(၂၀၀၈ ခြေဥကို ဖျက်သိမ်းပြီး နိုင်ငံရေးလောကမှ စစ်တပ်နုတ်မထွက်သရွေ့မည်သည့် ငြိမ်းချမ်းရေးဆွေးနွေးမှုမှ အထမမြောက်နိုင်ဟုဆို)

ကြိုင်ဟိန်းလင်း၊နိရဉ္စရာ၊ ဩဂုတ် ၂၂/၂၀၂၄

စစ်ကောင်စီ၏ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေး ကော်မတီနှင့်နိုင်ငံရေးပါတီများအစုအဖွဲ့၏ အလုပ်အဖွဲ့တို့၏တွေ့ဆုံဆွေးနွေးပွဲကို ယမန်နေ့ဩဂုတ်လ (၂၁) ရက်တွင် နေပြည်တော်ရှိ အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှု ဗဟိုဌာန၌ကျင်းပခဲ့ကြောင်း သိရသည်။

ယင်းတွေ့ဆုံဆွေးနွေးပွဲသို့စစ်ကောင်စီမှ နယ်စပ်ရေးရာဝန်ကြီးဌာန ပြည်ထောင်စုဝန်ကြီး၊အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ ဥက္ကဋ္ဌ ဒုတိယဗိုလ်ချုပ်ကြီး ထွန်းထွန်းနောင်နှင့်ညှိနှိုင်းရေးကော်မတီဝင်များတက်ရောက်ခဲ့ပြီး နိုင်ငံရေးပါတီဖက်မှရခိုင့်ဦးဆောင်ပါတီဥက္ကဋ္ဌ ဒေါက်တာအေးမောင်နှင့် အလုပ်အဖွဲ့ ကိုယ်စားလှယ်များ၊တာဝန်ရှိပုဂ္ဂိုလ်များ တက်ရောက်ခဲ့ကြသည်ဟု စစ်ကောင်စီကယနေ့ သြဂုတ်လ ၂၂ ရက်တွင် ထုတ်ပြန်ထားသည်။

တွေ့ဆုံရာတွင် နိုင်ငံရေးပါတီများအစုအဖွဲ့၏အလုပ်အဖွဲ့ကဆွေးနွေးလိုသည့်အချက်များကို အဆိုပြုတင်ပြကြပြီး အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ အဖွဲ့ဝင် ဒုတိယဗိုလ်ချုပ်ကြီးဝင်းဗိုလ်ရှိန်က ညှိနှိုင်းရေးကော်မတီဘက်မှ ဆွေးနွေးလိုသည့်အချက်များကိုအဆိုပြုဆွေးနွေးခဲ့ကြောင်း သိ၇သည်။

ထို့ပြင်ဖွဲ့စည်းပုံအခြေခံဥပဒေ (၂၀၀၈ ခုနှစ်)မှ ပြင်ဆင်ဖြည့်စွက်သင့်သည့် အချက်များနှင့် ပတ်သက်ပြီး ပထမအကြိမ် တွေ့ဆုံခဲ့စဉ်ကဆက်လက်ဆွေးနွေးရန် ကျန်ရှိသည့် အချက်များနှင့် နှစ်ဖက် အဆိုပြုချက်များကို အပြန်အလှန်ဆွေးနွေးညှိနှိုင်းကြကြောင်း သိရသည်။

စစ်ကောင်စီကထိုကဲ့သို့ ဆွေးနွေးနေသော်လည်း လက်တွေ့တွင် အလုပ်မဖြစ်သည့်အပြင်မြန်မာပြည်ငြိမ်းချမ်းရေးအတွက်ဆိုလျှင် ၂၀၀၈ ဖွဲ့စည်းပုံ အခြေခံဥပဒေကိုဖျက်သိမ်းပြီး နိုင်ငံရေးလောကမှ စစ်ကောင်စီထွက်သွားရန်လိုသည်ဟု ဝါရင့်နိုင်ငံရေးသမား ဦးဖေသန်းက ပြောသည်။

"ပါတီနိုင်ငံရေးနဲ့ဆက်သွားလို့မရတော့ဘူး။ တော်လှန်ရေးအဖွဲ့အစည်းတွေနဲ့ ဆွေးနွေးရမယ့် အခြေအနေမျိုးရှိသွားပြီ။ လက်တွေ့မှာ အဲဒါကို လုပ်မယ်ဆိုရင်လည်း ၂၀၀၈ ဖွဲ့စည်းပုံကို ဖျက်သိမ်းပြီးတော့ တပ်မတော်ကနိုင်ငံရေးလောကထဲက ထွက်သွားဖို့ပေါ့။ အဲဒီ ကတိစကားခံဝန်ချက်မပါရင်တစ်ယောက်မှ ဆွေးနွေးမှာမဟုတ်ဘူး။ အဲလိုပြောဖို့ တပ်မတော်မှာ တာဝန်ရှိတယ်။မပြောနိုင်ဘူးဆိုရင် ငြိမ်းချမ်းရေးဆွေးနွေးပွဲတော်ဟာအထမြောက်စရာမရှိဘူး။ ရုပ်ပြပဲ ဖြစ်လိမ့်မယ်" ဟု ပြောသည်။

ယင်းဆွေးနွေးပွဲတွင် ဒုတိယဗိုလ်ချုပ်ကြီးထွန်းထွန်းနောင်နှင့် နိုင်ငံရေးပါတီများအစုအဖွဲ့၏ အလုပ်အဖွဲ့ခေါင်းဆောင်ရခိုင့်ဦးဆောင်ပါတီဥက္ကဋ္ဌ ဒေါက်တာအေးမောင်တို့က နှုတ်ခွန်းဆက်စကားများပြောကြားခဲ့ကြောင်းလည်း သိ၇သည်။

ယင်းတွေ့ဆုံမှုကိုယနေ့ သြဂုတ် (၂၂) ရက်တွင်လည်း ဆက်လက်ကျင်းပခဲ့သည်ဟု ဆိုသည်။

ဓာတ်ပုံ- စစ်ကောင်စီ