(နောင်ချို၊မိုးကုတ်မြို့နယ်၌ တိုက်ပွဲဆက်လက်ဖြစ်ပွား)

နိရဉ္စရာ၊ဇူလိုင် ၂၂/၂၀၂၄

မန္တလေးတိုင်း၊မိုးကုတ်မြို့ (အရှေ့ပိုင်း) ပန်မထိပ်ရွာအနီးနှင့်အကျဉ်းထောင်ရှိ စစ်ကောင်စီ တပ်စခန်းအားတော်လှန်ရေး ပူးပေါင်းတပ်ဖွဲ့တို့ကတိုက်ခိုက်သိမ်းပိုက်ခဲ့သည်ဟုPSLF/TNA သတင်းနှင့် ပြန်ကြားရေးဌာနက ထုတ်ပြန်သည်။

သတင်းထုတ်ပြန်ချက်ထဲတွင် “တအာင်းပြည်တပ်မဟာ (၂) နယ်မြေ မိုးကုတ်မြို့ (အရှေ့ပိုင်း)ပန်မထိပ်ရွာအနီးနှင့် အကျဉ်းထောင်ရှိ စစ်ကောင်စီတပ်စခန်းအား တအာင်းအမျိုးသားလွတ်မြောက်ရေးတပ်မတော် TNLA နှင့်PDF(မိုးကုတ်ဗျူဟာ) ပူးပေါင်းတပ်ဖွဲ့တို့ကတိုက်ခိုက် သိမ်းပိုက်ရာတွင်စစ်ကောင်စီ၏ လက်နက်ခဲယမ်းများသိမ်းဆည်းရမိပြီး ရန်သူ့အလောင်း (၂၀)လောင်းရှင်းလင်းနိုင်ခဲ့ကြောင်း”ဖော်ပြထားသည်။

သိမ်းဆည်း၇မိသည့်စစ်ကောင်စီလက်နက်များတွင် လက်နက်ငယ် (၅)လက်၊ ဒရုန်း(၁)စင်းနှင့်အခြားစစ်အသုံးအဆောင်ပစ္စည်းများပါဝင်သည်ဟု ဆိုသည်။

အလားတူ တအာင်းပြည် တပ်မဟာ(၂) နယ်မြေနောင်ချိုမြို့နယ်တွင် စစ်ကောင်စီတပ်စခန်းများအားတအာင်းအမျိုးသားလွတ်မြောက်ရေးတပ်မတော် TNLA နှင့်MDY-PDF ပူးပေါင်းတပ်ဖွဲ့တို့ ဆက်လက်တိုက်ခိုက်ပြီး တိုက်ပွဲဖြစ်ပွားလျက်ရှိနေသည်ဟု သတင်းထုတ်ပြန်ချက်တွင် ဖော်ပြထားသည်။ 

ဇူလိုင် (၂၂) ရက် နေ့လည် (၁း၁၁)နာရီအချိန်၌ နောင်ချိုမြို့ နယ် တဲခေါ်ရွာရှိ စစ်ကောင်စီတပ်စခန်းအားထိုးစစ်ဆင်တိုက်ခိုက်ခဲ့ဟု ဆိုသည်။ 

ထို့ပြင် တပ်မဟာ(၂) နယ်မြေကျောက်မဲမြို့နယ်ရှိ အေးရှားဝေါဂိတ်နှင့် နမ့်ဆီလင်းဘုန်းကြီးကျောင်းတွင် တပ်စွဲထားသည့်စစ်ကောင်စီတပ်ဖွဲ့အား တအာင်းတပ်မတော် TNLA တပ်ဖွဲ့ကလိုက်လံရှင်းလင်းရာမှတိုက်ပွဲဖြစ်ပွားခဲ့သည်ဟု သတင်းထုတ်ပြန်ချက်တွင် ဖော်ပြထားသည်။

၁၀၂၇ စစ်ဆင်ရေးဒုတိယတကျော့ ပြန်လည် ဖြစ်ပွားခဲ့သည့်(၂၈)ရက်မြောက်နေ့တွင်  နောင်ချို၊မိုးကုတ်မြို့နယ်၌ တိုက်ပွဲဆက်လက်ဖြစ်ပွားနေဆဲဖြစ်သည်။