နိရဉ္စရာ၊ အောက်တိုဘာ ၁၁/၂၀၂၄
မြန်မာအရေးပတ်သက်ပြီး တရုတ်အစိုးရ၏ မူဝါဒကို ပြန်ပြင်ပေးဖို့ အမေရိကန်ပြည်ထောင်စုမှာ ရောက်ရှိနေသည့် မြန်မာပြည်ဖွားအချို့သည် အောက်တိုဘာလ ၁၀ ရက်နေ့တွင် အမေရိကန်နိုင်ငံ ဝါရှင်တန်ဒီစီမြို့မှာရှိသည့် တရုတ်သံရုံးရှေ့တွင် လာရောက်ဆန္ဒပြခဲ့ကြသည်။
" စစ်ကောင်စီကို Support ( ထောက်ပံ့နေတာ ) လုပ်နေတာတွေကိုရပ်ဖို့လာပြီဆန္ဒပြတာပါ" ဟုဆန္ဒပြပွဲမှာပါဝင်သည့် ဦးယဉ်အေးကဆိုသည်။
ထို့အပြင် တရုတ်နိုင်ငံခြားရေးဝန်ကြီးမစ္စတာ ဝမ်ရိ၏ မြန်မာနိုင်ငံသို့လာရောက်ခဲ့သည့် သြဂုတ်လ ခရီးစဉ်နောက်ပိုင်မြန်မာ့အရေးနှင့်ပတ်သက်၍ တရုတ်အစိုးရ၏ ပြောင်းလဲလာသောမူဝါဒကို ပြန်ပြင်ပေးဖို့ အမေရိကန်ရောက် မြန်မာပြည်ဖွားများက တရုတ်သံရုံးရှေ့ တွင် တောင်းဆိုခဲ့ကြသည်။
အရှေ့မြောက်တိုင်းစစ်ဌာနချုပ် ကျဆုံးပြီးနောက်ပိုင်း တရုတ်အစိုးရအနေဖြင့် တရုတ်မြန်မာနယ်စပ် အခြေစိုက်တိုင်းရင်းသားလက်နက်ကိုင်အဖွဲ့များအား စစ်ကောင်စီတပ်ကို ထိုးစစ်ဆင်မှုများ ရပ်တန့်ဖို့ အတင်းအကျပ်ဖိအားပေးလာသည်။
ထိုကဲ့သို့ တရုတ်ဖိအားပေးလာခြင်းသည် မြန်မာနိုင်ငံပြည်တွင်းရေးကို ဝင်ရောက်မစွက်ဖက်ပါဟု တရုတ်အစိုးရက ချမှတ်ထားသည့် ပေါ်လစီနှင့်လည်း ကိုက်ညီမှု မရှိသဖြင့် “ အပြောနှင့် အလုပ်မညီ”သော တရုတ်အစိုးရ၏ လုပ်ရပ်အား ဆန့်ကျင်ကန့်ကွက်ဆန္ဒပြခဲ့ကြခြင်းဖြစ်သည်။
တရုတ်အစိုးရ၏ ဖိအားပေးကြောင့် မြောက်ပိုင်းညီနောင် ၃ ဖွဲ့၏ ထိုးစစ်မှု အရှိန်ရပ်တန့်သွားခဲ့ပြီး ပြည်ပရောက် မြန်မာနိုင်ငံသားအနေဖြင့်လည်း တရုတ်အစိုးရအား ဆန့်ကျင့်ကန့်ကွက်ဆန္ဒပြပွဲများ ပိုမို ပြုလုပ်လာကြသည်ဟု သိရှိရသည်။