အကြမ်းဖက်မှုများရပ်တန့်ရန်နှင့် နိုင်ငံရေးအကျဉ်းသားများကိုအမြန်ဆုံးပြန်လွှတ်ပေးရန် မြန်မာစစ်အစိုးရကို အမေရိကန်က တိုက်တွန်း

(မြန်မာကို ကူညီရန် အမေရိကန် သည် အာဆီယံနှင့် အနီးကပ် ပူးပေါင်းဆောင်ရွက်သွားမည်)

နိရဉ္စရာ၊ မေ ၂၉/ ၂၀၂၄

နိုင်ငံရေး အကျဉ်းသားများကိုအမြန်ဆုံးပြန်လွှတ်ပေးရန် နှင့် အကြမ်းဖက်မှုများရပ်တန့်ရန် မြန်မာစစ်အစိုးရကို အမေရိကန်က တိုက်တွန်းပြောကြား လိုက်သည်။

(၃၆) ကြိမ်မြောက် အာဆီယံ-အမေရိကန် ဆွေးနွေးပွဲတွင် မတရားဖမ်းဆီးခံထားရသူတွေကို ပြန်လွှတ်ပေးဖို့အမေရိကန်က မြန်မာစစ်အစိုးရကို အထက်ပါအတိုင်း တောင်းဆိုလိုက်ခြင်းဖြစ်သည်။

နိုင်ငံရေး အကျဉ်းသားများ ကူညီစောင့်ရှောက်ရေးအသင်း(AAPP)၏ အဆိုအရ စစ်အစိုးရသည် လူပေါင်း ၅၁၄၈ ဦးကို သတ်ဖြတ်ခဲ့ပြီး လူပေါင်း ၂၀၄၉၉ ဦးကို ဖမ်းဆီးထိန်းသိမ်းခဲ့သည်။

အာဏာသိမ်းပြီးကတည်းက လူပေါင်း ၂.၃ သန်းကျော် သည် အိုးအိမ်စွန့်ခွာ ထွက်ပြေးခဲ့ရသည်။

အရှေ့အာရှနှင့် ပစိဖိတ်ရေးရာဆိုင်ရာ အမေရိကန် လက်ထောက်နိုင်ငံခြားရေးဝန်ကြီး Daniel Kritenbrink ကမေလ၂၄ရက်က ဝါရှင်တန်တွင် ကျင်းပခဲ့သည့် ဆွေးနွေးပွဲအတွင်း အကြမ်းဖက်မှု မျိုးစုံကို အဆုံးသတ်ရန်၊ မတရား ဖမ်းဆီးခံထားရသူများကို လွှတ်ပေးရန်နှင့် လူသားချင်းစာနာမှု အကူအညီများ လိုအပ်နေသူများထံ ပေးအပ်နိုင်ရေးအတွက် အတားအဆီးမရှိ ဝင်ရောက်ခွင့်ပြုရန် စစ်အစိုးရအား တိုက်တွန်းထားသည်။

မြန်မာနိုင်ငံကို ပံ့ပိုးကူညီရန် ဝါရှင်တန်သည် အာဆီယံနှင့် အနီးကပ် ပူးပေါင်းဆောင်ရွက်သွားမည် ဖြစ်ကြောင်း Kritenbrink က အလေးပေးပြောကြားခဲ့သည်။

စစ်တပ်က အာဏာသိမ်းမှုအပြီးတွင် အာဆီယံသည် မြန်မာနိုင်ငံတွင် ပြင်းထန်နေသော အကျပ်အတည်းကို ဖြေရှင်းရန်အတွက် ဘုံငါးချက်သဘောတူညီမှုဟု လူသိများသော ငြိမ်းချမ်းရေးအစီအစဉ်ကို ချမှတ်ခဲ့သည်။

အဆိုပါ အစီအစဉ်သည် အကြမ်းဖက်မှုများကို ချက်ချင်းရပ်တန့်ရန်နှင့် လူသားချင်းစာနာ ထောက်ထားမှုဆိုင်ရာ အကူအညီများ ပေးအပ်ရန် ပါ၀င်သည်။

သို့ရာတွင် စစ်အစိုးရသည် ၎င်း၏ ကတိကဝတ်များကို လေးစားလိုက်နာရန် ပျက်ကွက်ပြီး ဆိုးရွား ကြမ်းတမ်းသည့် အကြမ်းဖက်မှုများကို ဆက်လက် လုပ်ဆောင်နေသောကြောင့် အဆိုပါ အစီအစဉ်သည် ထိရောက်မှု မရှိသည့်အတွက် ဝေဖန်မှုများနှင့် ရင်ဆိုင်ခဲ့ရသည်။

ဒီမိုကရေစီနည်းကျ ရွေးကောက်တင်မြှောက်ထားတဲ့ အစိုးရကို ဖြုတ်ချပြီး အာဏာသိမ်းပြီးကတည်းက မြန်မာနိုင်ငံတွင်မငြိမ်မသက်မှုများ နှင့် အကြီးအကျယ် ရင်ဆိုင်နေရသည်။ Source/Dhaka Tribune and Constitution Net