပ်ဘက်အရာရှိကြီးများ လာရောက်ရန်ရှိကြောင်း အတွင်းသတင်းအတိအကျပေးပို့လာသည့်အတွက် ရန်ကုန်ပကဖ(အထူးတပ်ဖွဲ့)မှ ရဲဘော်များက တိုင်းစစ်ဌာနချုပ်အတွင်းသို့ စစ်ကောင်စီ တပ်ဖွဲ့ဝင်များအဖြစ်အသွင်ယူဝင်ရောက်ပြီးအချိန်မီ တိုက်ခိုက်ခဲ့သည်ဟု ဆိုသည်။

အဆိုပါတိုက်ခိုက်မှုကြောင့်စစ်ကောင်စီ၏ ထိပ်တန်းအရာရှိကြီးများ၊ တိုင်းစစ်ဌာနချုပ်အရာရှိ၊ အရာခံများထိခိုက်ဒဏ်ရာရရှိမှု များပြားကြောင်းသိရပြီး သေဆုံးစာရင်းကိုအတိအကျမသိ၇သေးဟု သတင်းတွင် ဖော်ပြသည်။

တိုက်ခိုက်မှုပေါက်ကွဲသံကို ဘေးပတ်ဝန်းကျင်မြို့နယ်များက ကြားရပြီး လက်ရှိတိုင်း စစ်ဌာနချုပ် အတွင်းသို့မီးသတ်ကားနှင့်လူနာတင်ကားများ ဝင်သွားကြောင်း သိရသည်ဟု ရန်ကုန်ပကဖ (အထူးတပ်ဖွဲ့)ကပြောသည်။

သို့သော်လည်း ဖြစ်စဥ်နှင့် ပတ်သက်ပြီး လူထုနွေဦးကသီးခြားအတည်မပြုနိုင်သေးဟု ဆိုသည်။

ဖေဖော်ဝါရီနှင့်မတ်လ နှစ်လအတွင်းမှာပင် ရန်ကုန်မြို့တွင်ရှိသည့် စစ်ကောင်စီနှင့် ဆက်စပ်သည့်နေရာ၁၈ နေရာအထိမြို့ပြပြောက်ကျားအဖွဲ့များက တိုက်ခိုက်ခဲ့ပြီး  ထိုတိုက်ခိုက်မှုများအထဲတွင် အကြီးဆုံး ပစ်မှတ်ငါးခုပါဝင်ခဲ့သည်ဟု သတင်းတွင် ဖော်ပြသည်။

အကြီးဆုံး ပစ်မှတ်ငါးခုမှာ လေယာဥ်ဆီတင် MVသင်္ဘောဖောက်ခွဲတိုက်ခိုက်မှု၊ MEC အရာရှိများနေထိုင်သည့် မြ၀တီအရာရှိရိပ်သာ ဖောက်ခွဲတိုက်ခိုက်မှု၊ Mytel ရုံးချုပ်ပြင်းအားမြင့် အဝေးထိန်းမိုင်းဖြင့်ဖောက်ခွဲတိုက်ခိုက်မှု၊ အင်းစိန်မြို့နယ်မှာရှိ လေတပ်အိမ်ရာဝင်းပစ်ခတ်တိုက်ခိုက်နှင့် ယခု ရန်ကုန်တိုင်းစစ်ဌာနချုပ်အတွင်း၊စစ်ကောင်စီအရာရှိကြီးများ ဂေါက်သီးရိုက်ကစားနေသည့် ဂေါက်ကွင်းနေရာအတွင်းဝင်ရောက်တိုက်ခိုက်မှုတို့ ဖြစ်သည်ဟု ဆိုသည်။